CAB. XXVI

1As va genney ’sy cheer, lurg y chied ghenney v’ayns laghyn Abraham: as hie Isaac gys Abimelech ree ny Philistinee, gys Gerar. 2As hoilshee yn Chiarn eh-hene da, as dooyrt eh, Ny gow sheese gys Egypt, cum ’sy cheer jeeagh-ym dhyt. 3Cum ’sy cheer shoh, as beem’s mayrt, as nee’m uss y vannaghey: son dhyt’s, as da dty luight ver-yms ooilley ny cheeraghyn shoh, as neem’s cooilleeney yn breearrey, loo mee da Abraham dty ayr. 4As ver-yms er dty luight dy vishaghey myr rollageyn yn aer, as ver-ym da dty luight ooilley ny cheeraghyn shoh; as ayns dty luight vees ooilley ashoonyn y theihll er nyn mannaghey: 5Er-yn-oyr dy dug Abraham biallys da my choraa, as dy dreill eh my harey, my annaghyn, my lattyssyn, as my leighyn.

6As ghow Isaac e chummal ayns Gerar. 7As dênee deiney yn ynnyd jeh mychione e ven: as dooyrt eh, She my huyr ee: son va aggle er dy ghra, She my ven ee, er-aggle, dooyrt eh, dy jinnagh deiney yn ynnyd m’y varroo, er graih Rebekah, son dy row ee aalin dy yeeaghyn urree. 8As haink eh gy-kione, erreish da ve ayns shen son foddey dy hraa, dy yeeagh Abimelech ree ny Philistinee magh er uinniag, as honnick eh, as cur-my-ner, va Isaac myr dy beagh eh sooree er Rebekah e ven. 9As deïe Abimelech er Isaac, as dooyrt eh, Cur-my-ner, son shickyrys she dty ven ee; as kys dooyrt uss, She my huyr ee? As dooyrt Isaac rish, Er-yn-oyr dy row aggle orrym, dy jinnagh ad mish dy baase er y choontey eck’s. 10As dooyrt Abimelech, Cre shoh t’ou er n’yannoo rooin? oddagh fer jeh’n phobble trooid taghyrt, ve er lhie marish dty ven, as uss er hayrn kerraghey orrin. 11As hug Abimelech ooilley e phobble fo harey, gra, Eshyn vennys rish yn dooinney shoh, ny rish e ven, bee eh son shickyrys er ny choyrt gy-baase. 12Eisht chuirr Isaac ’sy cheer shen, as vuinn eh ’sy vleïn cheddin keead-filley: as vannee yn Chiarn eh. 13As daase yn dooinney berchagh, as hie eh er e hoshiaght (’sy theihll) as ren eh bishaghey, derrey haink eh dy ve feer niartal. 14Son v’echey niart shioltaneyn as shellooyn, as mooarane mooinjer, as ren ny Philistinee troo mysh. 15Son ooilley ny chibbraghyn va sharvaantyn e ayrey er chleiy ayns laghyn Abraham e ayr, va ny Philistinee er n’yeigh seose, as er lhieeney ad lesh thalloo. 16As dooyrt Abimelech rish Isaac, Immee voïn, son t’ou uss foddey s’pooaral na shinyn.

17As jimmee Isaac veih shen, as hoie eh e chabbane ayns coan Gerar, as chum eh ayns shen. 18As doshil Isaac reesht ny chibbraghyn ushtey, v’ad er chleiy ayns laghyn Abraham e ayr: son va ny Philistinee er n’yeigh ad, lurg baase Abraham: as hug eh ny enmyn cheddin orroo va e ayr er choyrt orroo. 19As chleiy sharvaantyn Isaac ’sy choan, as hooar ad ayns shen chibbyr dy ushtey-farrane. 20As va focklyn eddyr bochillyn Gerar as bochillyn Isaac, gra, Lhianyn yn ushtey: as denmys eh yn chibbyr Esek, er-yn-oyr dy ren ad streeu rish. 21As chleiy ad chibbyr elley, as streeu ad son shen neesht: as denmys eh eh Sitnah. 22As scugh eh veih shen, as chleiy eh chibbyr elley; as mysh shen cha row streeu erbee; as denmys eh eh Rehoboth; as dooyrt eh, Son nish ta’n Chiarn er chur reamys dooin, as nee mayd bishaghey ’sy cheer. 23As hie eh seose veih shen gys Beer-sheba. 24As hoilshee’n Chiarn eh-hene da ’syn oie cheddin, as dooyrt eh, Mish Jee Abraham dty ayrey: ny gow aggle, son ta mish lhiat, as nee’m oo y vannaghey, as bishaghey dty luight er graih my harvaant Abraham. 25As hrog eh altar ayns shen, as deïe eh er ennym y Chiarn, as hoie eh e chabbane ayns shen; as shen y raad ren sharvaantyn Isaac chibbyr y chleiy. 26Eisht hie Abimelech huggey veih Gerar, as Ahuzzath fer jeh e chaarjyn, as Phichol ard-chaptan e heshaght-chaggee. 27As dooyrt Isaac roo, Cre’n-fa ta shiu er jeet hym’s, fakin dy vel dwoaie eu orrym, as er n’eiyrt mee ersooyl veue. 28As dooyrt adsyn, Honnick shin son shickyrys, dy row yn Chiarn mayrt: as dooyrt shin, Lhig da nish breearrey ve eddyr shin, dy feer eddyr shinyn as uss, as lhig dooin conaant y yannoo rhyt; 29Nagh jean oo aggair erbee dooinyn, myr nagh vel shinyn er choyrt eïe ort’s, as myr nagh vel shin er n’yannoo nhee erbee rhyt agh mie, as er choyrt oo ersooyl ayns shee: t’ou uss nish fer bannit y Chiarn. 30As ren eh gien daue, as ren ad gee as giu. 31As dirree ad feer voghey, as ren ad breearrey eddyr ad: as lhig Isaac y raad daue, as jimmee ad voish ayns shee. 32As haink eh gy-kione yn laa cheddin, dy daink sharvaantyn Isaac, as dinsh ad da my chione y chibbyr v’ad er chleiy; as dooyrt ad rish, Ta shin er gheddyn ushtey. 33As ren eh genmys eh Sheba: shen-y-fa ta ennym yn ard-valley shen Beer-sheba gys y laa t’ayn jiu. 34As va Esau da-eed bleïn dy eash, tra phoose eh Judith, inneen Beeri yn Hittite, as Bashemath inneen Elon yn Hittite: 35V’ad shoh oyr trimshey da Isaac, as da Rebekah.