CAB. XXVII

1As haink eh gy-kione, tra va Isaac shenn, as e hoilshey moal, myr shen nagh row eh fakin, dy deïe eh er Esau e vac shinney, as dooyrt eh rish, My vac, As dreggyr eh, Cur-my-ner, ta mee ayns shoh. 2As dooyrt eh, Cur-my-ner nish ta mee shenn, cha vel gys aym er laa my vaaish. 3Gow nish, er-y-fa shen, ta mee guee ort, dty wappinyn, dty whiver as dty vhow, as immee royd magh gys y vagher, as taare feïeys er my hon; 4As aarlee bee blaystal dou, lheid as shinney lhiam, as cur roym eh, dy voddym gee; dy vod m’annym uss y vannaghey, my voym baase. 5As cheayll Rebekah, tra loayr Isaac rish Esau e vac. As hie Esau gys y vagher dy helg son feïeys, as dy chur lesh eh. 6As loayr Rebekah rish Jacob e mac, gra, Cur-my-ner, cheayll mee dty ayr loayrt rish Esau dty vraar, gra, 7Cur lhiat feïeys hym, as jean bee blaystal dou, dy voddym’s gee, as uss y vannaghey kiongoyrt rish y Chiarn, roish my vaase. 8Nish, er-y-fa shen, my vac, cur biallys da my choraa, myr ta mee cur currym ort. 9Immee royd nish gys y chioltane, as cur lhiat hym’s veih shen daa vannan mie jeh ny goair; as neem’s jeu bee blaystal son dty ayr lheid as shynney lesh. 10As ver oo lhiat eh gys dty ayr, dy vod eh gee, as uss y vannaghey roish e vaase. 11As dooyrt Jacob rish Rebekah e voir; Cur-my-ner, ta Esau my vraar ny ghooinney geyshteenagh, as ta mish my ghooinney lhome. 12Foddee dy jean my ayr m’y loaghtey, as dy ghow eh mee son molteyr; as ver-ym lhiam mollaght orrym pene, as cha nee bannaght. 13As dooyrt e voir rish, Orrym’s dy row dty vollaght, my vac: agh jean er my raa, as lhiat hym ad. 14As hie eh roish, as hug eh lesh ad gys e voir: as daarlee e voir bee blaystal, lheid as bynney lesh e ayr. 15As ghow Rebekah coamrey feailley e mac shinney Esau, v’ee dy hashtey: as hug ee ad er Jacob e mac saa: 16As hug ee craitnyn ny mannanyn, er e laueyn, as er lhoamid e wannal. 17As hug ee yn bee blaystal, as yn arran v’ee er n’aarlaghey, ayns laue e mac Jacob.

18As haink eh gys e ayr, as dooyrt eh, M’ayr: as dooyrt eh, Ta mish ayns shoh; quoi uss my vac? 19As dooyrt Jacob rish e ayr, Mish Esau dty vac shinney; ta mee er n’yannoo myr doardee oo dou: irree, ta mee guee ort, soie, as ee jeh my feïeys, dy vod dty annym mish y vannaghey. 20As dooyrt Isaac rish e vac, Kys dy vel oo er gheddyn eh cha leah my vac? As dooyrt eh, Er-yn-oyr dy dug y Chiarn dty Yee my raad eh. 21As dooyrt Isaac rish Jacob, Tar er-gerrey, ta mee guee ort, dy voddym dty loaghtey, my vac, nee oo my eer mac Esau, mannagh nee. 22As hie Jacob er-gerrey da Isaac e ayr, as loaght eh eh, as dooyrt eh; Ta’n coraa, coraa Yacob, agh ny laueyn, laueyn Esau. 23As cha dug eh enney er, er-yn-oyr dy row e laueyn geyshteenagh, myr laueyn e vraar Esau: myr shen hug eh yn bannaght da. 24As dooyrt eh, Nee uss dy jarroo my vac Esau? As dooyrt eh, Mish eh. 25As dooyrt eh, Soie roym eh, as ee-yms jeh feïeys my vac, dy vod m’annym uss y vannaghey: as hug eh roish eh, as ren eh gee: as hug eh lesh feeyn huggey, as ren eh giu. 26As dooyrt e ayr Isaac rish, Tar er-gerrey nish, as lhig dou dty phaagey, my vac. 27As haink eh er-gerrey, as phaag eh eh: as dennee eh soar e choamrey, as vannee eh eh, as dooyrt eh, Cur-my-ner, ta soar my vac myr soar magher, ta’n Chiarn er vannaghey. 28Shen-y-fa, dy der Jee dhyt jeh druight yn aer, as meeaylys y thallooin, as palchey arran as feeyn. 29Lhig da pobble uss y hirveish, as ashoonyn croymmey hood; bee uss chiarn harrish dty vraaraghyn, as lhig mec dty vayrey biallys ’chur dhyt: bee mollaght ersyn ta guee mollaght ort, as bee bannaght ersyn ta dy dty vannaghey.

