CAB. XIV

1As haink eh gy-kione, rish lhing Amraphel ree Shinar, Arioch ree Ellasar, Chedorlaomer ree Elam, as Tidal ree ashoonee. 2Dy ren ny reeaghyn shoh caggey noi Bera ree Sodom, as noi Birsha ree Gomorrah, noi Shinab ree Admah, as Shemeber ree Zeboiim, as noi ree Bela, ta shen Zoar. 3V’ad shoh er nyn jaglym cooidjagh ayns coan Siddim, ta nish enmyssit yn keayn sailjey. 4Daa vleïn jeig v’ad fo keesh gys Chedorlaomer, as ’sy tress vleïn yeig dirree ad magh n’oï. 5As ayns y chiarroo vleïn jeig haink Chedorlaomer, as ny reeaghyn va mârish, as woaill ad ny Rephaimee ayns Ashtaroth Karnaim, as ny Zuzimee ayns Ham, as ny Emimee ayns Shaveh Kiriathaim. 6As ny Horiteyn ayns cronk Seir, gys El-paran, ta liorish yn aasagh. 7As hyndaa ad, as haink ad gys En-mishpat, ta shen Kadesh, as stroie ad slane cheer ny Amalekiteyn, as myrgeddin ny Amoriteyn va cummal ayns Hazezon-tamar. 8As hie magh noi oc ree Sodom, as ree Gomorrah, as ree Admah, as ree Zeboiim, as ree Bela (ta shen Zoar) as ren ad caggey ry-cheilley ayns coan Siddim; 9Ta shen, rish Chedorlaomer ree Elam, as noi Tidal ree ashoonee, as Amraphel ree Shinar, as Arioch ree Ellasar; kiare reeaghyn noi queig. 10As va coan Siddim lane sloghyn laaghey; as reeaghyn Sodom as Gomorrah hug ad cooyl, as huitt ad ayndoo: as adsyn ren scapail chossyn ad roue gys ny sleityn. 11As ghow ad ayns spooilley ooilley yn chooid va ayns Sodom as Gomorrah, as ooilley yn beaghey v’ayn, as jimmee ad rhymboo. 12As ghow ad Lot mac braarey Abram (va cummal ayns Sodom) as e chooid, as jimmee ad roue. 13As haink fer jeusyn v’er roie er-chea, as dinsh eh shoh da Abram yn Hebrew; son v’eh cummal ayns strah Mamre yn Amorite, braar Eshcol, as braar Aner: v’ad shoh er n’yannoo cordail rish Abram. 14As tra cheayll Abram dy row e vraar goit ny phryssoonagh, choamree eh lesh armyn e Harvaantyn chaggee v’er nyn ruggey ayns e hie hene, three cheead as hoght-jeig, as hie ad er nyn eiyrt’s choud as Dan. 15As rheynn eh e heshaght-chaggee nyn ’oï, eh hene as e harvaantyn ’syn oie, as hooar ad y varriaght harrystoo: as hie ad er nyn eiyrt’s gys Hobah er cheu chiare jeh Damascus. 16As hug eh lesh back ooilley yn chooid, as myrgeddin hug eh lesh e vraar Lot, as e chooid, as myrgeddin ny mraane, as y pobble.

17As hie ree Sodom magh ny whail (myr v’eh chyndaa veih cragh Chedorlaomer, as ny reeaghyn va mârish) ’sy choan Shaveh, ta shen, coan y ree. 18As hug Melchizedeck ree Salem lesh magh arran as feeyn: as v’eh saggyrt yn Jee smoo syrjey. 19As vannee eshyn eh, as dooyrt eh, Bannit dy row Abram liorish y Jee smoo syrjey, leshyn ta niau as thalloo. 20As bannit dy row yn Jee smoo syrjey, ta er livrey dty noidyn gys dty phooar. As hug eh jaghee da jeh ooilley e spooilley. 21As dooyrt ree Sodom rish Abram, Livrey dou yn sleih, as gow yn chooid dhyt hene. 22As dooyrt Abram rish ree Sodom, Ta mee er hroggal seose my laue gys y Chiarn, yn Jee smoo syrjey, leshyn ta niau as thalloo. 23Nagh goym nhee erbee, eer veih snaie gys strap-braagey, as nagh goym nhee erbee ta lhiat’s, nagh bee oyr ayd dy ghra, Ta mee er n’yannoo Abram berchagh; 24Er-lhimmey jeh shen, ny ta ny deiney aegey er vaarail, as ayrn ny deiney hie mârym, Aner, Eshcol, as Mamre; lhig dauesyn nyn ayrn y goaill.