CAB. XXXII

1As hie Jacob er e raad, as haink ainleyn Yee ny whail. 2As tra honnick Jacob ad, dooyrt eh, Shoh sheshaght-caggee Yee: as denmys eh yn ynnyd shen Mahanaim. 3As hug Jacob chaghteryn roish gys Esau e vraar, gys thalloo Seir, cheer Edom. 4As hug eh currym orroo, gra, Myr shoh nee shiu loayrt rish my hiarn Esau: Ta dty harvaant Jacob gra myr shoh: Ta mee er cheau my hraa marish Laban, as er vuirriaght ayns shen derrey nish: 5As ta dew as assylyn aym, shioltaneyn, as fir-vooinjerey, as sharvaantyn: as ta mee er chur fys dy insh da my hiarn, dy voddym foayr y gheddyn ayns dty hilley.

6As hyndaa ny chaghteryn gys Jacob, gra, Haink shin gys dty vraar Esau, as t’eshyn neesht cheet dty whail, as kiare cheead dooinney mârish. 7Eisht va Jacob dy mooar agglit as seaghnit: as rheynn eh yn sleih va mârish, as ny shioltaneyn as shellooyn, as ny camelyn, ayns daa heshaght; 8As dooyrt eh, My hig Esau gys y derrey heshaght, as tuittym orroo, eisht nee yn cheshaght elley ta faagit cosney roue.

9As dooyrt Jacob, O Yee m’ayr Abraham, as Yee m’ayr Isaac, yn Chiarn dooyrt rhym, Chyndaa reesht gys dty heer hene, as gys dty chynney, as neem’s dellal dy mie rhyt: 10Cha vel mish feeu jeh’n ayrn sloo jeh ooilley ny myghinyn, as jeh ooilley yn chenjallys ynrick t’ou er hoilshaghey da dty harvaant: son cha row aym agh my lorg tra hie mee harrish yn Jordan shoh, as nish ta mee er jeet dy ve daa heshaght vooar. 11Livrey mee, ta mee guee ort, veih laue my vraar, veih laue Esau: son ta mee goaill aggle roish, dy jig eh as dy stroie eh mish, as y voir marish y chloan. 12As dooyrt uss, Neem’s son shickyrys foayr y hoilshaghey dhyt, as jannoo dty luight myr genniagh y traie, nagh vod ve er ny earroo.

13As ghow eh aaght ayns shen yn oie cheddin, as ghow eh jeh shen, ny va fo e laue, gioot son Esau e vraar. 14Daa cheead goair woirryn, as feed goair fyrryn, daa cheead keyrrey, as feed rea. 15Jeih camelyn as feed bluight, marish ny sharree, da-eed booa, as jeih therriu, feed assyl bwoirryn, as jeih sharree. 16As livrey eh ad gys laue e harvaantyn, dy chooilley imman orroo hene; as dooyrt eh rish e harvaantyn, Gow-jee harrish roym’s, as lhig da tammylt ’ve eddyr imman as imman. 17As hug eh currym er yn fer toshee, gra, Tra nee Esau my vraar dty veeiteil, as briaght jeed, gra, Quoi lesh oo? as c’raad t’ou goll? as quoi lesh ad shoh ta royd? 18Eisht abbyr uss, T’ad lesh dty harvaant Jacob; She gioot eh, er ny choyrt gys my hiarn Esau: as cur-my-ner, t’eh myrgeddin cheet nyn yeï. 19As myr shoh hug eh currym er yn nah er, as y trass, as er ooilley ny deiyr ny immanyn, gra, Er yn aght shoh nee shiu loayrt rish Esau, tra nee shiu meeiteil eh. 20As abbyr-jee ny sodjey, Cur-my-ner, ta dty harvaant Jacob nyn yeï. Son dooyrt eh, Nee’m y veeinaghey eh lesh y gioot ta goll roym, as ny lurg shen hee-ym yn eddin echey: foddee dy jean eh soiagh jee’m. 21Myr shen va’n gioot er ny choyrt harrish roish: as ghow eh hene aaght yn oie shen ’sy cheshaght. 22As dirree eh seose yn oie shen, as ghow eh e ghaa ven, as e ghaa harvaant, as e un vac jeig, as hie ad harrish yn awin Jabbok. 23As ghow eh ad, as hug eh ad harrish yn awin, as hug eh harrish e chooid.

24As va Jacob faagit ny-lomarcan: as ren dooinney gleck rish, derrey brishey’n laa. 25As tra honnick eh nagh chossyn eh er, venn eh rish kione e lheeasid: as va slheeasid Yacob ass ynnyd, myr v’eh gleck rish. 26As dooyrt eh, Lhig y raad dou, son ta’n laa brishey: as dooyrt eh, Cha lhig-ym yn raad dhyt, mannagh jean oo mee y vannaghey. 27As dooyrt eh rish, Cre ta dty ennym? as dooyrt eh, Jacob. 28As dooyrt eh, Cha bee dty ennym ny sodjey Jacob, agh Israel: son myr prince ta pooar ayd marish Jee, as marish deiney, as t’ou er gheddyn y varriaght. 29As dênee Jacob jehsyn, as dooyrt eh, Insh dooys, ta mee guee ort, dty ennym’s: As dooyrt eh, Cre’n-fa te, dy vel oo briaght son my ennym’s? as vannee eh eh ayns shen. 30As denmys Jacob yn ynnyd shen Peniel; Son ta mee er vakin Jee eddin ry eddin, as foast ta mee bio. 31As myr hie eh harrish Peniel, dirree yn ghrian er, as v’eh baccagh ayns e lheeasid. 32Shen-y-fa cha vel cloan Israel gee jeh’n feh ren shyrgaghey, t’er kione y lheeasid, derrey’n laa t’ayn jiu: er-y-fa dy venn eh rish kione slheeasid Yacob ayns y feh ren farbagh.