CAB. VI

1Vraaraghyn, my ta dooinney taghyrt dy huittym ayns peccah, shiuish ta spyrrydoil, gow-jee stiagh eh reesht ayns y spyrryd dy veenid; smooinaghtyn ort hene, er-aggle dy vod uss myrgeddin ve miolit. 2Ymmyrk-jee erraghyn y cheilley, as myr shoh lhieen-jee yn leigh. 3Son my ta dooinney jeeaghyn er hene dy ve red ennagh, tra nagh vel eh monney, t’eh molley eh-hene. 4Agh lhig da dy chooilley ghooinney e obbyr hene y phrowal, as eisht vees echey oyr boggey ayn hene ny-lomarcan, as cha nee ayns fer elley. 5Son nee dy chooilley ghooinney gymmyrkey e errey hene. 6Lhig dasyn t’er ny ynsaghey ayns y goo, shirveish ersyn ta gynsaghey jeh dy chooilley nhee mie [t’echey]. 7Ny bee-jee mollit; cha vel craid dy ve jeant mysh Jee: son cre-erbee ta dooinney dy chuirr, lheid shen nee eh ’vuinn. 8Son eshyn ta cuirr gys yn eill, nee jeh’n eill myrgeddin buinn loauys: agh eshyn ta cuirr gys y Spyrryd, nee jeh’n Spyrryd buinn yn vea dy bragh farraghtyn. 9As ny lhig dooin gaase skee ayns jannoo mie, son ayns imbagh cooie nee mayd buinn, mannagh bee mayd liastey. 10Myr ta caa ain er-y-fa shen, lhig dooin mie ’yannoo da dy chooilley ghooinney, er-lheh dauesyn ta jeh lught-thie’n chredjue. 11Ta shiu fakin cre’n screeuyn liauyr ta mee er scrieu hiuish lesh my laue hene. 12Whilleen as ta shirrey dy hoilshaghey ad-hene er cheu-mooie liorish cowrey ny foalley, t’ad gêginaghey shiu dy ve er ny ghiarey-chymmylt; ny-lomarcan son nagh jinnagh ad surranse tranlaase er coontey crosh Chreest. 13Son chamoo t’adsyn hene ta er ny ghiarey-chymmylt freayll y leigh; agh baillhieu shiuish dy v’er ny ghiarey-chymmylt, dy vod ad boggyssagh ayns cowrey yn eill eu. 14Agh ny lhig eh Jee dy jinnin’s boggyssagh, agh ayns crosh nyn Jiarn Yeesey Creest, liorish ta’n seihll er ny chrossey hym’s, as mish gys y theihll. 15Son ayns Creest Yeesey, chamoo ta giarey-chymmylt jeh foays erbee, ny an-ghiarey-chymmylt, agh cretoor noa. 16As whilleen as ta gimmeeaght cordail rish yn oardagh shoh, shee dy row orroo, as myghin, as er Israel Yee. 17Maghey shoh ny lhig da dooinney erbee mish y voirey, son ta mee gymmyrkey ayns my chorp cowraghyn y Chiarn Yeesey. 18Vraaraghyn, dy row grayse nyn Jiarn Yeesey Creest marish y spyrryd eu. Amen.