CAB. XLVIII

1As haink eh gy-kione lurg ny reddyn shoh, dy row eh er ny insh da Joseph, Cur-my-ner, ta dty ayr ching: as ghow eh marish e ghaa vac, Manasseh as Ephraim. 2As dinsh ad da Jacob, gra, Cur-my-ner ta dty vac Joseph, cheet dy dty yeeaghyn: as hrog shoh cree Israel, dy hoie eh seose ’sy lhiabbee. 3As dooyrt Jacob, Hoilshee Jee ooilley-niartal eh hene dooys ec Luz, ayns cheer Chanaan, as vannee eh mee. 4As dooyrt eh rhym, Cur-my-ner, neem’s uss messoil, as bishee-ym oo, as ver-ym er earroo dy leih dy heet jeed; as ver-yms y cheer shoh, da dty luight dty yeï, son eiraght dy bragh farraghtyn. 5As nish er son dty ghaa vac, Ephraim as Manasseh, va ruggit dhyt ayns cheer Egypt, roish my daink mish hood gys Egypt, she lhiam’s ad: myr Reuben as Simeon, bee ad lhiam’s.

6As dty luight, nee uss y gheddyn ny lurg oc, lhiat’s vees ad, as bee ad er n’enmys lurg ennym nyn mraaraghyn ayns yn eiraght oc. 7As er my hon’s, tra haink mee veih Padan, hooar Rachel baase liorym, ayns cheer Chanaan, er y raad, tra nagh row foast agh tammylt beg dy raad dy gholl gys Ephrath: as doanluck mee ee ayns shen, ayns raad Ephrath, ta’n boayl cheddin Beth-lehem. 8As yeeagh Israel er mec Yoseph, as dooyrt eh, Quoi ad shoh? 9As dooyrt Joseph rish e ayr, Ny mec aym’s ad, ta Jee er choyrt dou ’syn ynnyd shoh: as dooyrt eh, Cur lhiat ad, ta mee guee ort, hym’s, as ver-ym my vannaght daue. 10Nish va sooillyn Israel moal lesh eash, myr shen nagh b’leayr da dy mie; as hug eh lesh ad er-gerrey da; as phaag eh ad, as ghow eh ad ayns e roihaghyn. 11As dooyrt Israel rish Joseph, Cha smooinee mee d’akin dt’eddin: as cur-my-ner, ta Jee er yeeaghyn dou dty luight myrgeddin. 12As ghow Joseph ad veih eddyr e ghlioonyn, as chroym eh sheese lesh e eddin gys y thalloo. 13As ghow Joseph ad nyn-neesht, Ephraim ’sy laue yesh, gys laue chiare Israel; as Manasseh ’sy laue chiare, gys laue yesh Israel, as hug eh lesh ad er-gerrey da. 14As heeyn Israel magh e laue yesh, as lhie eh eh er kione Ephraim, va’n er saa, as e laue chiare er kione Manasseh; leeideil e laueyn dy tastagh; son Manasseh va’n er shinney.

15As vannee eh Joseph, as dooyrt eh, Jee, kiongoyrt rishyn ren my ayraghyn Abraham as Isaac gimmeeaght, y Jee ta er m’y niartaghey ooilley earish my vea, derrey’n laa t’ayn jiu; 16Yn ainle ren mish y livrey veih dy chooilley olk, dy bannee eh ny scollagyn; as lhig m’ennym’s ve orroo, as ennym m’ayraghyn Abraham as Isaac: as lhig daue bishaghey gys earrooyn dy leih, ayns mean y theihll. 17As tra honnick Joseph, dy dug e ayr e laue yesh er kione Ephraim, cha by-laik lesh eh: as hrog eh seose laue e ayrey, dy scughey eh veih kione Ephraim gys kione Manasseh. 18As dooyrt Joseph rish e ayr, Cha nee myr shen, m’ayr: son eh shoh yn fer shinney; cur dty laue yesh er y chione echeysyn. 19As dob e ayr, as dooyrt eh, Ta fys aym er, my vac, ta fys aym er: hig eshyn myrgeddin dy ve pobble, as bee eh myrgeddin pooaral: agh dy firrinagh bee e vraar saa ny s’pooaral ny eshyn, as hig e luight dy ve earroo dy ashoonyn. 20As vannee eh ad yn laa shen, gra, Aynyd’s nee Israel bannaghey, gra, Dy giall Jee dhyt dy ve myr Ephraim as Manasseh, as ren eh soiagh jeh Ephraim roish Manasseh. 21As dooyrt Israel rish Joseph, Cur-my-ner, ta my vaase er-gerrey: agh bee Jee mêriuish, as ver eh lesh shiu reesht gys cheer nyn ayraghyn. 22Ta mee myrgeddin er choyrt dhyt chooid-ronney sodjey, erskyn dty vraaraghyn, ghow mee ass laue yn Amorite lesh my chliwe, as lesh my vhow.