CAB. XLV

1Eisht cha voddagh Joseph shassoo magh ny sodjey, kiongoyrt roosyn ooilley va mârish; as deïe eh, Lhig da dy chooilley ghooinney goll magh veih m’enish: as cha duirree dooinney erbee mârish, choud as va Joseph soilshaghey eh hene da e vraaraghyn. 2As cheayn eh dy ard; as cheayll ny Egyptianee eh, as thie Pharaoh. 3As dooyrt Joseph rish e vraaraghyn, Mish Joseph; vel m’ayr foast bio? As cha dod e vraaraghyn fockle d’ansoor y choyrt da; son v’ad seaghnit ec e enish. 4As dooyrt Joseph rish e vraaraghyn, Tar-jee ny sniessey dou, ta mee guee erriu: as haink ad er-gerrey as dooyrt eh, Mish Joseph nyn mraar chreck shiu gys Egypt. 5Nish, er-y-fa shen, ny bee-jee seaghnit, ny corree riu hene, dy chreck shiu mish gys shoh: son Jee hug mish reue, dy hauail bioys. 6Son y daa vleïn shoh ta’n ghortey er ny ve ’sy cheer: as foast ta queig bleeaney, ayndoo, cha bee traaue ny buinn. 7As hug Jee mish reueish, dy reaylley diu sluight er y thalloo, as dy hauail nyn mioys liorish livrey-ys yindyssagh. 8Myr shen nish, cha nee shiuish hug mish gys shoh, agh Jee: as t’eh er n’yannoo mee myr ayr da Pharaoh as chiarn er ooilley e hie, as my er-reill harrish ooilley cheer Egypt. 9Jean-jee siyr, as immee-jee seose gys m’ayr, as abbyr-jee rish, Myr shoh ta dty vac Joseph, gra, Ta Jee er n’yannoo mish my hiarn er ooilley Egypt; tar neose hym, ny lhig shaghey. 10As nee oo cummal ayns thalloo Ghoshen, as bee oo er-gerrey dou, oo hene, as dty chloan, as cloan dty chlienney, as dty hioltaneyn, as dty immanyn, as ooilley ny t’ayd. 11As ayns shen neem’s oo y veaghey, (son ta foast roïn queig bleeaney dy ghenney) er-aggle dy jig oo hene, as lught dty hie, as ooilley ny t’ayd gys boghtynid. 12As cur-my-ner, ta ny sooillyn eu hene fakin, as sooillyn my vraar Benjamin, dy nee my veeal hene ta loayrt riu. 13As nee shiu ginsh da my ayr mychione ooilley my ooashley ayns Egypt, as mychione ooilley ny ta shiu er vakin: as nee shiu siyr, as ver shiu lhieu neose my ayr gys shoh. 14As huitt eh er mwannal e vraar Benjamin, as cheayn eh; as cheayn Benjamin er y wannal echeysyn. 15Phaag eh myrgeddin ooilley e vraaraghyn, as cheayn eh mâroo: as ny lurg shen, ren e vraaraghyn taggloo rish.

16As va goo jeh shoh er ny chlashtyn ayns thie Pharaoh, gra, Ta braaraghyn Yoseph er jeet: as ve mie ayns shilley Pharaoh, as e harvaantyn. 17As dooyrt Pharaoh rish Joseph, Abbyr rish dty vraaraghyn, Shoh jean-jee; laad-jee ny beiyn eu, trog-jee erriu, as immee-jee gys cheer Chanaan. 18As gow-jee mêriu nyn ayr, as nyn lught-thie, as tar-jee hym’s; as ver-yms diuish yn chooid share jeh thalloo Egypt, as nee shiu beaghey er meeaylys y thallooin. 19Nish t’ou er dty harey, shoh jean-jee; gow-jee waggonyn veih cheer Egypt son y vooinjer veggey eu, as son ny mraane eu, as cur-jee lhieu nyn ayr, as tar-jee hym’s. 20As ny cur-jee geill da nyn stoo-thie, son ta foays ooilley thalloo Egypt nyn gour. 21As ren cloan Israel myr shen: as hug Joseph waggonyn daue, myr doardee Pharaoh, as hug eh beaghey daue son y raad. 22Da dagh dooinney jeu hug eh caghlaaghyn coamrey: agh da Benjamin hug eh three cheead peesh dy argid, as queig caghlaaghyn garmad. 23As shoh myr hug eh gys e ayr; jeih assylyn laadit lesh cooid chostal Egypt, as jeih assylyn bwoirryn laadit lesh arroo as arran, as beaghey son e ayr er y raad. 24Myr shen hug eh e vraaraghyn ersooyl, as jimmee ad roue; as dooyrt eh roo, Jeeagh nagh duitt shiu magh er y raad.

25As hie ad seose veih Egypt as haink ad gys cheer Chanaan, gys Jacob nyn ayr. 26As dinsh ad da, gra, Ta Joseph foast bio, as t’eh ny chiannoort harrish ooilley cheer Egypt. As ren cree Yacob gannooinaghey, son cha chred eh ad. 27As dinsh ad da ooilley ny goan va Joseph er loayrt roo; as tra honnick eh ny waggonyn, va Joseph er choyrt dy chur lesh eh, haink e vree reesht ayns cree Yacob nyn ayr. 28As dooyrt Israel, Te dy liooar; ta Joseph my vac foast bio: hem dy akin eh my voym baase.