CAB. XXXVIII

1As haink eh gy-kione, ec y traa shen, dy jagh Judah sheese veih e vraaraghyn, as hyndaa eh dy yeeaghyn Adullamite dy row, va’n ennym echey Hirah. 2As honnick Judah ayns shen inneen Canaanite dy row, va’n ennym echey Shuah: as ghow eh ee, as lhie eh mâree: 3As ren ee gientyn, as gymmyrkey mac; as denmys eh eh Er. 4As ren ee gientyn reesht, as gymmyrkey mac: as denmys ee eh Onan. 5As ren ee gientyn reesht, as gymmyrkey mac: as denmys ee eh Shelah: as v’eh ec Chezib; tra dymmyrk ee eh. 6As ghow Judah ben son Er e vac shinney, va’n ennym eck Tamar. 7As va Er, mac shinney Yudah, cur rish olk ayns shilley’n Chiarn; as stroie yn Chiarn eh. 8As dooyrt Judah rish Onan, Lhie marish ben dty vraarey, as poose ee, as trog seose sluight da dty vraar. 9As va fys ec Onan, nagh beagh y sluight enmyssit ersyn: as haink eh gy-kione, tra hie eh stiagh gys ben e vraarey, dy lhig eh er y thalloo eh, er-chee nagh droggagh eh sluight da e vraar. 10As hug shoh jymmoose er y Chiarn; shen-y-fa hug eh eshyn dy baase myrgeddin. 11Eisht dooyrt Judah, rish Tamar e inneen-’sy-leigh, Jean tannaghtyn dty ven-treoghe ec thie dty ayrey, derrey vees my vac Shelah ny ghooinney: [son dooyrt eh, Er-aggle dy vow eshyn myrgeddin baase, myr hooar e vraaraghyn] as hie Tamar, as ren ee baghey ayns thie e ayrey.

12As lurg earish, hooar inneen Shuah ben Yudah baase: as lurg da Judah ve er ny gherjaghey, hie eh seose gys lommyrtee ny geyrragh gys Timnath, eh-hene as e charrey Hirah yn Adullamite. 13As ve inshit da Tamar, gra, Cur-my-ner, ta dty ayr-’sy-leigh goll seose gys Timnath, dy lommyrt e chirree. 14As hug ee j’ee e garmadyn ben-treoghe, as hug ee breid er yn eddin eck, as choodee ee ee-hene, as hoie ee ayns ynnyd foshlit, ta liorish y raad gys Timnath: son honnick ee dy row Shelah er n’aase gys stayd dooinney, as cha row ee er ny choyrt da son ben. 15Tra honnick Judah ee, smooinee eh dy nee streebagh v’ee: er-yn-oyr dy row ee er choodaghey e eddin. 16As hyndaa eh lh’ee er y raad, as dooyrt eh, Tar royd, ta mee guee ort, lhig dou lhie mayrt (son cha row fys echey, dy nee e ven-chleuin v’ayn) as dooyrt ish, Cre ver oo dou, son cheet stiagh hym? 17As dooyrt eh, Ver-ym mannan hood veih’n chioltane: as dooyrt ish, Der oo gioal dou, derrey ver oo hym eh. 18As dooyrt eh, Cre’n gioal ver-ym dhyt? As dooyrt ish, Cur dou dty ainey, as dty vraceletyn, as dty lorg t’ayns dty laue: as hug eh jee ad, as va echey dy yannoo r’ee, as ren ee giennaghtyn. 19As hrog ee urree as hie ee ro-ee, as hug ee e coodagh j’ee, as hug ee e garmadyn ben-treoghe urree. 20As hug Judah yn mannan, liorish laue e charrey yn Adullamite, dy eaysley e yioal veih laue yn ven: agh cha row ee ry-gheddyn. 21Eisht vrie eh jeh deiney yn ynnyd shen, gra, Cre vel y streebagh va ry-akin rish oirr y raad? as dooyrt ad, Cha row streebagh erbee ’syn ynnyd shoh. 22As haink eh reesht gys Judah, as dooyrt eh, Cha voddym briaght y gheddyn j’ee: as myrgeddin, dooyrt deiney yn ynnyd, nagh row streebagh erbee ’syn ynnyd shoh. 23As dooyrt Judah, Lhig ee freayll ad, nagh bee mayd naarit: cur-my-ner, hug mee yn mannan shoh, agh cha vel oo er gheddyn ee.

24As haink eh gy-kione, mysh three meeaghyn lurg shen, dy row eh inshit da Judah, gra, Ta Tamar dty ven-chleuin er n’yannoo maarderys, as myrgeddin, cur-my-ner, t’ee torragh, liorish maarderys: As dooyrt Judah, Cur-jee lhieu magh ee, as lhig jee ve losht. 25Tra hug ad lhieu magh ee, hug ee fys gys e ayr-’sy-leigh, gra, Liorish y dooinney s’liesh ad shoh, ta mish torragh: as dooyrt ee, Cur tastey mie, ta mee guee ort, quoi s’liesh ad shoh, yn fainey, ny braceletyn, as y lorg. 26As ghow Judah roo, as dooyrt eh, T’ee er ve ny s’cairal na mish: er-yn-oyr nagh dug mee ee da Shelah my vac: as cha row echey dy yannoo r’ee arragh.

27As haink eh gy-kione, ayns e troailt, cur-my-ner, dy row daa lhiannoo er ny ymmyrkey. 28As haink eh gy-kione, tra v’ee er-troailt, dy dug yn derrey yeh magh e laue; as ghow’n ven-reaylt, as chiangle ee er y laue echey snaie scarleod, gra, Haink eh shoh magh hoshiaght. 29As haink eh gy-kione, myr hayrn eh back e laue, cur-my-ner, dy daink e vraar magh: as dooyrt ee, Kys t’ou uss er vrishey magh. Ort hene dy row’n brishey shoh: shen-y-fa v’eh enmyssit Pharez. 30As ny lurg shen, haink magh e vraar, va’n snaie scarleod er e laue; as v’eh enmyssit Zarah.