CAB. XL

1As haink eh gy-kione, lurg ny reddyn shoh, dy row butler ree Egypt, as ard-stiurt e hie er duittym fo corree nyn jiarn ree Egypt. 2As va Pharaoh jymmoosagh rish y daa fer-oik shoh, rish yn ard-vutler as rish ard-stiurt e hie. 3As hug eh ad ayns pryssoon, ayns thie captan e ghard, ayns y phryssoon, yn boayl va Joseph ny phryssoonagh ayn. 4As hug captan y ghard ad fo currym Yoseph, as ghow eh kiarail jeu, as v’ad choud shen dy hraa ayns pryssoon.

5As ren ad ny-neesht dreamal, dagh fer jeu e ghreamal ’syn un oie, dagh dooinney rere e ghreamal; yn ard-vutler as stiurt ree Egypt, va ayns y phryssoon. 6As haink Joseph stiagh huc ’sy voghrey, as yeeagh eh orroo, as cur-my-ner, va drogh yien orroo. 7As dênee eh jeh fir-oik Pharaoh, va mârish ayns pryssoon thie e hiarn, gra, Cre’n-fa ta shiu jeeaghyn cha trome-chreeagh jiu? 8As dooyrt ad rish, Ta shin er n’yannoo dreamal, as cha vel fer erbee dy chur dooin toiggal jeh. As dooyrt Joseph roo, Nagh nee gys Jee ta bentyn dy hoilshaghey folliaghtyn? insh-jee dooys ad, ta mee guee erriu. 9As dinsh yn ard-vutler e ghreamal da Joseph, as dooyrt eh rish, Ayns my ghreamal, cur-my-ner, va billey-feeyney kiongoyrt rhym. 10As ayns y villey-feeyney va three banglaneyn; as ve myr dy beagh eh, brishey magh, as hilg eh blaa; as dymmyrk ny dossanyn echey messyn-feeyney appee. 11As va cappan Pharaoh ayns my laue; as ghow mee ny messyn-feeyney, as hraisht mee ad ayns cappan Pharaoh, as hug mee yn cappan ayns laue Pharaoh. 12As dooyrt Joseph rish, Shoh ny ta er ny hoiggal liorish; Ta ny three banglaneyn cowraghey three laa. 13Foast cheu-sthie jeh three laa, nee Pharaoh troggal seose dty chione, as goaill oo stiagh reesht gys dty oik; as ver oo cappan Pharaoh ayns e laue, myr bollagh oo, tra v’ou yn butler echey. 14Agh cooinee orrym’s, tra hig eh dy mie lhiat, as soilshee kenjallys, ta mee guee ort, dooys; as jean imraa jee’m rish Pharaoh, as livrey mee ass y thie shoh. 15Son dy jarroo, va mee er my gheid ersooyl ass cheer ny Hebrewnee; as ayns shoh myrgeddin, cha vel mee er chur oyr erbee, dy jinnagh ad mee ’sy phryssoon. 16Tra honnick yn ard-stiurt, dy row yn meanal v’er ny choyrt er, foayroil; dooyrt eh rish Joseph, Va mish neesht ayns my ghreamal, as cur-my-ner, va three basketyn baney er my chione. 17As ayns y vasket b’yrjey, va jeh dy chooilley vonney dy vee broit ’syn oghe, son Pharaoh; as d’ee ny eeanlee ad, ass y vasket, v’er my chione. 18As dreggyr Joseph, as dooyrt eh, Shoh’n meanal echey: Ta ny three basketyn cowraghey three laa. 19Foast cheu-sthie jeh three laa, nee Pharaoh troggal seose dty chione jeed, as oo y chroghey er billey, as nee ny eeanlee gee dty eill jeed.

20As haink eh gy-kione er yn trass laa, va corrym gys y laa ruggyr Pharaoh, dy ren eh cuirraghyn da ooilley e ard-gheiney, as ren eh soiaghey seose yn ard-vutler, as yn ard-stiurt mastey ny fir-oik. 21As ghow eh stiagh yn ard-vutler gys e oik reesht; as hug eshyn y cappan ayns laue Pharaoh: 22Agh yn ard-stiurt ren eh ’chroghey, myr va Joseph er hoilshaghey daue. 23Ny-yeih cha chooinee yn ard-vutler er Joseph, agh yarrood eh eh.