CAB. XLIV

1As doardee eh da stiurt e hie, gra, Lhieen saick ny deiney lesh beaghey, wheesh ad oddys ad lhieu, as cur argid dy chooilley ghooinney, ayns beeal e hack. 2As cur my chappan’s, yn cappan argid, ayns beeal sack yn er saa, as argid e arroo, as ren eh er raa Yoseph. 3Cha leah’s ren y laa toshiaght soilshaghey, va ny deiney currit ersooyl ad hene as nyn assylyn. 4As tra v’ad er n’gholl magh ass yn ard-valley, as nagh row ad foast foddey jeh, dooyrt Joseph rish e stiurt, Seose, eiyr er ny deiney; as tra verrys oo orroo, abbyr roo, Cre’n-fa ta shiu er chooilleeney olk son mie? 5Nagh nee shoh eh, ass ta my hiarn giu? as liorish t’eh dy jarroo geddyn magh folliaghtyn? ta shiu er n’yannoo dy olk ayns yn obbyr shoh.

6As verr eh orroo, as loayr eh roo ny goan cheddin. 7As dooyrt ad rish, Cre’n-fa ta my hiarn gra ny goan shoh? Ny lhig y Jee, dy beagh dty harvaantyn kyndagh jeh lheid y red. 8Cur-my-ner, yn argid hooar shin ayns beeal ny saick ain, hug shin lhien reesht hood, veih cheer Chanaan: kys eisht, ghoghe shin orrin dy gheid ass thie dty hiarn argid ny airh? 9Er quoi-erbee jeh dty harvaantyn vees y ghriu er ny gheddyn, lhig dasyn chammah v’er ny choyrt gy-baase, as shin hene myrgeddin dy ve nyn gappee da my hiarn. 10As dooyrt eh, Nish myrgeddin, lhig da ve cordail rish nyn raa hene: Er quoi-erbee te ry-gheddyn, bee eshyn my harvaant, as bee shiuish gyn loght. 11Eisht ghow ad dy tappee neose dy chooilley ghooinney e hack gys y thalloo, as deayshil dy chooilley ghooinney e hack. 12As ronsee eh, as ghow eh toshiaght, ec yn er by-hinney, as daag eh jeh ec yn er saa: as va’n cappan er ny gheddyn ayns sack Venjamin. 13Eisht raip ad nyn goamraghyn, as laad ad dy chooilley ghooinney e assyl, as hyndaa ad reesht gys yn ard-valley.

14As haink Judah as e vraaraghyn gys thie Yoseph (son v’eh foast sthie) as huitt ad kiongoyrt rish, er y thalloo. 15As dooyrt Joseph roo, Cre’n obbyr shoh ta shiu er n’yannoo? nagh row fys eu, dy vod lheid y dooinney as mish son shickyrys, folliaghtyn y gheddyn magh? 16As dooyrt Judah, Cre jir mayd rish my hiarn? cre nee mayd gra ny kys nee mayd shin hene y heyrey? ta Jee er choyrt gys soilshey mee-chairys dty harvaantyn: cur-my-ner, ta shin sharvaantyn my hiarn, chammah shinyn, as eshyn myrgeddin, echey ta’n cappan er ny gheddyn. 17As dooyrt eh, Ny lhig y Jee, dy jinnin’s myr shen: agh y dooinney ayns e laue ta’n cappan er ny gheddyn, bee eshyn my harvaant; agh er nyn son euish, gow-jee reue seose ayns shee gys nyn ayr. 18Eisht haink Judah er-gerrey da, as dooyrt eh, O my hiarn, lhig ta dty harvaant, ta mee guee ort, fockle y loayrt ayns clashtyn my hiarn, as ny lhig da dty chorree lostey noi dty harvaant: son t’ou uss eer myr Pharaoh. 19Dênee my hiarn jeh e harvaantyn, gra, Vel ayr, ny braar eu? 20As dooyrt shinyn rish my hiarn, Ta ayr ain, ny henn ghooinney, as lhiannoo e henn eash, yn er saa, as ta e vraar marroo, as eshyn ynrycan ta er-mayrn jeh e voir, as ta cree e ayr soit er. 21As dooyrt uss rish dty harvaantyn, Cur-jee lhieu eh sheese hym’s, dy voddym soiaghey my hooillyn er. 22As dooyrt shin rish my hiarn, Cha vod y scollag faagail e ayr: son my aagagh eh e ayr, vrishagh e ayr e chree. 23As dooyrt uss rish dty harvaantyn, Mannagh jig nyn mraar saa neose mêriu, cha vaik shiu my eddin arragh. 24As haink eh gy-kione, tra haink shin seose gys dty harvaant my ayr, dinsh shin da goan my hiarn. 25As dooyrt nyn ayr, Immee-jee reesht, as kionnee-jee dooin kuse dy veaghey. 26As dooyrt shin, Cha vod mayd goll sheese: my vees nyn mraar saa mârin, eisht hem mayd sheese: son cha vod mayd eddin y dooinney y akin, mannagh bee nyn mraar saa mârin. 27As dooyrt dty harvaant m’ayr rooinyn, Ta fys euish dy dymmyrk my ven dooys daa vac: 28As hie fer jeu magh voym, as dooyrt mish, Son shickyrys t’eh raipit ayns peeshyn; as cha vaik mee eh er-dy-henney: 29As my ghoys shiu eh shoh myrgeddin voym, as dy jean olk taghyrt da, ver shiu lhieu sheese my chione lheeah lesh trimshey gys yn oaie. 30Nish er-y-fa shen, tra hig-ym gys dty harvaant m’ayr, as nagh bee’n scollag mârin; (fakin dy vel y vioys echeysyn kianlt seose ayns bioys y scollag) 31Hig eh gy-kione, tra t’eh fakin, nagh vel y scollag mârin, dy bee eh oyr baaish da; as ver dty harvaantyn lhieu sheese kione lheeah dty harvaant nyn ayr, lesh trimshey gys yn oaie. 32Son hie dty harvaant raane son y scollag gys m’ayr, gra, Mannagh der-yms lhiam hood eh, eisht lhig dooys ’ve oolee fenish m’ayrey er son dy bragh. 33Nish er-y-fa shen, ta mee guee ort, lhig da dty harvaant ve freilt ayns bondiaght da my hiarn, ayns ynnyd y scollag; as lhig da’n scollag goll seose marish e vraaraghyn. 34Son kys hem’s seose gys m’ayr, as gyn y scollag ’ve mârym? er-aggle dy vaik-ym yn seaghyn hig er m’ayr.