CAB. XXXVII

1As ren Jacob cummal ayns cheer yoarreeaght e ayrey, ayns cheer Chanaan. 2Shoh coontey jeh kynneeyn Yacob, tra va Joseph shiaght bleeaney jeig dy eash, v’eh bochillagh y chioltane marish e vraaraghyn, as va’n scollag marish mec Bilhah, as mec Zilpah, mraane e ayrey; as dinsh Joseph da e ayr jeh’n drogh ghoo oc. 3Nish bynney lesh Israel Joseph, ny share na ooilley e chloan; son dy row eh mac e henn eash: as ren eh cooat da jeh caghlaaghyn dy ghaah. 4As tra honnick e vraaraghyn, dy bynney lesh nyn ayr eh, ny share na ooilley e vraaraghyn, dy dug ad dwoaie da, chamoo loayragh ad dy dooie rish.

5As ren Joseph dreamal, ren eh ginsh da e vraaraghyn; as shen myr smoo va feoh oc er. 6As dooyrt eh roo, Clasht-jee, ta mee guee erriu, yn dreamal shoh va aym. 7Son, Cur-my-ner, va shin kiangley bunneeyn ’sy vagher, as cur-my-ner, hrog yn vunney aym’s, as myrgeddin, hass eh seose jeeragh; as cur-my-ner, hass ny bunneeyn euish ooilley mygeayrt, as ren ad biallys da’n vunney aym’s. 8As dooyrt e vraaraghyn rish, Jean uss dy jarroo reill harrin? nee ayd’s vees yn ard reill harrin? as wheesh shen smoo dy ghwoaie foast v’oc er, son e ghreamallyn as son e ghoan. 9As ren eh reesht dreamal elley, as dinsh eh da e vraaraghyn eh, as dooyrt eh, Cur-my-ner, ta mee er n’yannoo dreamal elley, as cur-my-ner, ren y ghrian, as yn eayst, as ny un rollageyn jeig biallys dou. 10As dinsh eh shoh da e ayr, as da e vraaraghyn, as hug e ayr oghsan da as dooyrt eh rish, Cre’n dreamal shoh t’ou er n’yannoo? Jig-yms, as dty voir, as dty vraaraghyn dy jarroo, dy chroymmey shin hene sheese hood’s gys y thalloo? 11As ren e vraaraghyn troo mysh: agh smooinee e ayr dy dowin er y raa.

12As hie e vraaraghyn, dy ghoaill kiarail jeh shioltane nyn ayrey ayns Shechem. 13As dooyrt Israel rish Joseph, Nagh vel dty vraaraghyn jeeaghyn da’n chioltane ayns Shechem? Tar, as ver-yms oo huc er chaghteraght: As dooyrt eh rish, Ta mee ayns shoh. 14As dooyrt eh rish, Immee, ta mee guee ort, jeeagh vel ooilley dy mie marish dty vraaraghyn, as marish ny shioltaneyn; as cur lhiat fys hym’s reesht: Myr shen hug eh magh eh trooid coan Hebron, as haink eh gys Shechem.

15As haghyr dooinney dy row ny raad, as cur-my-ner, v’eh er-shaghryn fud y vagher: as dênee yn dooinney jeh, gra, Cre t’ou dy hirrey ayns shoh? 16As dooyrt eh, Ta mee shirrey lurg my vraaraghyn: insh dou, ta mee guee ort, c’raad t’ad fassaghey ny shioltaneyn oc. 17As dooyrt y dooinney, t’ad er n’immeeaght veih shoh: son cheayll mee ad gra, Lhig dooin goll gys Dothan. As hie Joseph dy gheddyn magh e vraaraghyn, as hooar eh ad ayns Dothan. 18As tra chronnee ad eh, eer my daink eh er-gerrey daue, hug ad nyn goyrle dy cheilley, dy varroo eh. 19As dooyrt ad yn derrey yeh rish y jeh elley, Cur-my-ner, ta’n dreamyder shoh cheet: 20Tar-jee nish, er-y-fa shen, as lhig dooin y varroo eh, as y hilgey ayns ooig ennagh; as jir mayd, Dy vel drogh veisht ennagh er stroie eh: as hee mayd, cre hig jeh e ghreamallyn. 21As cheayll Reuben shoh; as ren eh sauail eh ass nyn laueyn, as dooyrt eh, Ny lhig dooin y varroo eh. 22As dooyrt Reuben roo, Ny deayrt-jee fuill edyr, agh tilg-jee eh ayns yn ooig shoh, ta ’syn aasagh, as ny cur-jee laue er; er-chee dy voddagh eh feaysley eh ass nyn laueyn, dy livrey eh reesht gys e ayr.

23As haink eh gy-kione, tra va Joseph er jeet gys e vraaraghyn, dy rooisht ad e chooat jeh Joseph, e chooat jeh caghlaaghyn daah va mysh. 24As ghow ad eh, as hilg ad eh ayns ooig, as va’n ooig follym, gyn veg yn ushtey. 25As hoie ad sheese, dy ghoaill beaghey: as hrog ad seose nyn sooillyn, as yeeagh ad, as cur-my-ner, haink sheshaght dy Ishmaeliteyn veih Gilead, lesh nyn camelyn, cur lhieu spiceyn, as balm, as myrrh, goll lesh sheese gys Egypt. 26As dooyrt Judah rish e vraaraghyn, Cre’n vondeish vees eh dooin, dy varroo nyn mraar, as cheiltyn e uill? 27Tar-jee, as lhig dooin creck eh rish ny Ishmaeliteyn, as ny lhig da nyn laue ve er; son nyn mraar eh, as yn eill ain: as choard e vraaraghyn er shoh. 28Eisht va Midianiteyn goll shaghey, marchanyn; as hayrn ad, as hrog ad Joseph seose ass yn ooig, as chreck ad Joseph rish ny Ishmaeliteyn, son feed peesh dy argid: as hug adsyn lhieu Joseph gys Egypt. 29As hyndaa Reuben reesht gys yn ooig; as cur-my-ner, cha row Joseph ayns yn ooig; as raip eh e choamraghyn. 30As hyndaa eh gys e vraaraghyn, as dooyrt eh, Cha vel y lhiannoo ry-gheddyn, er my hon’s, cre’n erree hig orrym? 31As ghow ad cooat Yoseph, as varr ad mannan jeh ny goair, as seiy ad yn cooat ’syn uill. 32As hug ad y cooat jeh ymmodee daaghyn gys nyn ayr; as dooyrt ad, Shoh ta shin er gheddyn: jeeagh nish, nee shoh cooat dty vac mannagh nee. 33As hug eh enney er, as dooyrt eh, Cooat my vac t’ayn: ta drogh veisht er stroie eh; ta Joseph gyn dooyt raipit dy peeshyn. 34As raip Jacob e choamraghyn, as hug eh aanrit-sack er e veeghyn, as ren eh dobberan son e vac ymmodee laghyn. 35As dirree ooilley e vec, as ooilley e inneenyn dy gherjaghey eh; agh dob eh dy ve er ny gherjaghey: as dooyrt eh; Son hem’s sheese ’syn oaie gys my vac, lesh trimshey. Shoh myr ren e ayr dobberan er e hon. 36As chreck ny Midianiteyn eh ayns Egypt, rish Potiphar, fer-oik fo Pharaoh, as captan e ghard.