CAB. XXIX

1Eisht hie Jacob er e yurnah, as haink eh gys cheer pobble y shiar. 2As yeeagh eh, as honnick eh chibbyr ’sy vagher, as cur-my-ner, va three shioltaneyn dy chirree nyn lhie liorish: son veih’n chibbyr shen hug ad lhieu ushtey gys ny shioltaneyn: as va clagh vooar er beeal y chibbyr. 3As gys shen va ooilley ny shioltaneyn er nyn jaglym, as scugh ny bochillyn yn chlagh veih beeal y chibbyr, as hug ad ushtey da ny kirree, as hug ad y chlagh reesht er beeal y chibbyr, ayns e ynnyd hene. 4As dooyrt Jacob roo, My vraaraghyn, cre veih ta shiu? As dooyrt ad, Ta shin veih Haran. 5As dooyrt eh roo, Nione diu Laban, mac Nahor? As dooyrt ad, Shione dooin eh. 6As dooyrt eh roo, Vel eh dy mie? As dooyrt ad, T’eh dy mie: as cur-my-ner, ta Rachel e inneen cheet lesh ny kirree. 7As dooyrt eh, Cur-my-ner, cha vel eh foast agh y vun-laa, chamoo te traa yn maase y haglym cooidjagh: er son ny kirree, cur-jee ushtey daue, as jean-jee fassaghey ad. 8As dooyrt ad, Cha jig shen lhien dy yannoo, derrey vees ooilley ny shioltaneyn er nyn jaglym cooidjagh, as derrey hroggys ad y chlagh jeh beeal y chibbyr: eisht ta shin cur ny kirree gys ushtey.

9As choud as ve foast loayrt roo, haink Rachel lesh kirree e ayrey: son fo’n chiarail eck v’ad. 10As haink eh gy-kione, tra honnick Jacob Rachel, inneen Laban braar e vayrey, as kirree Laban braar e vayrey, dy jagh Jacob er-gerrey, as hyndaa eh yn chlagh veih beeal y chibbyr, as hug eh ushtey da shioltane Laban braar e vayrey. 11As ren Jacob Rachel y phaagey as hrog eh seose e choraa, as cheayn eh. 12As dinsh Jacob da Rachel, dy row eshyn dooinney-mooinjerey yn ayr eck, as dy nee mac Rebekah v’eh: as roie ish, as dinsh ee shoh da e ayr. 13As haink eh gy-kione, tra cheayll Laban imraa jeh Jacob mac e hayrey, dy roie eh ny whail, as ghow eh ayns e roihaghyn eh, as phaag eh eh, as hug eh lesh eh gys e hie: as dinsh eh da Laban ooilley ny reddyn shoh. 14As dooyrt Laban rish, Son shickyrys, t’ou my chraue as my eill: as duirree eh mârish mee dy hraa.

15As dooyrt Laban rish Jacob, Nee er-yn-oyr dy vel oo my ghooinney-mooinjerey, dy jinnagh oo son shen mish y hirveish nastee? Insh dou, cre vees dt’aill? 16As va daa inneen ec Laban: va ennym yn unnane shinney Leah, as ennym yn unnane saa Rachel. 17Va sooillyn annoon ec Leah, agh va Rachel bwaagh as aalin. 18As va Jacob ayns graih rish Rachel; as dooyrt eh, Shirveish-ym oo shiaght bleeaney son Rachel dty inneen saa. 19As dooyrt Laban, Te ny share, dy der-ym dhyt’s ee, na dy choyrt ee da dooinney elley: fuirree mârym. 20As ren Jacob shirveish shiaght bleeaney son Rachel: as cha row ad da agh myr earish yiare, son y ghraih v’echey urree.

21As dooyrt Jacob rish Laban, Cur dou my ven, (son ta my hraa cooilleenit) dy vod ee ve my ven-heshee. 22As chuir Laban cooidjagh ooilley deiney yn ynnyd, as ren eh bannish. 23As haink eh gy-kione ’syn astyr, dy ghow eh Leah e inneen, as hug eh lesh ee huggey: as hie ad cooidjagh. 24As hug Laban da e inneen Leah, Zilpah e inney-veyl, dy hirveish urree. 25As haink eh gy-kione, ’sy voghrey, cur-my-ner, dy nee Leah v’ayn: as dooyrt eh rish Laban, Cre shoh t’ou er n’yannoo rhym? nagh nee son Rachel hirveish mee oo? cre’n-fa eisht t’ou er my volley? 26As dooyrt Laban, Cha nee cliaghtey ny cheerey eh, dy choyrt yn unnane saa roish yn unnane shinney. 27Jean magh shiaghtin ny banshey, as ver mayd dhyt ee shoh myrgeddin, son y chirveish nee uss dou shiaght bleeaney sodjey. 28As ren Jacob shen, as chooilleen eh yn chiaghtin mâree: As hug eh Rachel e inneen da son ben myrgeddin. 29As hug Laban da Rachel e inneen, Bilhah e inney-veyl, dy hirveish urree. 30As ren eh Rachel myrgeddin y phoosey, as va ny smoo dy ghraih echey er Rachel, na v’echey er Leah: as hirveish eh foast shiaght bleeaney elley.

31As tra honnick y Chiarn, nagh row wheesh soit jeh Leah, hug eh pooar j’ee dy yiennaghtyn: agh va Rachel gennish. 32As ren Leah gientyn as gymmyrkey mac as denmys ee eh Reuben: son dooyrt ee, Son shickyrys ta’n Chiarn er yeeaghyn er my heaghyn; nish er-y-fa shen, ver my heshey graih dou. 33As ren ee gientyn reesht, as gymmyrkey mac, as dooyrt ee, Er-yn-oyr dy vel y Chiarn er chlashtyn dy row beg er ny hoiaghey jee’m, shen-y-fa t’eh er choyrt dou yn mac shoh myrgeddin: as denmys ee eh Simeon. 34As ren ee gientyn reesht, as gymmyrkey mac, as dooyrt ee, Nee cree my heshey nish lhiantyn hym, er-y-fa dy vel mee er n’ymmyrkey da three mec: shen-y-fa v’eh enmyssit Levi. 35As ren ee gientyn reesht, as gymmyrkey mac, as dooyrt ee, Nish ver-ym moylley da’n Chiarn: shen-y-fa denmys ee eh Judah, as scuirr ee veih gymmyrkey.