CAB. XXXIV

1As hie Dinah inneen Leah, dymmyrk ee da Jacob magh dy akin inneenyn y cheer. 2As tra va Shechem mac Hamor yn Hivite, prince jeh’n cheer, er vakin ee, ghow eh ee, as lhie eh mâree, er-êgin. 3As ren e chree lhiantyn gys Dinah inneen Yacob; as v’eh ayns graih rish y ven aeg, as loayr eh dy dooie r’ee. 4As loayr Shechem rish e ayr Hamor, gra, Fow yn ven aeg shoh dou son ben. 5As cheayll Jacob, dy row eh er ghoaill er-êgin Dinah e inneen [nish va e vec marish e vaase ’sy vagher] as va Jacob ny host, derrey haink ad thie.

6As hie Hamor ayr Shechem magh gys Jacob, dy loayrt rish. 7As haink mec Yacob veih’n vagher tra cheayll ad jeh, as va ny deiney seaghnit, as v’ad feer jymmoosagh; er-yn-oyr dy row eh er hayrn scammylt er Israel, ayns lhie marish inneen Yacob, red nagh lhisagh ve jeant. 8As loayr Hamor roosyn, gra, Ta cree my vac Shechem soit er yn inneen euish: guee-ym erriu, cur-jee da ee son ben. 9As jean-jee cleunys rooinyn, as cur-jee ny inneenyn euish dooinyn, as gow-jee ny inneenyn ainyn diuish. 10As nee shiu cummal mârin, as bee yn cheer eddyr shin: jean-jee baghey as dellal ayn, as gow-jee cummallyn diu hene. 11As dooyrt Shechem rish yn ayr, as ny braaraghyn eck Lhig dou foayr y gheddyn ’sy chilley eu; as cre-erbee hirrys shiu orrym, ver-ym diu. 12Shir-jee wheesh as sailliu dy hoghyr as dy chooid, as ver-yms cordail myr ver shiu orrym: agh cur-jee dou yn ven aeg son ben. 13Agh dreggyr mec Yacob Shechem, as Hamor e ayr, dy molteyragh, as dooyrt ad, (er-yn-oyr dy row eh er hayrn scammylt er Dinah nyn shuyr) 14As dooyrt ad roo, Cha vod mayd shoh ’yannoo, dy choyrt nyn shuyr da fer chymmyltagh: son veagh shen scammylt dooin. 15Agh shoh myr choardys mayd riu: My vees shiuish myr ta shinyn, dy bee dy chooilley mac dooinney jiu er ny yiarey-chymmylt: 16Eisht ver mayd ny inneenyn ain diuish, as gow mayd ny inneenyn euish dooinyn, as nee mayd cummal mêriu, as bee mayd yn un phobble. 17Agh mannagh n’eaisht shiu rooin, dy ve er nyn yiarey-chymmylt; eisht gow mayd yn inneen ain, as hem mayd roïn. 18As ren Hamor, as Shechem mac Hamor coardail gys ny goan oc. 19As cha lhig y dooinney aeg shaghey dy yannoo shoh, er-yn-oyr dy row taitnys echey ayns inneen Yacob: as v’eh ny s’ooasle na ooilley thie e ayrey.

20As haink Hamor as Shechem e vac gys giat yn ard-valley oc, gra. 21Ta ny deiney shoh sheeoil mârin, shen-y-fa lhig daue cummal ’sy cheer, as dellal ayn: son y cheer, cur-my-ner, te mooar dy liooar er ny son oc, lhig dooin goaill ny inneenyn ocsyn dooinyn son mraane, as lhig dooin cur dauesyn ny inneenyn ainyn. 22Agh ynrycan er y chonaant shoh nee ny deiney coardail rooin, dy chummal mârin, as dy ve yn un sleih, my vees dy chooilley mac dooinney ny mast’ ain er nyn yiarey-chymmylt, myr t’adsyn er nyn yiarey-chymmylt. 23Nagh bee yn ollagh oc, as y chooid oc, as dy chooilley vaagh t’oc lhianyn? lhig dooin agh jannoo myr t’ad er ghra, as nee ad cummal mârin. 24As rish Hamor, as Shechem e vac, deaisht ooilley ny hie magh ass giat yn ard-valley echey; as va dy chooilley vac dooinney er nyn yiarey-chymmylt, ooilley ny hie magh er giat yn ard-valley.

25As haink eh gy-kione, er y trass laa, tra v’ad ayns pian, dy ghow jees jeh mec Yacob, Simeon as Levi, braaraghyn Dinah, dagh dooinney e chliwe, as haink ad er yn ard-valley dy daaney, as varr ad ooilley ny deiney. 26As varr ad Hamor, as Shechem e vac, lesh foyr y chliwe, as ghow ad Dinah magh ass thie Shechem, as hie ad rhymboo. 27As haink mec Yacob er ny merriu, as spooill ad yn ard-valley, er-yn-oyr dy row ad er hayrn scammylt er nyn shuyr. 28As ghow ad ny kirree as ny dew, as ny assylyn oc, as shen ny v’ayns yn ard-valley, as shen ny v’ayns y vagher. 29As ooilley yn verchys oc, as ooilley yn chloan veggey oc, as ny mraane oc ghow ad ayns cappeeys, as spooill ad ooilley ny v’ayns y thie. 30As dooyrt Jacob rish Simeon as Levi; Ta shiu er hayrn seaghyn orrym, as er m’y yannoo dwoaiagh mastey cummaltee ny cheerey, mastey ny Canaaniteyn, as ny Perizziteyn: as myr nagh vel shin agh beggan sleih ayns earroo, nee ad chaglym ad-hene cooidjagh m’oï, as m’y ghunverys, as beem’s er my stroie, mish as my hie. 31As dooyrt ad, Kys by-lhoys da dellal rish y chuyr ain, myr rish streebagh?