CAB. XXV

1Lurg shoh ghow Abraham ben elley, as va’n ennym eck Keturah. 2As ren ee gymmyrkey da Zimran, as Jokshan, as Medan, as Midian, as Ishbak, as Shuah. 3As hooar Jokshan Sheba, as Dedan. As mec Dedan, v’ad Asshurim, as Letushim, as Leummim. 4As mec Midian v’ad Ephah, as Epher, as Hanoch, as Abidah, as Eldaah: v’ad shoh ooilley cloan Keturah:

5As daag Abraham ooilley ny v’echey da Isaac. 6Agh da mec ny co-lhiabbee v’ec Abraham, hug eh giootyn, as hug eh ad ersooyl veih Isaac e vac (choud as v’eh foast bio) lesh y shiar, gys cheer y shiar. 7As ad shoh bleeantyn yn eash ren Abraham y cheau, hoght-feed as queig bleeaney jeig. 8Eisht phaart Abraham, as hooar eh baase ayns shenn eash lowal, ny henn ghooinney, as lane dy vleeantyn: as v’eh er ny haglym gys e ayraghyn. 9As ren ny mec echey Isaac as Ishmael eh y oanluckey, ayns lhiaght Machpelah, ayns magher Ephron mac Zohar yn Hittite, ta liorish Mamre; 10’Sy vagher, ren Abraham y chionnaghey veih mec Heth: ayns shen va Abraham as Sarah e ven er nyn oanluckey.

11As haink eh gy-kione lurg baase Abraham, dy ren Jee bannaghey Isaac e vac, as ren Isaac cummal liorish chibbyr Lahai-roi.

12Nish ad shoh sheelogheyn Ishmael, mac Abraham, eh ren Hagar yn Egyptian, inney-veyl Sarah, y ymmyrkey da Abraham. 13As ad shoh enmyn mec Ishmael liorish nyn enmyn, cordail rish ny sheelogheyn oc: mac by-hinney Ishmael, va Nebajoth: as Kedar as Abdeel, as Mibsam. 14As Mishma, as Dumah, as Massa, 15Hadar as Tema, Jetur, Naphish, as Kedemah. 16Ad shoh mec Ishmael, as shoh nyn enmyn, lurg ny baljyn, as ny cashtallyn oc; daa phrince jeig, cordail rish ny ashoonyn oc. 17As ad shoh bleeantyn eash Ishmael, shey-feed bleïn as shiaght-jeig: as livrey eh seose e annym, as hooar eh baase, as v’eh er ny haglym gys e ayraghyn. 18As va’n cummal oc veih Havilah gys Shur, ta shen, er slyst Egypt, myr t’ou goll lesh Assyria: as hooar eh baase mastey ooilley e vraaraghyn.

19As ad shoh sheelogheyn Isaac, mac Abraham: hooar Abraham Isaac. 20As va Isaac da-eed bleïn dy eash, tra phoose eh Rebekah, inneen Vethuel yn Syrian jeh Padan-aram, shuyr Laban y Syrian. 21As ren Isaac aghin gys y Chiarn son e ven, er-yn-oyr dy row ee gennish: as hug y Chiarn clashtyn da, as ren Rebekah e ven giennaghtyn. 22As ren ny oikanyn gleck cheu-sthie j’ee; as dooyrt ee, My te myr shen, kys ta mee er yn aght shoh? As hie ee rhymbee dy vriaght jeh’n Chiarn. 23As dreggyr y Chiarn ee, Ta daa ashoon ayns dty vreïn, as bee daa horch dy leih er nyn scarrey veih dty veeghyn: as bee yn derrey phobble ny s’troshey na yn pobble elley: as nee yn fer shinney shirveish yn fer saa.

24As myr va’n traa eck er jeet, dy ve er ny livrey, cur-my-ner, va daa lhiannoo er ny ymmyrkey. 25As haink y chied er magh ruy ooilley harrish, myr garmad geyshteenagh; as denmys ad eh Esau. 26As eisht ruggyr e vraar, as ghow e laue greme er boyn Esau; as v’eh enmyssit Jacob. As va Isaac three-feed bleïn dy eash, tra hug Rebekah ad son y theihll. 27As daase ny guillin as va Esau ny helgeyr gastey, dooinney magheragh: agh va Jacob ny ghooinney sockeragh cummal ayns cabbaneyn. 28As bynney lesh Isaac Esau, son dy d’ee eh jeh’n feïeys v’eh dy hayrtyn: agh bynney lesh Rebekah Jacob.

29As vroie Jacob poddash: as haink Esau veih’n vagher, as v’eh faiynt. 30As dooyrt Esau rish Jacob, Cur dou, ta mee guee ort, paart jeh’n bee jiarg shen; son ta mee faiynt: shen-y-fa v’eh enmyssit Edom. 31As dooyrt Jacob, Creck rhym jiu dty eiraght. 32As dreggyr Esau, Cur-my-ner, ta mee raad y vaaish; as cre sheeagh dou yn eiraght shoh? 33As dooyrt Jacob, Jean breearrey dou jiu: as ren eh breearrey da: as chreck eh e eiraght rish Jacob. 34Eisht hug Jacob da Esau arran as poddash dy lossreeyn; as ren eh gee, as giu, as hrog eh er, as jimmee eh roish: myr shoh, cha beg dy scansh ren Esau y hoiaghey jeh e eiraght.