CAB. XXIV

1As va Abraham shenn, as er roie dy mie ayns eash: as va’n Chiarn er vannaghey Abraham ayns dy chooilley nhee. 2As loayr Abraham rish ard-stiurt e hie, va reill harrish ooilley ny v’echey, Cur dty laue, ta mee guee ort, fo my lheayst. 3As ver-yms ort breearrey liorish y Chiarn, Jee niau as thalloo, nagh gow ben da my vac, jeh inneenyn ny Canaaniteyn, nyn mast’ ta mee cummal. 4Agh hed oo gys my heer hene, as gys my chynney, as gowee oo ben da my vac Isaac. 5As dooyrt y stiurt rish, Foddee nagh bee’n ven booiagh cheet mârym gys y cheer shoh: negin dou dty vac y choyrt lhiam reesht gys y cheer haink oo veih? 6As dreggyr Abraham eh, Gow uss kiarail, nagh der oo lhiat my vac gys y cheer shen reesht.

7Yn Chiarn Jee jeh niau, ghow mee veih thie my ayrey, as veih cheer my chynney, as ren loayrt rhym, as ren breearrey dou, gra, Da dty luight ver-yms yn cheer shoh; v’er eshyn e ainle royd, as gowee oo ben da my vac veih’n cheer shen. 8As mannagh bee’n ven booiagh cheet mayrt, eisht bee oo feayshlit veih shoh my vreearrey: agh jeeagh nagh der oo lhiat my vac gys y cheer shen reesht. 9As hug y stiurt e laue fo slheeayst Abraham e vainshtyr, as ren eh breearrey da, mychione y chooish shen. 10As ghow yn stiurt jeih camelyn, jeh camelyn e vainshtyr, as jimmee eh roish, [Son va ooilley chooid e vainshtyr fo e laue] as dirree eh, as hie eh gys Mesopotamia, gys ard-valley Nahor. 11As hug eh nyn aash da ny camelyn, cheu-mooie jeh’n ard-valley, liorish chibbyr-ushtey, ’syn astyr, tra va ny mraane goll magh dy hayrn ushtey. 12As dooyrt eh, O Hiarn, Jee my vainshtyr Abraham, ta mee guee ort, cur speedeil mie my raad yn laa jiu, as soilshee kenjallys da my vainshtyr Abraham. 13Cur-my-ner, ta mee my hassoo ayns shoh liorish y chibbyr; as ta inneenyn cummaltee yn ard-valley cheet magh dy hayrn ushtey: 14As lhig da ve myr shen, yn ven aeg shen jir-ym r’ee, Lhig sheese dty haagh, ta mee guee ort, dy voddym giu; as dy jir ish, Iu, as ver-yms ushtey da dty chamelyn myrgeddin: lhig ish ve yn ven, t’ou er phointeil da dty harvaant Isaac; as liorish shen bee fys aym, dy vel oo er hoilshaghey kenjallys da my vainshtyr.

15As shen myr ve s’coan v’eh erreish loayrt, cur-my-ner, haink Rebekah, inneen Vethuel, mac Vilcah, ben Nahor braar Abraham, magh lesh e saagh ushtey er e geaylin. 16As va’n ven aeg feer aalin dy yeeaghyn urree, ny moidyn, chamoo va ec dooinney dy yannoo r’ee, as hie ee sheese gys y chibbyr, as lhieen ee e saagh, as haink ee seose. 17As roie stiurt Abraham ny quail, as dooyrt eh, Lhig dou, [ta mee guee ort,] giu bolgym dy ushtey ass dty haagh. 18As dooyrt ee, Iu, my hiarn; as ren ee chelleeragh yn saagh y lhiggey sheese er e laue, as hug ee jough da. 19As tra v’ee er choyrt jough da, dooyrt ee, Tayrn-yms ushtey myrgeddin da dty chamelyn, derrey vees dy liooar oc. 20As hie ee dy tappee, as dolmee ee e saagh ayns y trogh ushtey, as roie ee reesht gys y chibbyr dy hayrn ushtey, as hayrn ee da ooilley ny camelyn echey. 21As ghow’n dooinney yindys j’ee as v’eh ny host, goaill tastey row’n Chiarn er choyrt aïgh mie lesh e yurnah, mannagh row. 22As haink eh gy-kione, tra va ny camelyn erreish giu, dy ghow yn dooinney jewel cleayshey dy airh jeh trimmid lieh shekel, as daa vracelet son ny laueyn eck, va towse jeih shekelyn dy airh. 23As dooyrt eh, Quoi da inneen oo? Insh dou, ta mee guee ort: vel ynnyd ayns thie dty ayrey dooinyn dy ghoaill aaght ayn? 24As dreggyr ee eh, Ta mish inneen Vethuel mac Vilcah, ren ee gymmyrkey da Nahor. 25Dooyrt ee ny sodjey, Ta ain coonlagh as foddyr dy liooar, as ynnyd dy ghoaill aaght ayn. 26As chroym y dooinney sheese e chione, as hug eh ooashley da’n Chiarn. 27As dooyrt eh, Bannit dy row Chiarn Jee my vainshtyr Abraham; nagh vel er vreayll e vyghin as e ynrickys veih my vainshtyr: son va mee er y raad, as ren y Chiarn mee ’leeideil gys thie braaraghyn my vainshtyr. 28As roie yn ven aeg, as dinsh ee ny reddyn shoh da lught-thie e mayrey.

