CAB. XLI

1As ve myr shen, ec kione daa vleïn, dy ren Pharaoh dreamal, as cur-my-ner, hass eh liorish yn awin. 2As cur-my-ner, haink seose ass yn awin, shiaght booaghyn aalin, as slane beiyht: as ren ad gyndyr ayns lheeannee. 3As cur-my-ner, haink shiaght booaghyn elley geiyrt orroo, ass yn awin, ayns drogh challin, as shang; as hass ad liorish y maase elley er broogh ny hawin. 4As ren ny booaghyn ayns drogh challin as shang, gee seose ny shiaght beiyn aalin as roauyrey. Er shoh ghooisht Pharaoh. 5As chaddil eh, as ren eh dreamal yn nah cheayrt, as cur-my-ner, haink shiaght jeeassyn dy arroo seose er yn un stalk, slane appee as mie. 6As cur-my-ner, daase seose shiaght jeeassyn boghtey, as fowanit lesh y gheay-niar, geiyrt orroo. 7As stroie ny shiaght jeeassyn boghtey ny shiaght jeeassyn slane appee: as ghooisht Pharaoh, as cur-my-ner, she dreamal v’ayn. 8As haink eh gy-kione ’sy voghrey, dy row e aigney seaghnit, as hug eh fys, as deïe eh er ooilley fir-obbee Egypt, as ooilley ny deiney creeney v’ayn; as dinsh Pharaoh e ghreamal daue; agh cha row unnane oddagh toiggal y choyrt da Pharaoh jeu. 9Eisht loayr yn ard-vutler rish Pharaoh, gra, Jiu ta mee tayrn m’oiljyn gys cooinaghtyn. 10Va Pharaoh jymmoosagh rish e harvaantyn, as hug eh mish ayns pryssoon, ayns thie captan e ghard, chammah mish as yn ard-stiurt. 11As ren shin dreamal ’syn un oie, mish as eshyn: dagh unnane ain rere e ghreamal hene. 12As va ayns shen mârin dooinney aeg, Hebrew, sharvaant da captan y ghard; as dinsh shin da, as hug eh bun dooin er ny dreamallyn ain; da dagh unnane ain cordail rish e ghreamal hoilshee eh cre va er ny hoiggal liorish. 13As haink eh gy-kione, myr dooyrt eshyn, myr shen haink eh mygeayrt; mish hug eh stiagh reesht gys my oik, agh eshyn hrogh eh.

14Eisht hug Pharaoh fys, as deïe eh son Joseph, as hug ad lhieu eh chelleeragh ass y dungeon: as ghow eh yn aasaag jeh hene; as ren eh e choamrey y chaghlaa, as haink eh fenish Pharaoh. 15As dooyrt Pharaoh rish Joseph, Ta mee er n’yannoo dreamal, as cha vel fer erbee oddys soilshey ’choyrt dou cre monney eh: as ta mee er chlashtyn eh raït my-dty-chione’s, dy vel toiggal ayd’s er dreamal, dy chur tushtey jeh. 16As dreggyr Joseph Pharaoh, gra, Cha nee aynym’s te: Jee ver da Pharaoh ansoor dy hee. 17As dooyrt Pharaoh rish Joseph. Ayns my ghreamal, cur-my-ner, hass mee er broogh ny hawin. 18As cur-my-ner, haink seose ass yn awin shiaght booaghyn ayns callin vie as aalin; as ren ad gyndyr ayns lheeannee. 19As cur-my-ner, haink shiaght beiyn elley seose geiyrt orroo, boght, as feer ghrow, as thanney ayns feill, lheid as nagh vaik mee rieau ayns cheer Egypt son meillid. 20As d’ee ny beiyn thanney as graney seose, ny chied shiaght beiyn roauyrey. 21As tra v’ad erreish gee ad, cha row eh ry-akin orroo, dy row ad er n’ee ad, agh v’ad kinjagh cha shang as v’ad roïe: Er shen ghooisht mee. 22As honnick mee ayns my ghreamal, as cur-my-ner, haink shiaght jeeassyn seose er yn un chass, slane appee as mie. 23As cur-my-ner, daase shiaght jeeassyn, fioghit, thanney, as fowanit lesh y gheay-niar, seose geiyrt orroo. 24As stroie ny jeeassyn thanney ny shiaght jeeassyn mie: as dinsh mee shoh da ny fir-obbee; agh cha row fer jeu oddagh y hoilshaghey dou eh.

