CAB. XXIII

1As va Sarah shey-feed bleïn as shiaght dy eash: shoh va bleeantyn seihll Sarah. 2As hooar Sarah baase ayns Kirjath-arba; ta shen Hebron, ayns cheer Chanaan: as haink Abraham dy ghobberan, as dy cheayney son Sarah.

3As hass Abraham seose roish e varroo, as loayr eh rish mec Heth, gra, 4Ta mee my yoarree, as my hroailtagh mêriu. Cur-jee dou cairys ayns grunt oanluckee mêriu, dy voddym yn marroo y oanluckey ass my hilley.

5As dansoor mec Heth Abraham, gra rish. 6Clasht rooin, my Hiarn; t’ou dty phrince niartal ny mast’ ain; ayns y reih jeh ny oaiaghyn ain, jean dty varroo y oanluckey; cha jean unnane ain e oaie y reayll voïd; agh dy vod oo goanluckey dty varroo. 7As hass Abraham seose, as chroym eh eh-hene gys sleih ny cheerey, eer gys mec Heth. 8As loayr eh roo, gra, My she nyn aigney eh, dy jinnin my varroo y oanluckey ass my hilley, eaisht-jee rhym, as loayr-jee ass my lieh, rish Ephron mac Zohar: 9Dy der eh dou ooig Machpelah, ta leshyn, ayns kione e vagher; son wheesh dy argid as sheeagh eh ver eh dou eh, son cairys grunt oanluckee ny mast’ eu. 10As ren Ephron cummal mastey cloan Heth, as dreggyr Ephron yn Hittite Abraham, ayns clashtyn cloan Heth, as ooilley cummaltee yn ard-valley echey, gra, 11Cha nee myr shen, my Hiarn; eaisht rhym: yn magher ta mee coyrt dhyt, as yn ooig t’ayn, ta mee coyrt dhyt; fenish mec my phobble, ta mee dy choyrt dhyt eh: jean dty varroo y oanluckey. 12As chroym Abraham eh-hene sheese, kiongoyrt rish sleih ny cheerey. 13As loayr eh rish Ephron, ayns clashtyn sleih ny cheerey, gra, Agh my ver oo dou eh, ta mee guee ort, eaisht rhym; ver-ym argid dhyt son y vagher; gow voym eh, as nee’m my varroo y oanluckey ayns shen. 14As dansoor Ephron Abraham, as dooyrt eh rish. 15Eaisht rhym, my Hiarn; sheeagh y magher kiare cheead shekel dy argid; cre ta she eddyr mish as uss? Myr shen jean dty varroo y oanluckey. 16As va Abraham booiagh lesh ny dooyrt Ephron: as ren Abraham towse da Ephron yn argid v’eh er n’enmys ayns clashtyn mec Heth; kiare cheead shekel dy argid, yn argid va goll fud ny marchanyn.

17As magher Ephron va ayns Machpelah, va liorish Mamre, yn magher as yn ooig v’ayn, as ooilley ny biljyn ayns y vagher, va soit mygeayrt-y-mysh, v’ad jeant shickyr, 18Da Abraham, son possession, ayns fenish cloan Heth, kiongoyrt rish ooilley ny hie stiagh er giat yn ard-valley. 19As lurg shoh ren Abraham goanluckey Sarah e ven, ayns ooig magher Machpelah, liorish Mamre: ta shen Hebron, ayns cheer Chanaan. 20As va’n magher, as yn ooig ayn jeant shickyr da Abraham, myr cairys grunt oanluckee, liorish mec Heth.