CAB. L

1As chroym Joseph er eddin e ayrey as cheayn eh harrish, as phaag eh eh. 2As doardee Joseph da e harvaantyn ny fir-lhee, dy choyrt spiceyn er corp e ayrey [dy reayll eh veih loauys] as ren ny fir-lhee corp Israel y spiceal. 3As va da-eed laa er ny chooilleeney er e hon (son choud shen ta er nyn gooilleeney ny laghyn ocsyn ta jeant seose lesh spiceyn ry-hoi freayll) as ren ny Egyptianee dobberan er e hon three-feed laa as jeih. 4As tra va laghyn y dobberan er e hon ec kione, loayr Joseph rish lught-thie Pharaoh, gra, My ta mee nish er gheddyn foayr ayns y chilley eu, loayr-jee, ta mee guee erriu, ayns clashtyn Pharaoh, gra, 5Hug m’ayr orrym breearrey, gra, cur-my-ner, ta mish goll dy baase: ayns yn oaie, ta mee er chiarail dou hene ayns cheer Chanaan, ayns shen nee uss mish y oanluckey: nish, er-yn-oyr shoh, lhig dou goll seose, ta mee guee ort, dy oanluckey m’ayr, as hig-ym reesht. 6As dooyrt Pharaoh, Immee seose, as jean dt’ayr y oanluckey, cordail rish y breearrey t’ou er ghoaill.

7As hie Joseph seose dy oanluckey e ayr; as mârishyn hie seose ooilley sharvaantyn Pharaoh, shanstyr e hie, as ooilley shanstyr cheer Egypt. 8As ooilley thie Yoseph, as e vraaraghyn, as thie e ayrey: cha daag ad agh y vooinjer veggey oc, as ny shioltaneyn, as ny immanyn oc ayns thalloo Ghoshen. 9As hie seose mârish, chammah fainee as markee: as v’ad sheshaght feer vooar. 10As haink as gys laare-arroo Atad, ta er cheu elley dy Yordan, as ayns shen ren ad dobberan ard as feer trimshagh er-e-skyn: as ren eh dobberan son e ayr shiaght laa. 11As tra honnick cummaltee’n cheer, ny Canaaniteyn, y dobberan ayns laare Atad, dooyrt ad, Ta shoh dobberan trome da ny Egyptianee: shen-y-fa, ta’n boayl shen enmyssit Abel-mizraim, t’er cheu elley Yordan. 12As ren e vec rish, cordail myr hug eh currym orroo. 13Son hug e vec lhieu eh gys cheer Chanaan; as doanluck ad eh ayns lhiaght magher Machpelah; chionnee Abraham marish y vagher, son grunt oanluckee, veih Ephron yn Hittite, er-gerrey da Mamre.

14As hyndaa Joseph reesht gys Egypt, eh hene as e vraaraghyn, as ooilley ny hie seose mârish dy oanluckey e ayr, erreish da ve er n’oanluckey e ayr. 15As tra honnick braaraghyn Yoseph dy row nyn ayr marroo, dooyrt ad, Foddee dy der Joseph dwoaie dooin, as gowee eh son shickyrys cooilleeney orrin son ooilley’n olk ren shin rish. 16As hug ad chaghteryn gys Joseph, gra Hug dt’ayr sarey my dooar eh baase, gra, 17Myr shoh nee shiu loayrt rish Joseph, Leih, ta mee guee ort nish, aggair dty harvaantyn, as y loght oc: son ren ad dy olk rhyt: as nish, ta shin guee ort, leih peccah sharvaantyn Yee dt’ayrey. As cheayn Joseph, tra loayr ad rish. 18As hie e vraaraghyn myrgeddin, as huitt ad sheese ’syn enish echey, as dooyrt ad, Cur-my-ner, ta shinyn dty harvaantyn. 19As dooyrt Joseph roo, Ny gow-jee aggle: son vel mish ayns ynnyd Yee? 20Agh er ny son euish, ren shiu smooinaghtyn dy olk m’oï; agh chiare Jee eh son bannaght, dy chur lesh eh mygeayrt, myr te er y laa t’ayn jiu, dy hauail mooarane pobble bio. 21Nish er-y-fa shen, ny gow-jee aggle: neem’s shiuish as nyn gloan y veaghey: as ren eh ad y gherjaghey, as loayr eh dy dooie roo.

22As ren Joseph beaghey ayns Egypt, eh hene as thie e ayrey: as eash Yoseph va queig-feed as jeh bleeaney. 23As honnick Joseph cloan Ephraim, jeh’n trass heeloghe: myrgeddin va cloan Vachir, mac Vanasseh, troggit seose er glioonyn Yoseph. 24As dooyrt Joseph rish e vraaraghyn, Ta my vaase er-gerrey: as nee Jee son shickyrys jeeaghyn erriu, as ver eh lesh shiu ass y cheer shoh, gys y cheer yiall eh liorish breearrey da Abraham, da Isaac, as Jacob. 25As ghow Joseph loo jeh cloan Israel, gra, Nee Jee son shickyrys jeeaghyn erriu, as ver shiu lhieu seose my chraueyn veih shoh. 26Myr shoh hooar Joseph baase, as va e eash queig-feed as jeih bleeaney: as ren ad yn corp echey ’spiceal, ad v’eh er ny choyrt ayns coffin ayns Egypt.