CAB. XXXI

1As cheayll eh goan mec Laban, gra, Ta Jacob er ghoaill ersooyl ooilley ny va lesh nyn ayr, as jeh cooid nyn ayrey t’eh er gheddyn ooilley yn verchys shoh. 2As hug Jacob tastey da eddin Laban, as cur-my-ner, cha row eh lesh myr ve roïe. 3As dooyrt y Chiarn rish Jacob, Chyndaa reesht gys cheer dty ayraghyn, as gys dty chynney: as bee’m mayrt. 4As hug Jacob fys, as deïe eh er Rachel as Leah gys e hioltaneyn. 5As dooyrt eh roo, Ta mee cur tastey da eddin nyn ayrey, nagh vel eh lhiam myr bollagh eh: agh ta Jee my ayrey er ve mârym. 6As ta fys euish, dy nee lesh rere my phooar ta mish er hirveish nyn ayr. 7As ta’n ayr eu er my volley, as er chaghlaa my aill dy mennick: agh cha lhig Jee da aggair ’yannoo dou. 8My she shoh va’n bargane, Bee yn maase breckey dt’aill’s; eisht va ooilley yn ingan breck: as my dooyrt eh myr shoh, Bee yn vooinjer schimmeigagh dty aill; eisht ren yn maase ooilley brey ingan schimmeigagh. 9Myr shoh ta Jee er ghoaill ersooyl maase nyn ayrey, as er choyrt ad dooys. 10As haink eh gy-kione, ec y traa va’n maase gientyn, dy hrog mee seose my hooillyn, as honnick mee ayns dreamal, as cur-my-ner, va ny reaghyn va lheim er y maase, schimmeigagh, breck as spottagh. 11As loayr ainle Yee rhym ayns dreamal, gra, Jacob: as dooyrt mish, Ta mee ayns shoh. 12As dooyrt eh, Trog seose nish dty hooillyn, as jeeagh, ta ooilley ny reaghyn ta lheim er y maase schimmeigagh, breck as spottagh: son ta mish er vakin kys ta Laban er dty hirveish. 13Mish Jee Veth-el, raad ren oo ooilaghey yn phillar, as raad ren oo breearrey dou: nish trog ort, cosne royd magh ass y cheer shoh, as chyndaa gys cheer dty chynney. 14As dreggyr Rachel as Leah, as dooyrt ad rish, Vel foast toghyr ny eiraght erbee sodjey er nyn son ain ayns thie nyn ayrey? 15Nagh vel eh er ghellal rooin myr joarreeyn? son t’eh er chreck shin, as neesht dy bollagh er roostey shin jeh ooilley nyn argid. 16Son ooilley yn verchys ta Jee er ghoaill veih nyn ayr, te cair dooinyn, as da nyn gloan: nish eisht, jean uss, cre-erbee ta Jee er ghra rhyt.

17Eisht hrog Jacob er, as hoie eh e vec as e vraane er camelyn. 18As hug eh lesh ersooyl ooilley e vaase, as ooilley e chooid v’eh er chosney, yn maase jeh’n chosney echey hene, v’eh er gheddyn ayns Padan-aram; dy gholl gys Isaac e ayr ayns cheer Chanaan. 19As hie Laban dy lommyrt e chirree: as va Rachel er ghoaill ec e laue hene ny jallooyn va lesh yn ayr eck. 20As chossyn Jacob ersooyl, gyn-yss da Laban yn Syrian, liorish nagh dinsh eh da dy row eh dy gholl roish. 21Myr shen chossyn eh roish lesh ooilley ny v’echey, as hrog eh er, as hie eh harrish yn awin, as hoie eh e eddin lesh slieau Ghilead. 22As ve er n’insh da Laban, er yn trass laa, dy row Jacob er gosney roish. 23As ghow eh e chaarjyn mârish; as hie eh er e eiyrt’s jurnah shiaght laa; as verr ad er ayns slieau Ghilead. 24As haink Jee gys Laban yn Syrian, ayns dreamal ’syn oie, as dooyrt eh rish, Jeeagh, nagh loayr oo rish Jacob edyr mie ny sie.

25Eisht verr Laban er Jacob. Nish va Jacob er hroggal e chabbane er y clieau: as hoie Laban marish e chaarjyn nyn gabbaneyn ayns slieau Ghilead. 26As dooyrt Laban rish Jacob, Cre shoh t’ou er n’yannoo, dy vel oo er gheid ersooyl gyn-yss dou, as er goyrt lhiat my inneenyn, myr cappeeyn goit lesh y chliwe. 27Cre’n-fa chossyn oo ersooyl dy follit, as dy gheid oo royd gyn-yss dou, as nagh dinsh oo dou, dy voddin ve er choyrt oo ersooyl lesh gennallys, as lesh arraneyn, lesh tabret as claasagh? 28As nagh vel oo er lhiggey dou bannaghey my vec as my inneenyn? t’ou ayns y chooish shoh, er n’yannoo dy ommijagh. 29Te ayns pooar my laue dy yannoo skielley dhyt: agh loayr Jee dt’ayrey rhym’s ’syn oie riyr, gra, Cur twoaie, nagh loayr oo rish Jacob edyr mie ny sie. 30As nish, ga dy r’ou shleeuit er goll royd, er-yn-oyr dy row foddeeaght jeean ort lurg thie dty ayrey, ny-yeih cre’n-fa t’ou er gheid ny jeeghyn aym. 31As dreggyr Jacob, as dooyrt eh rish Laban, Er-yn-oyr dy row aggle orrym; son dooyrt mish, Foddee dy ghoghe oo dty inneenyn voym er niart. 32Marish quoi-erbee t’ou feddyn ny jeeghyn ayd, ny lhig da ve bio: ayns fenish nyn mraaraghyn jean briaght ayns shoh, vel veg ny ta lhiat’s mârym’s, as gow eh: son ve gyn-yss da Jacob, dy row Rachel er gheid ad. 33As hie Laban stiagh ayns cabbane Yacob, as ayns cabbane Leah, as ayns cabbaneyn yn daa harvaant: agh cha dooar eh ad: eisht hie eh magh ass cabbane Leah, as hie eh ayns cabbane Rachel. 34Nish va Rachel er ghoaill ny jallooyn, as er cheiltyn ad ayns greinyn ny camelyn, as hoie ee orroo: as ronsee Laban ooilley yn chabbane, agh cha dooar eh ad. 35As dooyrt ee rish e ayr, Ny lhig da my hiarn ve corree rhym, nagh voddym girree seose kiongoyrt rhyt; son ta mee myr te dooghyssagh da mraane: as ren eh ronsaghey, agh cha dooar eh ny jallooyn.

