CAB. XXXIX

1As va Joseph er ny choyrt lesh sheese gys Egypt, as ren Potiphar, fer-oik fo Pharaoh, captan e ghard, va ny Egyptian, eh y chionnaghey veih laue ny Ishmaeliteyn, va er choyrt lhien eh sheese gys shen. 2As va’n Chiarn marish Joseph, as v’eh ny ghooinney haink dy chooilley nhee lesh, as v’eh ayns thie e vainshtyr yn Egyptian. 3As hug e vainshtyr tastey dy row’n Chiarn mârish, as dy dug y Chiarn er ooilley ny v’eh cur rish, dy vishaghey fo e laue. 4As hooar Joseph foayr ’sy chilley echey, as ren eh shirveish da; as ren eh ny oaseir jeh harrish e hie, as ooilley ny v’echey hug eh fo e laue. 5As haink eh gy-kione, er-dyn traa v’eh er n’yannoo eh ny oaseir ayns e hie, as harrish ooilley ny v’echey, dy vannee yn Chiarn thie yn Egyptian, er graih Yoseph: As va bannaght y Chiarn er ooilley ny v’echey ayns y thie, as ayns y vagher. 6As daag eh ooilley ny v’echey fo laue Yoseph; as cha row kiarail erbee er son nhee erbee dy row echey, er-lhimmey jeh’n arran v’eh dy ee: as va Joseph ny phersoon stoamey, as feer aalin.

7As haink eh gy-kione, lurg ny reddyn shoh, dy hilg e ven-ainshtyr e tooill er Joseph; as dooyrt ee, Lhie mârym, 8Agh dob eshyn, as dooyrt eh rish e ven-ainshtyr, Cur-my-ner, cha vel fys ec my vainshtyr er ny ta mârym ayns y thie, as t’eh er livrey ooilley ny t’echey fo my laue. 9Cha vel unnane ny syrjey ’sy thie shoh na mish: chamoo t’eh er reayll nhee erbee voym’s, agh uss, er-yn-oyr dy nee oo yn ven echey: kys eisht oddym’s cur rish yn aggair vooar shoh, as peccah ’yannoo noi Jee? 10As haink eh gy-kione, myr loayr ee rish Joseph laa lurg laa, nagh deaisht eh r’ee, dy lhie lioree, ny dy ve mâree. 11As haink eh gy-kione mysh y traa shoh, dy jagh Joseph stiagh ’sy thie mysh e chooishyn hene, as cha row veg jeh’n vooinjer mygeayrt. 12As haare ee greme er e gharmad, gra, Lhie mârym: as daag eh e gharmad ayns y laue eck, as chossyn eh roish, as hooar eh magh. 13As haink eh gy-kione, tra honnick ee dy row eh er vaagail e choamrey ayns y laue eck, as er gosney roish. 14Dy dyllee ee gys sleih yn thie eck, as loayr ee roo, gra, Jeeagh-jee, t’eh er choyrt lesh Hebrew stiagh hooin, dy hayrn scammylt orrin: haink eh stiagh hym’s dy lhie mârym, as dyllee mee lesh coraa ard. 15As haink eh gy-kione, tra cheayll eh dy hrog mee seose my choraa, as dy deïe mee magh, dy daag eh e gharmad mârym, as chossyn eh roish, as hooar eh magh. 16As hasht ee seose e gharmad lioree, derrey haink y chiarn echey thie. 17As loayr ee rish, cordail rish ny goan shoh, gra, Yn charvaant Hebrew hug oo lhiat hooin, haink eh stiagh hym dy hayrn scammylt orrym. 18As haink eh gy-kione, myr hrog mee seose my choraa, as deïe mee magh, dy daag eh e gharmad mârym, as chossyn eh magh. 19As haink eh gy-kione, tra cheayll e vainshtyr goan e ven, loayr ee rish, gra, Lurg yn aght shoh ren dty harvaant rhym, dy row e yymmoose er ny vrasnaghey. 20As ghow mainshtyr Yoseph eh, as hilg eh ’sy phryssoon eh, ynnyd raad va pryssoonee’n ree ayns geulaghyn: as shen y raad v’eh ny phryssoonagh.

21Agh va’n Chiarn marish Joseph, as hoilshee eh myghin da, as hug eh da foayr ayns shilley arreyder y phryssoon. 22As hug arreyder y phryssoon fo kiarail Yoseph ny phryssoonee v’ayns y phryssoon, as cre-erbee ren ad ayns shen, eshyn doardee eh. 23Cha yeeagh arreyder y phryssoon gys nhee erbee dy row fo e laue; er-y-fa dy row yn Chiarn mârish; as shen ny v’eh dy yannoo, hug y Chiarn er dy vishaghey.