29As va braar ec Rebekah, enmyssit Laban: as roie Laban magh gys y dooinney, ec y chibbyr. 30As haink eh gy-kione, tra honnick eh yn jewel cleayshey, as ny braceletyn er laueyn e huyr, as tra cheayll eh goan Rebekah e huyr, gra, Myr shoh loayr y dooinney rhym; dy daink eh gys y dooinney, as cur-my-ner, v’eh ny hassoo liorish ny camelyn ec y chibbyr. 31As dooyrt eh rish, Tar stiagh uss vannit jeh’n Chiarn; cre’n-oyr t’ou dy hassoo mooie? Son ta mee er chiartaghey yn thie, as room son ny camelyn.

32As haink y dooinney stiagh, as ghow eh ny greïnyn jeh ny camelyn, as hug eh coonlagh as foddyr daue, as ushtey dy niee ny cassyn echey hene, as cassyn ny deiney va mârish. 33As va bee soit roish: agh dooyrt eh, Cha jean-ym gee, derrey ta mee er n’insh my eilkin: as dooyrt Laban rish, Gow lesh. 34As dooyrt eh, Ta mish stiurt Abraham. 35As ta’n Chiarn dy mooar er vannaghey my vainshtyr; as t’eh er jeet dy ve pooaral: as t’eh er choyrt da shioltaneyn, as shellooyn, as argid, as airh, fir-vooinjerey, as sharvaantyn, camelyn, as assylyn. 36As ren Sarah ben my vainshtyr mac y ymmyrkey da my vainshtyr tra v’ee shenn: as dasyn t’eh er choyrt ooilley ny t’echey. 37As hug my vainshtyr orrym breearrey, gra, Cha gow oo ben da my vac, jeh inneenyn ny Canaaniteyn, ’sy cheer oc ta mee cummal. 38Agh hed oo gys thie my ayrey, as gys my chynney, as gowee oo ben da my vac. 39As dooyrt mee rish my vainshtyr, Foddee nagh jig y ven mârym. 40As dooyrt eshyn rhym, Nee’n Chiarn, ta mee dy hirveish, e ainle y choyrt mayrt, as dty raad y vannaghey; as gowee oo ben da my vac jeh my chynney hene, as jeh thie my ayrey. 41Eisht bee oo feayshlit veih my vreearrey, tra hig oo gys my chynney; as mannagh der ad unnane dhyt, bee oo feayshlit veih my vreearrey. 42As haink mee jiu gys y chibbyr, as dooyrt mee, O Hiarn, Jee my vainshtyr Abraham, my t’ou nish bannaghey ny ta mee dy ghoaill ayns laue: 43Cur-my-ner ta mee my hassoo liorish y chibbyr, as hig eh gy-kione, tra hig y ven aeg magh dy hayrn ushtey, as dy jir-ym r’ee, Cur dou, ta mee guee ort, bolgym dy ushtey ass dty haagh dy iu. 44As dy jir ish rhym’s, Iu hene, as nee’m myrgeddin tayrn ushtey da dty chamelyn; lhig jeeish ve yn ven, ta’n Chiarn er reih da mac my vainshtyr. 45As roish my row mee erreish loayrt ayns my chree, cur-my-ner, haink Rebekah magh, as e saagh er e geaylin: as hie ee sheese gys y chibbyr, as hayrn ee ushtey: as dooyrt mish r’ee, Lhig dou giu, ta mee guee ort. 46As ren ee siyr, as lhig ee sheese e saagh jeh e geaylin, as dooyrt ee, Iu, as ver-yms ushtey da dty chamelyn myrgeddin: myr shen diu mee, as hug ee myrgeddin ushtey da ny camelyn. 47As dênee mee j’ee, as dooyrt mee, Quoi da inneen oo? As dreggyr ee, Inneen Vethuel, mac Nahor, eh ren Milcah y ymmyrkey da: as hug mee yn jewel cleayshey er e kione, as ny braceletyn er e laueyn. 