CAB. XX

1As ghow Abraham e yurnah veih shen lesh y cheer my-yiass, as ren eh cummal eddyr Kadesh as Shur, as v’eh er e yoarreeaght ayns Gerar. 2As loayr Abraham mychione Sarah e ven, gra, She my huyr ee: as hug Abimelech ree Gerar fys, as ghow eh Sarah. 3Agh haink Jee gys Abimelech ayns ashlish ’syn oie, as dooyrt eh rish, Cur-my-ner, cha vel oo agh dooinney marroo, kyndagh rish y ven t’ou er ghoaill: son t’ee ben dooinney elley. 4Agh cha row Abimelech er jeet ny coair: as dooyrt eh, Jean uss, Hiarn, myrgeddin ashoon cairal y stroie? 5Nagh dooyrt eshyn rhym; She my huyr ee? as dooyrt ish, dy jarroo ee-hene, She my vraar eh: ayns ônid my chree, as gyn-loghtynid my laueyn, ta mee er n’yannoo shoh. 6As dooyrt Jee rish ayns dreamal, Dy jarroo, ta fys aym dy ren oo shoh ayns neu-loghtynid dty chree: son ren mish myrgeddin dty lhiettal veih jannoo peccah m’oï: shen-y-fa cha lhig mee dhyt bentyn r’ee. 7Shen-y-fa, cur nish yn ven da’n dooinney: son she phadeyr eh, as gowee eh padjer er dty hon, as bee oo bio: agh mannagh der oo da ee, toig, dy bee oo dy shickyr er dty choyrt dy baase, oo hene, as ooilley ny ta lhiat’s. 8Shen-y-fa dirree Abimelech dy feer voghey, as ren eh sumney cooidjagh ooilley e fir-oik, as dinsh eh ooilley ny reddyn shoh ayns y chlashtyn oc: as va aggle mooar er ny deiney. 9Eisht hug Abimelech fys er Abraham, as dooyrt eh rish, Cre shoh t’ou er n’yannoo rooin? as cre’n oill ta mee er n’yannoo, dy vel oo er choyrt lhiat orrym’s, as er my reeriaght, peccah trome? s’olk yn obbyr t’ou er n’yannoo. 10As dooyrt Abimelech rish Abraham, Cre er v’ou smooinaghtyn, tra ren oo shoh? 11As dooyrt Abraham, Er-y-fa dy smooinee mee, son shickyrys, cha vel aggle Yee ’syn ynnyd shoh, as gowee ad ersooyl my vioys er choontey my ven. 12As ny-yeih t’ee dy jarroo my huyr; son t’ee inneen my ayrey, agh cha nee inneen my vayrey: as haink ee dy ve my ven. 13As haink eh gy-kione, tra hug Jee mee magh dy hroailt veih thie my ayrey, dy dooyrt mee r’ee, Shoh dty chenjallys nee oo y hoilshaghey dooys; Raad erbee dy jem mayd, abbyr my-mychione, She my vraar eh. 14As ghow Abimelech kirree as dew, as fir-vooinjerey as inneenyn-veyl, as hug eh ad da Abraham, as hug eh da reesht Sarah e ven. 15As dooyrt Abimelech, Cur-my-ner, ta’n cheer aym’s kiongoyrt rhyt; gow dty chummal raad sailt. 16As dooyrt eh rish Sarah, Cur-my-ner, ta mee er choyrt da dty vraar thousane peesh dy argid: cur-my-ner, t’eshyn son fendeilagh sooilley, chammah dhyt hene, as dauesyn ooilley ta bentyn rhyt. Shoh myr hooar eh foill j’ee.

17Er shoh ghow Abraham padjer gys Jee: as ren Jee lheihys Abimelech, as e ven, as e harvaantyn, as ruggyr ad cloan. 18Son va’n Chiarn er yeigh seose ooilley breïnyn lught-thie Abimelech: er coontey Sarah ben Abraham.