CAB. XIX

1As haink daa ainle gys Sodom ’syn astyr: as va Lot ny hoie ayns giat Sodom: as tra honnick Lot ad, dirree eh seose dy gholl nyn guail, as chroym eh sheese e eddin lesh y thalloo. 2As dooyrt eh, Cur-my-ner nish, my hiarnyn, chyndaa-jee stiagh, ta mee guee erriu, gys thie nyn sharvaant, as gow-jee aaght fud-ny-hoie, as niee-jee nyn gassyn, as nee shiu girree dy moghey, as goll er nyn yurnah. As dooyrt ad, Cha lhiass, agh fuirree mayd ’sy traïd fud-ny-hoie. 3As hionn eh dy mooar orroo; as hyndaa ad stiagh huggey, as hie ad stiagh ’sy hie: as daarlee eh daue, as ren eh fuinney arran-millish; as ren ad gee.

4Agh roish my jagh ad dy lhie, ren deiney yn ard-valley, dy jarroo deiney Sodom cruinnaghey yn thie mygeayrt, chammah shenn as aeg, ooilley yn sleih veih dagh ard. 5As deïe ad da Lot, as dooyrt ad rish, Cre vel ny deiney haink stiagh hood’s noght? cur ad magh hooinyn, dy vod mayd enney ’choyrt orroo. 6As hie Lot magh er y dorrys huc, as ghooin eh yn dorrys ny yeï. 7As dooyrt eh, Ta mee guee erriu, vraaraghyn, ny jean-jee lheid y peccah. 8Cur-my-ner nish, ta daa inneen aym, nagh vel enney oc er dooinney, lhig dou, ta mee guee erriu, ad y choyrt lhiam magh hiu, as jean-jee roo myr sailliu hene: ynrycan rish ny deiney shoh ny jean-jee veg, son dy ghoaill aaght haink ad stiagh fo my chlea. 9As dooyrt ad, Shass back. As dooyrt ad reesht, Haink yn er shoh, er e yoarreeaght ny-vud ain; as nish baillish ’ve ny vriw: nish dell mayd ny smessey rhyt’s na roosyn. As hionn ad dy mooar er y dooinney, dy jarroo er Lot, as haink ad er-gerrey dy vrishey yn dorrys. 10Agh heeyn ny deiney magh nyn laue, as hayrn ad Lot huc stiagh ’sy thie, as ghooin ad y dorrys. 11As woaill ad ny deiney v’ec dorrys y thie lesh dellid, chammah beg as mooar: myr shen dy ren ad skee jeu hene dy gheddyn y dorrys.

12As dooyrt ny deiney rish Lot, Vel ayd’s ayns shoh sleih erbee elley mayrt? mac-’sy-leigh, as dty vec, as dty inneenyn, as cre-erbee t’ayd ayns yn ard-valley, cur lhiat magh ad ass yn ynnyd shoh. 13Son stroie mayd yn ynnyd shoh; er-y-fa dy vel yn eam oc er vishaghey dy mooar kiongoyrt rish eddin y Chiarn: As ta’n Chiarn er choyrt shin dy stroie eh. 14As hie Lot magh, as loayr eh rish e vec-’sy-leigh, va er phoosey e inneenyn, as dooyrt eh, Trog-jee erriu, cosne-jee ass yn ynnyd shoh, son nee yn Chiarn yn ard-valley shoh y stroie: agh yeeagh e vec-’sy-leigh er, myr fer va jannoo craid.