36As va Jacob feer jymmoosagh; as hroidd eh rish Laban, as dreggyr Jacob, as dooyrt eh rish Laban, Cre ta my loght? cre’n olk ta mee er n’yannoo, dy vel oo er n’eiyrt orrym cha jeean? 37Nish dy vel oo er ronsaghey ooilley my chooid; cre t’ou er gheddyn jeh ooilley dty stoo-thie; soie magh eh ayns shoh kiongoyrt rish my chaarjyn, as dty chaarjyn hene, dy vod ad briwnys eddyr shin nyn-neesht. 38Ny feed bleïn shoh ta mee er ve mayrt, cha hilg dty chirree as dty ghoair nyn ingan, as reaghyn dty hioltane cha vel mee er n’ee. 39Shen ny va raipit liorish beishtyn, cha dug mee lhiam hood: ghow mee yn coayl orrym pene; mish hass roish edyr eh ve geiddit ’sy laa, ny geiddit ’syn oie. 40Shoh myr va my vea; ayns y laa, ren y chiass m’y choyrt naardey, as y rio, ’syn oie: as s’beg y chadley haink er my hooillyn. 41Shoh myr ta mee er ve feed bleïn ayns dty hie: hirveish mee oo kiare bleeaney jeig son dty ghaa inneen, as shey bleeaney son dty vaase; as t’ou er chaghlaa m’aill jeih keayrtyn. 42Er-be dy row Jee m’ayr, Jee Abraham, as aggle Isaac er ve mârym, son shickyrys v’ou nish er my choyrt ersooyl follym: ta Jee er vakin my heaghyn as laboraght my laueyn, as er chur oghsan dhyt riyr.

43As dreggyr Laban, as dooyrt eh rish Jacob, Ta ny inneenyn shoh ny inneenyn aym’s: as ta’n chloan shoh my chloan’s, as ta’n maase shoh yn maase aym’s; as ta ooilley ny t’ou fakin lhiam’s: as cre’n aggair oddym y yannoo yn laa t’ayn jiu roo shoh my inneenyn, ny rish nyn gloan t’ad er n’ymmyrkey? 44Tar uss er-y-fa shen nish, lhig dooin conaant y yannoo, mish as uss, as lhig da ve son feanish eddyr mish as uss. 45As ghow Jacob clagh, as hoie eh ee seose son pillar. 46As dooyrt Jacob rish e vraaraghyn, chaggil-jee claghyn; as ghow ad claghyn, as ren ad carnane, as d’ee ad ayns shen er y charnane. 47As ren Laban genmys eh Jegar-sahadutha: agh denmys Jacob eh Galeed. 48As dooyrt Laban, Ta’n carnane shoh feanish, eddyr mish as uss yn laa jiu. Shen-y-fa ve enmyssit Galeed, 49As Mizpah: son dooyrt eh, Dy jean y Chiarn arrey y reayll eddyr mish as uss, tra ta shin veih-my-cheilley. 50My ver uss drogh ghellal da my inneenyn, ny my nee uss mraane elley y ghoaill, marish my inneenyn, cha vel dooinney erbee eddyr shin; jeeagh royd, ta Jee feanish eddyr mish as uss. 51As dooyrt Laban rish Jacob, Cur-my-ner, yn carnane shoh, as cur-my-ner yn pillar shoh, ta mee er hoiaghey eddyr mish as uss. 52Dy bee yn carnane shoh ny eanish, as as dy bee yn pillar shoh ny eanish, nagh jig-yms harrish yn carnane shoh hood’s; as nagh jig uss harrish yn carnane as yn pillar shoh hym’s, son assee. 53Dy jean Jee Abraham as Jee Nahor, Jee nyn ayrey, briwnys eddyr shin. As loo Jacob liorish aggle e ayr Isaac. 54Eisht heb Jacob oural er yn chronk, as chuir eh e gheiney-mooinjer dy ghoaill beaghey, as ghow ad beaghey; as duirree ad fud-ny-hoie er y chronk. 55As dirree Laban seose dy moghey, as phaag eh e vec as e inneenyn, as vannee eh ad: as jimmee Laban roish, as hyndaa eh reesht gys e chummal hene.