CAB. XLIII

1As va’n ghortey trome ayns y cheer. 2As haink eh gy-kione, tra v’ad er vaarail yn arroo hug ad lhieu veih Egypt, dooyrt nyn ayr roo, Gow-jee reesht, kionnee-jee dooin red beg dy veaghey. 3As loayr Judah rish, gra, Ren y dooinney lesh breearrey shickyrys dooin, gra, Cha jean shiu my eddin y akin, mannagh bee nyn mraar mêriu. 4My lhiggys oo da nyn mraar goll mârin, hem mayd sheese, as kionnee mayd beaghey dhyt. 5Agh mannagh lhig oo da goll mârin, cha jed mayd sheese, son dooyrt y dooinney rooin, Cha jean shiu m’eddin y akin, mannagh bee nyn mraar mêriu. 6As dooyrt Israel, Cre’n-fa ren shiu dellal cha olk rhym, as dy insh da’n dooinney dy row foast braar elley eu? 7As dooyrt ad, Ren y dooinney briaght j’in dy gyere mychione nyn stayd, as mychione y kynney ain, gra, Vel nyn ayr foast bio? vel braar elley eu? as dinsh shin da cordail rish bree ny goan shoh; voddagh fys ve ain son shickyrys, dy niarragh eh, Cur-jee lhieu nyn mraar sheese. 8As dooyrt Judah rish Israel e ayr, Lhig y raad da’n scollag mârym’s, as nee mayd troggal orrin as goll, dy vod mayd ve bio, as gyn goll naardey, chammah shinyn, as uss, as myrgeddin yn vooinjer veggey ain. 9Beem’s raane er e hon; jeh my laue’s nee oo y hirrey eh: mannagh der-yms lhiam hood eh, as soiaghey eh kiongoyrt rhyt, eisht lhig dooys yn oill y ymmyrkey son dy bragh. 10Son er-be dy vel shin er lhiggey shaghey, oddagh shin son shickyrys, v’er jeet back nish yn nah cheayrt. 11As dooyrt Israel nyn ayr roo, My shegin da ve myr shen nish, shoh jean-jee; gow-jee jeh messyn share y cheer ayns nyn siyn, as cur-jee lhieu gioot sheese da’n dooinney, red beg dy valm, as kuse dy vill, spiceyn as myrrh, croyn as almonyn. 12As gow-jee ghaa wheesh dy argid ayns nyn laue, as yn argid v’er ny choyrt lesh reesht ayns beeal ny saick eu, cur-jee lhieu eh reesht ayns nyn laue, foddee dy nee marranys ve. 13Gow-jee myrgeddin nyn mraar, as trog-jee erriu, gow-jee reesht gys y dooinney. 14As dy der Jee ooilley-niartal diu foayr kiongoyrt rish y dooinney, dy vod eh lhiggey’n raad da nyn mraar elley, as Benjamin: my ta mee dy ve spooillit jeh my chloan bee’m spooillit. 15As ghow ny deiney yn gioot shen, as ghow ad ghaa wheesh dy argid ayns nyn laue, as Benjamin, as hrog ad orroo, as hie ad sheese gys Egypt, as hass ad kiongoyrt rish Joseph. 16As tra honnick Joseph Benjamin mâroo; dooyrt eh rish stiurt e hie, Cur lhiat ny deiney shoh thie as marr-jee, as jean-jee gaarlaghey, son ta ny deiney shoh dy ve ec jinnair mârym’s mysh y vun-laa. 17As ren y dooinney myr doardee Joseph: as hug y dooinney lesh ny deiney stiagh ayns thie Yoseph. 18As va aggle er ny deiney, er-y-fa dy row ad er nyn goyrt lhieu stiagh ayns thie Yoseph, as dooyrt ad; Er coontey’n argid va er ny hyndaa ayns ny saick ain yn chied cheayrt, ta shin er nyn goyrt lhien stiagh; dy vod shen ve echey noi ain, as tuittym orrin, as shin y ghoaill ayns bondiaght, as ny assylyn ain. 19As haink ad er-gerrey gys stiurt thie Yoseph, as loayr ad rish ec dorrys y thie, 20As dooyrt ad, O vainshtyr, haink shin dy jarroo sheese yn chied cheayrt, dy chionnaghey beaghey. 21As haink eh gy-kione, tra haink shin gys y thie-oast, dy doshil shin ny saick ain, as cur-my-ner, va argid dy chooilley ghooinney ayns beeal e hack, nyn argid ayns slane towse; as ta shin er choyrt lhien eh reesht ayns nyn laue. 22As argid elley ta shin er chur lhien sheese mârin, dy chionnaghey beaghey: Cha s’ain, quoi hug nyn argid ayns ny saick ain. 23As dooyrt eh, Shee dy row erriu, ny gow-jee aggle: ta’n Jee euish, as Jee nyn ayrey er choyrt diu berchys ayns ny saick eu: aym’s va’n argid eu: as hug eh lesh Simeon magh huc. 24As hug y dooinney lesh ny deiney stiagh ayns thie Yoseph, as hug eh ushtey daue, as niee ad nyn gassyn, as hug eh bee da ny assylyn oc. 25As hooar ad aarloo yn gioot, ry-hoi yn traa harragh Joseph mysh y vun-laa: son cheayll ad, dy row ad dy ghoaill beaghey ayns shen.

26As tra haink Joseph thie, hug ad lhieu huggey yn gioot v’oc nyn laue stiagh ’sy thie, as chroym ad ad-hene huggey gys y thalloo. 27As dênee eh jeu mychione nyn slaynt, as dooyrt eh, Vel nyn ayr dy mie, yn chenn ghooinney mychione va shiu loayrt? vel eh foast bio? 28As dreggyr ad, Ta dty harvaant yn ayr ain ayns slaynt vie, t’eh foast bio: as chroym ad sheese nyn ghing, as ren ad biallys. 29As hrog eh seose e hooillyn, as honnick eh e vraar Benjamin, mac e vayrey, as dooyrt eh, Nee shoh nyn mraar saa mychione loayr shiu rhym’s? As dooyrt eh, Dy bee Jee graysoil dhyt, my vac. 30As ren Joseph siyr; son va’n cree echey lhieeney lesh graih jeean er e vraar: as yeeagh eh son boayl dy cheayney, as hie eh stiagh ayns e hiamyr, as hug eh raad da e yeïr ayns shen. 31Eisht doonlee eh e eddin, as hie eh magh, as chum eh er hene, as dooyrt eh, Cur-jee bee er y voayrd. 32As hoie ad er y hon-syn er-lheh, as er ny son ocsyn er-lheh, as son ny Egyptianee, ren gee mârish, orroo hene; er-yn-oyr nagh row ny Egyptianee dy ghoaill beaghey marish ny Hebrewnee; son ta shen red dwoaiagh da ny Egyptianee. 33As hoie ad kiongoyrt rish, yn fer by-hinney, cordail rish e eash, as yn fer saa cordail rish e aegid: as ghow ny deiney yindys, yn derrey yeh chammah as y jeh elley. 34As ghow eh, as hug eh lhongaghyn daue jeh’n beaghey va kiongoyrt rish hene: agh va ayrn Venjamin queig keayrtyn wheesh as shen jeh’n eallagh elley: As diu ad, as v’ad gennal mârish.