CAB. XLVI

1As ghow Israel e yurnah lesh ooilley ny v’echey, as haink eh gys Beer-sheba, as heb eh ourallyn da Jee e ayr Isaac. 2As loayr Jee rish Israel ayns ashlishyn ny hoie, as dooyrt eh, Yacob, Yacob. As dooyrt eh, Ta mee ayns shoh. 3As dooyrt eh, Mish Jee, Jee dty ayrey: ny bee aggle ort dy gholl sheese gys Egypt; son neem’s jeed’s ayns shen ashoon mooar. 4Hem’s sheese mayrt gys Egypt; as son shickyrys, ver-yms lhiam oo myrgeddin seose reesht: as nee laueyn Yoseph dy hooillyn y yeigh [ec dty vaase:] 5As hrog Jacob er veih Beer-sheba: as hug mec Israel lhieu Jacob nyn ayr, as y vooinjer veggey, as ny mraane oc, ayns ny waggonyn va Pharaoh er choyrt dy chur lhieu eh. 6As ghow ad nyn maase, as nyn gooid v’ad er gheddyn ayns cheer Chanaan, as haink ad gys Egypt, Jacob, as ooilley e luight mârish: 7E vec, as cloan e chlienney mârish, e inneenyn, as inneenyn e vec, as ooilley e luight hug eh lesh marish gys Egypt.

8As shoh enmyn cloan Israel haink gys Egypt, Jacob as e vec: Reuben mac shinney Yacob. 9As mec Reuben; Hanoch, as Phallu, as Hezron as Carmi.

10As Simeon; Jemuel, as Jamin, as Ohad, as Jachin, as Zohar, as Shaul mac da ben va ny Canaanite.

11As mec Levi: Gershon, Kohath as Merari.

12As mec Yudah; Er, as Onan, as Shelah, as Pharez, as Zerah; agh hooar Er as Onan baase ayns cheer Chanaan. As mec Pharez, va Hezron as Hamul.

13As mec Issachar; Tolah, as Phuvah, as Job as Shimron.

14As mec Zebulun; Sered, as Elon, as Jahleel. 15Ad shoh mec Leah, dymmyrk ee da Jacob ayns Padan-aram, as e inneen Dinah; va ooilley anmeenyn e vec as e inneenyn, three-jeig as feed.

16As mec Gad; Ziphion, as Haggai, Shuni as Ezbon, Eri, as Arodi, as Areli.

17As mec Asher; Jimnah, as Ishuah, as Isui as Beriah, as Serah nyn shuyr: as mec Beriah; Heber as Malchiel. 18Ad shoh mec Zilpah, hug Laban da Leah e inneen: as ad shoh dymmyrk ee da Jacob, shey anmeenyn jeig. 19Mec Rachel, ben Yacob; Joseph as Benjamin. 20As da Joseph, ayns cheer Egypt, va ruggit Manasseh as Ephraim, ren Asenath inneen Potipherah, prince jeh On gymmyrkey da.

21As mec Venjamin va Belah, as Becher, as Ashbel, Gera, as Naaman, Ehi, as Rosh, Muppim, as Huppim, as Ard. 22Ad shoh mec Rachel, va er ny ymmyrkey da Jacob: va ooilley ny anmeenyn kiare-jeig.

23As mac Dan; Hushim. 24As mec Naphtali; Jahzeel, as Guni, as Jezer, as Shillem. 25Ad shoh mec Bilhah, hug Laban da Rachel e inneen, as dymmyrk ee ad shoh da Jacob, va ooilley ny anmeenyn shiaght. 26Ooilley ny anmeenyn haink marish Jacob gys Egypt, haink jeh e chorp, cheu-mooie jeh mraane-chleuin Yacob, va ooilley ny anmeenyn shoh three-feed as shey: 27As mec Yoseph, va ruggit da ayns Egypt, va daa phersoon: va ooilley ny persoonyn jeh thie Yacob haink gys Egypt, three-feed as jeih.

28As hug eh Judah roish er chaghteraght gys Joseph, dy chur er y raad eh gys Goshen; as gys thalloo Ghoshen haink ad. 29As hooar Joseph e ainagh aarloo, as hie eh seose quail Israel e ayr gys Goshen; as haink eh ’syn enish echey, as huitt eh er e wannal, as cheayn eh er e wannal, son tammylt mie. 30As dooyrt Israel rish Joseph, Lhig dou baase y gheddyn, nish dy vel mec er vakin dt’eddin, as dy vel oo foast bio. 31As dooyrt Joseph rish e vraaraghyn, as rish lught-thie e ayrey Hem’s seose, as insh-ym da Pharaoh, as jir-ym rish, Ta my vraaraghyn, as lught-thie m’ayrey, v’ayns cheer Chanaan, er jeet hym’s. 32As she bochillyn ny deiney: son ta’n cheird oc er ve dy ghellal ayns ollagh: as t’ad er goyrt lhieu nyn shioltaneyn, as nyn immanyn, as ooilley ny t’oc. 33As hig eh gy-kione, tra ver Pharaoh fys erriu, as tra jir eh, Cre ta nyn geird? 34Dy jir shiuish, Ta aght beaghee dty harvaantyn er ve mysh ollagh veih nyn aegid, eer derrey nish, chammah shinyn, as myrgeddin nyn ayraghyn: dy vod shiu beaghey ayns cheer Ghoshen; son ta dy chooilley vochill dwoaiagh ayns shilley ny Egyptianee.