25As dooyrt Joseph rish Pharaoh, Cha vel dreamal Pharaoh cowraghey agh yn un red: ta Jee er hoilshaghey da Pharaoh, cre t’eh kiarail dy yannoo. 26Ta ny shiaght booaghyn mie, cowraghey shiaght bleeantyn; as ta ny shiaght jeeassyn mie, shiaght bleeantyn: ta’n dreamal yn un chooid. 27As ta ny shiaght booaghyn shang as graney, haink seose geiyrt orroo, shiaght bleeantyn: as bee ny shiaght jeeassyn follym fowanit lesh y gheay-niar, shiaght bleeantyn dy ghortey. 28Shoh’n red ta mee er loayrt rish Pharaoh: ny ta Jee kiarail dy yannoo, t’eh soilshaghey da Pharaoh. 29Cur-my-ner, ta shiaght bleeantyn dy phalchey mooar ry-heet, trooid ooilley cheer Egypt. 30As nyn lurg, hig shiaght bleeantyn dy ghortey, as bee ooilley’n phalchey er ny yarrood ayns cheer Egypt: as nee’n gortey stroie yn cheer. 31As cha bee cooinaghtyn er y phalchey ’sy cheer, kyndagh rish y ghortey shen hig geiyrt er: son bee eh feer trome. 32As son dy row yn dreamal er ny ghoobley da Pharaoh, te, er-yn-oyr dy vel y chooish er ny oardaghey liorish Jee, as nee Jee shen dy gerrit y chooilleeney. 33Nish er-y-fa shen, lhig da Pharaoh jeeaghyn magh son dooinney tushtagh as creeney: as eh y hoiaghey harrish cheer Egypt. 34Lhig da Pharaoh jannoo shoh, as lhig da oaseiryn y phointeil harrish y cheer, dy hroggal mess yn wheiggoo ayrn jeh thalloo Egypt, ayns ny shiaght bleeantyn dy phalchey. 35As lhig daue chaglym ooilley beaghey ny bleeantyn mie shen ta ry-heet, as arroo y hashtey seose fo laue Pharaoh, as lhig daue beaghey y reayll ayns ny ard-valjyn. 36As bee’n beaghey shen son stoyr gys y cheer ry-hoi ny shiaght bleeantyn gonney, vees ayns cheer Egypt: nagh jed y cheer naardey liorish y ghenney. 37As va’n choyrle mie ayns shilley Pharaoh, as ooilley e hirveishee. 38As dooyrt Pharaoh rish e hirveishee, C’raad yiow mayd y lheid shoh, dooinney ayn ta spyrryd Yee? 39As dooyrt Pharaoh rish Joseph, Ayns wheesh as dy vel Jee er hoilshaghey ooilley shoh dhyt’s; cha vel fer erbee cha tushtagh, as cha creeney as oo hene. 40Bee uss harrish my hie, as cordail rish dty raa, bee ooilley my phobble er nyn reill: ayns y stoyl-reeoil ny-lomarcan, beem’s ny syrjey na uss. 41As dooyrt Pharaoh rish Joseph, Jeeagh, ta mish er dty hoiaghey harrish ooilley cheer Egypt. 42As ghow Pharaoh jeh yn fainey echey veih e laue, as hug eh er laue Yoseph eh, as choamree eh eh ayns garmadyn sheeidey, as hug eh boandey dy airh mooish e wannal. 43As hug eh er markiagh ayns y nah ainagh echey: as deïe ad roish, Croym-jee yn ghlioon: as hug eh da yn reill harrish ooilley cheer Egypt. 44As dooyrt Pharaoh rish Joseph, Mish Pharaoh, as dt’egooish cha jean dooinney erbee troggal seose e laue ny e chass ayns ooilley cheer Egypt. 45As ren Pharaoh genmys Joseph Zaphnath-paaneah: as hug eh da son ben Asenath inneen Potipherah prince jeh Ou: as hie Joseph magh trooid ooilley cheer Egypt.

46As va Joseph jeih bleeaney as feed dy eash, tra hass eh fenish Pharaoh ree Egypt; as hie Joseph magh veih fenish Pharaoh, as hie eh trooid ooilley cheer Egypt. 47As ayns ny shiaght bleeantyn dy phalchey, hug y thalloo magh bishaghey erskyn towse. 48As haggil eh seose ooilley beaghey ny shiaght bleeantyn v’ayns cheer Egypt, as ren eh stoyral seose yn beaghey ayns ny ard-valjyn: arroo’n vagher, va mygeayrt dagh ard-valley, hasht eh seose ayndoo. 49As haggil Joseph arroo myr genniagh ny marrey, ayns lheid y phalchey derrey nagh dod eh coontey sodjey y reayll, son ve erskyn towse. 50As da Joseph va er ny ruggey daa vac roish my daink ny bleeantyn gonney; ren Asenath, inneen Potipherah prince jeh On, gymmyrkey da. 51As denmys Joseph yn fer shinney Manasseh: son ta Jee, dooyrt eh, er chur orrym jarrood ooilley my hooilleil, as ooilley my heaghyn ayns thie my ayrey. 52As denmys eh yn nah er Ephraim: son ta Jee er chur orrym ve messoil ayns cheer my heaghyn.

53As va ny shiaght bleeantyn dy phalchey v’ayns thalloo Egypt, harrish. 54As ghow ny shiaght bleeantyn dy ghortey toshiaght, myr va Joseph er ghra; as va’n ghenney ayns dy chooilley heer: agh ayns ooilley cheer Egypt va arran. 55As tra va stoyr ny cummaltee baarit, trooid ooilley cheer Egypt, deïe’n pobble gys Pharaoh son arran: As dooyrt Pharaoh rish ooilley ny Egyptianee, Gow-jee gys Joseph: jean-jee lurg y raa echeysyn. 56As va’n ghortey harrish ooilley eaghtyr y thallooin; as doshil Joseph ooilley ny thieyn-tashtee, as chreck eh rish ny Egyptianee; as vishee’n ghortey dy trome ayns cheer Egypt. 57As haink dy chooilley heer gys Egypt, gys Joseph, dy chionnaghey arran; er-yn-oyr dy row’n ghenney cha trome ayns dy chooilley heer.