48As chroym mee sheese my chione, as hug mee ooashley da’n Chiarn, as vannee mee Chiarn Jee my vainshtyr Abraham, v’er m’y leeideil er y raad cair, dy ghoaill inneen braarey my vainshtyr son ben da e vac. 49As nish, my nee shiu dellal dy dooie, as dy firrinagh rish my vainshtyr, insh-jee dou: as mannagh jean shiu, insh-jee dou myrgeddin; dy voddym chyndaa gys y laue yesh, ny gys y laue hoshtal. 50Eisht dreggyr Laban as Bethuel, as dooyrt ad, Ta’n chooish shoh veih’n Chiarn: cha vod mayd gra n’oï. 51Cur-my-ner ta Rebekah kiongoyrt rhyt, gow ee mayrt, as lhig ee ve ben mac dty vainshtyr, myr ta’n Chiarn er ghra. 52As haink eh gy-kione, tra va stiurt Abraham er chlashtyn ny goan oc, dy dug eh ooashley da’n Chiarn, croymmey eh hene sheese gys y thalloo. 53As hug y stiurt magh jewellyn argid, as jewellyn airh, as garmadyn, as livrey eh ad da Rebekah: hug eh myrgeddin da’n vraar as y voir eck cowraghyn costal. 54As ren ad gee as giu, eh-hene as ny deiney va mârish, as duirree ad fud-ny-hoie; as dirree ad ’sy voghrey, as dooyrt eh, Lhig dou goll gys my vainshtyr. 55As dooyrt y braar as y voir eck rish, Lhig da’n ven aeg fuirriaght mârin tammylt sodjey, yn chooid sloo jeih laa; lurg shen hed ee mêriu. 56As dooyrt eh roo, Ny jean-jee m’y chumrail, fakin dy vel y Chiarn er choyrt speedeil mie da my chooish: lhig-jee yn raad dou, dy voddym goll gys thie my vainshtyr. 57As dooyrt ad, Eïe mayd er y ven aeg, as hee mayd cre jir ee hene. 58As deïe ad er Rebekah, as dooyrt ad r’ee, Jeu uss marish y dooinney shoh? As dreggyr ee, Hem mârish. 59As hug ad Rebekah nyn shuyr ersooyl, as e boandyr, as stiurt Abraham, as e gheiney. 60As vannee ad Rebekah as dooyrt ad r’ee, T’ ou uss nyn shuyr; bee uss moir thousaneyn dy villaghyn, as lhig da dty luight possession y ghoaill jeh giat nyn noidyn.

61As hrog Rebekah as e mraane aegey orroo, as varkee ad er camelyn, as hie ad marish y dooinney: as ghow stiurt Abraham Rebekah, as jimmee eh roish. 62As haink Isaac veih raad chibbyr Lahai-roi, son v’eh cummal ayns y cheer my-yiass. 63As hie Isaac magh ’syn astyr gys y vagher, dy choyrt raad da smooinaghtyn crauee: as hrog eh seose e hooillyn, as Cur-my-ner, honnick eh ny camelyn cheet. 64As hrog Rebekah seose e sooillyn, as tra honnick ee Isaac, ren ee tarlheim jeh’n chamel. 65Son dooyrt ee rish y stiurt; Quoi yn dooinney shoh ta ayns y vagher shooyl nyn guail? As dooyrt y stiurt, My vainshtyr t’ayn: shen-y-fa ghow ee breid, as choodee ee e eddin. 66As dinsh y stiurt da Isaac ooilley ny v’eh er n’yannoo. 67As hug Isaac lesh ee gys cabbane Sarah e voir, as ghow eh Rebekah, as v’ee yn ven echey; as v’eh graihagh urree: as va Isaac er ny gherjaghey lurg baase e vayrey.