30As haink eh gy-kione, erreish da Isaac v’er choyrt e vannaght da Jacob, as s’coan va Jacob er n’immeeaght veih fenish Isaac e ayr, dy daink Esau e vraar stiagh veih e helg. 31As v’eshyn myrgeddin er n’aarlaghey bee blaystal, as er choyrt lesh eh gys e ayr; as dooyrt eh rish e ayr, Lhig da m’ayr girree, as gee jeh feïeys e vac, dy vod dty annym mish y vannaghey. 32As dooyrt Isaac e ayr rish, Quoi oo hene? as dooyrt eh, Mish dty vac, eer dty vac shinney Esau. 33As huitt Isaac er-creau erskyn towse, as dooyrt eh, Quoi, cre vel eh shen ta er ghoaill feïeys, as er chur lesh hym eh, as ta mee er n’ee jeh ooilley, my daink oo, as ta mee er vannaghey eh? As bannit dy jarroo vees eh. 34As tra cheayll Esau goan e ayr, cheayn eh lesh ard-choraa, as erskyn-towse sharroo: as dooyrt eh rish e ayr, Bannee mish, dy jarroo mish myrgeddin, O my ayr. 35As dooyrt eh, Haink dty vraar dy croutagh, as t’eh er ghoaill ersooyl dty vannaght. 36As dooyrt eh, Nee far-ennym da Jacob? Son t’eh er chleiy foym yn daa cheayrt shoh: ghow eh ersooyl m’eiraght; as cur-my-ner nish t’eh er ghoaill ersooyl my vannaght. As dooyrt eh, Nagh vel bannaght sodjey ayd my chour’s? 37As dreggyr Isaac, as dooyrt eh rish Esau, Cur-my-ner, ta mee er n’yannoo eh dty Hiarn, as ta mee er choyrt da ooilley e vraaraghyn dy hirveish eh; as lesh arroo as feeyn, ta mee er n’yannoo magh eh: as cre nee’m nish er dty hon’s, my vac? 38As dooyrt Esau rish e ayr, Vel ayd agh un vannaght, my ayr? bannee mish, dy jarroo mish, myrgeddin, O my ayr; As hrog Esau seose e choraa, as cheayn eh. 39As dreggyr Isaac e ayr, as dooyrt eh rish, Cur-my-ner, bee yn beaghey ayd’s er meeaylys y thallooin, as jeh druight Niau veih’n yrjid. 40As liorish dty chliwe nee oo beaghey, as nee oo shirveish dty vraar: as hig eh gy-kione, tra vees oo er chosney’n varriaght, dy jean oo yn whing echeysyn y vrishey voish dty wannal.

41As va dwoaie ec Esau er Jacob, kyndagh rish y bannaght, lesh va e ayr er vannaghey eh: as dooyrt Esau ayns e chree, Ta laghyn dobberan son my ayr er-gerrey, eisht marr-ym my vraar Jacob. 42As va ny goan shoh loayr Esau yn mac shinney eck er n’insh da Rebekah. As hug ee fys, as deïe ee er Jacob e mac saa, as dooyrt ee rish, Cur-my-ner, ta dty vraar Esau gerjagh eh-hene my-dty-chione’s, kiarail dy dty varroo. 43Nish er-y-fa shen, my vac, gow my choyrle, as trog ort, cosne royd gys Laban my vraar, gys Haran 44As fuirree mârish son earish yiare, derrey vees eulys dty vraar er ny chastey. 45Derrey vees corree dty vraar er ny hyndaa ersooyl voïd; as dy jarrood eh ny t’ou er n’yannoo rish: eisht ver-yms fys, as ver-ym lhiam oo veih shen. Cre’n-fa veign er my roostey jeu nyn-neesht ayns un laa? 46As dooyrt Rebekah rish Isaac, Ta mee skee jeh my vioys kyndagh rish inneenyn Heth: my ghoys Jacob ben jeh inneenyn Heth, lheid as t’ad shoh inneenyn y cheer, cre sheeagh dou my vioys?