CAB. XLII

1Nish tra cheayll Jacob, dy row arroo ayns Egypt, dooyrt Jacob rish e vec, Cre’n-fa ta shiu jeeaghyn y derrey yeh er y jeh elley? 2As dooyrt eh, Cur-my-ner, ta mee er chlashtyn, dy vel arroo ayns Egypt; gow-jee sheese gys shen, as kionnee-jee er nyn son veih shen, dy vod mayd ve bio, as nagh vow mayd baase. 3As hie jeih braaraghyn Yoseph sheese, dy chionnaghey arroo ayns Egypt. 4Agh Benjamin, braar Yoseph, cha dug Jacob marish e vraaraghyn: son dooyrt eh, Er-aggle, trooid taghyrt, dy jig olk ny raad. 5As haink mec Israel dy chionnaghey arroo, marish feallagh elley: son va’n ghortey ayns cheer Chanaan. 6As va Joseph ny chiannoort harrish y cheer, as eshyn ve va creck rish ooilley sleih ny cheerey: as haink braaraghyn Yoseph, as chroym ad ad-hene sheese kiongoyrt rish, lesh nyn eddinyn gys y thalloo. 7As honnick Joseph e vraaraghyn, as va enney echey orroo, agh dymmyrk eh eh-hene myr joarree daue, as loayr eh dy mooaralagh roo: as dooyrt eh roo, Cre veih ta shiuish? As dooyrt ad, Veih cheer Chanaan, dy chionnaghey beaghey. 8As va enney ec Joseph er e vraaraghyn, agh cha row enney oc ersyn. 9As chooinee Joseph er ny dreamallyn v’echey jeusyn, as dooyrt eh roo, She peeikearyn follit shiu: dy akin boghtynid y cheer ta shiu er jeet. 10As dooyrt adsyn rish, Cha nee, my hiarn, agh dy chionnaghey beaghey ta dty harvaantyn er jeet. 11Ta shin ooilley mec un dooinney; she deiney ynrick shin; cha nee peeikearyn edyr dty harvaantyn. 12As dooyrt eh roo, Cha nee, agh dy akin boghtynid y cheer ta shiu er jeet. 13As dooyrt adsyn, Ta dty harvaantyn daa vraar jeig, mec un dooinney ayns cheer Chanaan: as cur-my-ner, ta’n er saa, ’sy tra t’ayn, marish nyn ayr, as ta fer nagh vel er-mayrn. 14As dooyrt Joseph roo, Shen eh dy loayr mee riu, gra, She peeikearyn shiu. 15Liorish shoh bee shiu er ny phrowal; der bioys Pharaoh, cha jed shiu magh veih’n ynnyd shoh, mannagh jig nyn mraar saa hym’s gys shoh. 16Lhig da fer jiu goll, as nyn mraar y choyrt lesh, as bee shiuish freilt ayns pryssoon, dy vod ny goan eu ve er ny phrowal, vel firrinys erbee ayndoo: er-nonney, der bioys Pharaoh, she peeikearyn shiu. 17As hug eh ad ooilley cooidjagh ayns pryssoon three laa. 18As dooyrt Joseph roo yn trass laa, Shoh jean-jee, as bee nyn mioys lhieu: son ta mish goaill aggle roish Jee. 19My she deiney ynrick shiu, lhig da fer jeh nyn mraaraghyn ve kianlt ayns thie’n phryssoon eu: gow-jee shiuish, cur-jee lhieu arroo son ymmyrch ny thieyn eu. 20Agh cur-jee lhieu nyn mraar saa hym’s; myr shoh bee ny goan eu jeant firrinagh, as cha vow shiu baase. As ren ad myr shen. 21As dooyrt ad ry-cheilley, ta shin dy firrinagh oolee mychione nyn mraar, ayns dy vaik shin angaish e annym tra ghuee eh orrin, as cha dug shin clashtyn da: shen-y-fa ta’n seaghyn shoh er jeet orrin. 22As loayr Reuben roo, gra, Nagh loayr mish riuish, gra, Ny cur-jee laue er y lhiannoo, as cha n’eaishtagh shiu rhym? shen-y-fa, cur-jee my-ner nish, ta loght yn uill echey orrin. 23As cha row fys oc, dy row Joseph toiggal ad: son loayr eh roo liorish fer va jannoo glare eddyr ad. 24As hyndaa eh eh-hene mygeayrt voue, as cheayn eh, as hyndaa eh huc reesht, as loayr eh roo, as ghow eh Simeon voue, as chiangle eh eh kiongoyrt rish nyn sooillyn. 25Eisht hug Joseph sarey dy lhieeney ny saick oc lesh arroo, as dy hyndaa argid dagh dooinney ayns e hack, as dy chur beaghey daue son y raad, as shoh myr ren eh roo. 26As laad ad ny assylyn oc lesh yn arroo, as hie ad rhymboo. 27As myr doshil fer jeu e hack, dy chur bee da e assyl ec y thie-oast, chronnee eh yn argid echey, son cur-my-ner, ve ayns beeal e hack. 28As dooyrt eh rish e vraaraghyn, Ta my argid aym reesht; as jeeagh-jee, te dy jarroo ayns my hack, as chaill ad nyn gree, as v’ad fo atchim, gra y derrey yeh rish y jeh elley, Cre shoh, ta Jee er n’yannoo rooin? 29As haink ad gys Jacob nyn ayr gys cheer Chanaan, as dinsh ad da ooilley ny va er daghyrt daue, gra, 30Yn dooinney ta chiarn ny cheerey, loayr eh dy baggyrtagh rooin, as ghow eh shin son peeikearyn ’sy cheer. 31As dooyrt shin rish, She deiney ynrick shin, cha nee peeikearyn shin edyr. 32Ta shin daa vraar jeig, mec da un ayr, ta fer nagh vel er-mayrn, as ta’n er saa, ’sy traa t’ayn, marish nyn ayr, ayns cheer Chanaan. 33As dooyrt y dooinney, chiarn ny cheerey rooin, Liorish shoh bee fys aym, dy nee deiney ynrick shiu: faag-jee fer jeh nyn mraaraghyn ayns shoh mârym’s, as gow shiuish beaghey son êgin nyn lught-thie, as immee-jee reue. 34As cur-jee lhieu nyn mraar saa hym’s: eisht bee fys aym’s, nagh nee peeikearyn shiu, agh dy vel shiu deiney ynrick: myr shen livrey-yms hiu nyn mraar, as nee shiu dellal ’sy cheer. 35As haink eh gy-kione, myr dolmee ad ny saick oc, cur-my-ner, dy row sporran argid dy chooilley ghooinney ayns e hack: as tra honnick chammah ad hene, as nyn ayr ny sporranyn-argid, v’ad agglit. 36As dooyrt Jacob nyn ayr roo, Mish ta shiu er roostey jeh my chloan: cha vel Joseph er-mayrn, as cha vel Simeon aym: as nee shiu Benjamin y ghoaill voym: ta ooilley ny reddyn shoh m’oï. 37As loayr Reuben rish e ayr, gra, Marr my ghaa vac, mannagh der-ym lhiam hood’s eh; cur fo my laue eh, as ver-ym lhiam hood eh reesht. 38As dooyrt eh, Cha jed my vac sheese mêriu; son ta e vraar marroo, as ta eshyn faagit ny-lomarcan: my hig drogh haghyrt erbee er, ’sy raad ta shiu goll, eisht ver shiu lhieu sheese my chione lheeah lesh trimshey gys yn oaie.