15As tra va’n moghrey rish, eisht ren ny ainleyn Lot y ghreinnaghey gys siyr, gra, Trog ort, gow dty ven, as dty ghaa inneen t’ayns shoh er-aggle dy bee oo er dty stroie ayns toyrt-mow yn ard-valley. 16As choud as v’eh cumrail, haare ny ainleyn greme er e laue, as er laue e ven, as e ghaa inneen; as myr va’n Chiarn myghinagh da, hug ad lhieu magh eh, as hoie ad eh cheu-mooie jeh’n ard-valley. 17As haink eh gy-kione, tra v’ad er choyrt lhieu ad magh, dy dooyrt eh, Cosne ersooyl son dty vioys; ny jeeagh dty yeï; chamoo jean cumrail raad erbee ’sy thalloo-rea; cosne gys y clieau, er-aggle dy bee oo er dty choyrt mow. 18As dooyrt Lot roo, Oh! ny lhig da ve myr shen, my hiarn. 19Cur-my-ner nish, ta dty harvaant er gheddyn foayr ayns dty hilley; as t’ou er ghloyraghey dty vyghin t’ou er hoilshaghey dooys ayns sauail my vioys; as cha voddym chea gys y clieau, er-aggle dy berr olk ennagh orrym, as dy voym baase. 20Cur-my-ner nish, ta’n balley shoh er-gerrey dy chosney huggey; as cha vel eh agh balley beg: O lhig dou chea gys shen (nagh nee balley fardalagh eh) as bee my annym bio. 21As dooyrt eh rish, Cur-my-ner, ta mee er n’yannoo soiagh jeed mychione yn accan shoh myrgeddin, nagh jean-ym yn ard-valley shoh y stroie, ayns e lieh t’ou er loayrt. 22Jean siyr, cosne royd gys shen, son cha voddym’s nhee erbee y yannoo, derrey t’ou er roshtyn huggey. Shen-y-fa va’n ard-valley shen enmyssit Zoar.

23Va’n ghrian er n’irree er y thalloo tra hie Lot stiagh ayns Zoar. 24Eisht gheayrt y Chiarn er Sodom as er Gomorrah brimstone as aile veih’n Chiarn ass niau. 25As stroie eh ny ard-valjyn shen, as ooilley yn cheer rea, as ooilley cummaltee ny ard-valjyn, as ooilley ny daase er y thalloo.

26Agh yeeagh ben Lot back, as v’ee chyndaït gys pillar dy hollan.

27As dirree Abraham dy moghey, gys yn ynnyd raad ren eh roïe accan kiongoyrt rish y Chiarn. 28As yeeagh eh lesh Sodom as Gomorrah, as lesh ooilley yn cheer rea, as honnick eh, as cur-my-ner, hrog jaagh ny cheerey seose, myr jaagh coirrey.

29As haink eh gy-kione, lurg da Jee v’er stroie ard-valjyn yn cheer rea, dy chooinee Jee er Abraham, as hug eh Lot magh ass mean y traartys, tra stroie eh ny ard-valjyn raad va Lot cummal.

30As hie Lot roish veih Zoar, as ren eh cummal ayns y clieau, as e ghaa inneen mârish: son va aggle er dy uirriaght ayns Zoar; as ren eh baghey ayns ooig, eh hene as e ghaa inneen. 31As dooyrt yn inneen shinney rish yn inneen saa, Ta nyn ayr shenn, as cha vel dooinney faagit er nyn son er yn ooir, lurg cliaghtey ooilley yn seihll. 32Tar royd, lhig dooin cur er nyn ayr giu feeyn, as nee mayd lhie mârish, dy vod mayd cummal seose sluight nyn ayrey. 33As hug ad er nyn ayr giu feeyn yn oie shen: As hie yn inneen shinney stiagh, as lhie ee marish e ayr; as cha dennee eh cre’n traa lhie ee sheese, ny cre’n traa hrog ee veih. 34As haink eh gy-kione, er laa-ny-vairagh, dy dooyrt y shuyr shinney rish yn unnane saa, Cur-my-ner, lhie mish riyr marish my ayr: lhig dooin cur er giu feeyn noght myrgeddin; as gow uss stiagh, as lhie mârish, dy vod mayd cummal seose sluight nyn ayrey. 35As hug ad er nyn ayr giu feeyn yn oie shen myrgeddin; as hie yn inneen saa, as lhie ee mârish; as cha dennee eh cre’n traa lhie ee sheese, ny cre’n traa hrog ee veih. 36Myr shen va daa inneen Lot torragh, liorish nyn ayr. 37As hug yn inneen shinney mac son y theihll, as denmys ee eh Moab: yn fer cheddin ayr ny Moabiteyn gys y laa jiu. 38As hug yn inneen saa myrgeddin mac son y theihll, as denmys ee eh Ben-ammi: yn fer cheddin ayr cloan Ammon gys y laa shoh.