CAB. I

1Yn errey trome hug Habakkuk y phadeyr my-ner. 2O Hiarn, caïd nee’m geamagh, as cha jean oo clashtyn! eer geamagh dy ard hood, mychione tranlaase, as cha jean oo sauail! 3Cre’n-fa t’ou jeeaghyn dou mee-chairys, as gêginaghey mee dy chur-my-ner seaghyn? son ta spooilley as tranlaase kiongoyrt rhym: as ta nyn lheid ayn ta greesaghey seose streeu as boirey. 4Shen-y-fa ta’n leigh er ny lhaggaghey, as cha vel briwnys goll magh lesh bree: son ta ny mee-chrauee jannoo tranlaase er y vooinjer chairal: shen-y-fa ta briwnys aggairagh goaill niart.

5Cur-jee my-ner shiuish ta mastey ny ashoonee, as gow-jee tastey as yindys mooar: son neem’s obbyr y chooilleeney ayns ny laghyn euish, nagh jean shiu credjal, ga dy bee eh er ny hickyraghey diu. 6Son cur-my-ner, nee’m greinnaghey seose ny Caldeanee, yn ashoon elgyssagh shen as gaskeydagh, nee marchal trooid lheead y cheer, dy ghoaill daue hene cummallyn, nagh vel nyn eiraght. 7T’ad agglagh as atchimagh: hig nyn mriwnys, as nyn ooashley magh voue hene. 8Ta ny cabbil oc neesht ny s’bieau na ny leopardyn, as ny s’barbagh na moddee-oaldey yn astyr: as nee nyn markee lhiggey mygeayrt, as hig nyn markee veih cheer foddey, nee ad getlagh myr urley ta jollyssagh er y chragh. 9Hig ad ooilley son tranlaase: nee nyn eddinyn spongey myr y gheay-niar, as nee ad chaglym cappeeys myr y gheinnagh. 10Cha jean ad agh craid mysh reeaghyn, as bee ny deiney ooasle ayns faghid oc: cha jean ad soiaghey scansh jeh ynnyd lajer erbee, son nee ad tilgey seose carnaneyn-caggee as goaill eh. 11Eisht bee e chree er ny chaghlaa, as hed eh magh fo kerraghey, son lhiasaghey shoh e phooar gys e yee.

12Nagh vel uss er-dy-rieau, O Hiarn my Yee, my er-casherick? cha vow mayd baase: O Hiarn, t’ou er vaagail magh ad son briwnys; as, O Yee niartal, t’ou er chiarail ad cour smaghtaghey. 13T’ou uss jeh sooillyn s’glenney na dy chur-my-ner yn olk, as cha vod oo jeeaghyn er mee-chairys: cre’n-fa t’ou lhiggey lhieusyn ta dellal dy molteyragh, as t’ou dty host, tra ta’n mee-chrauee stroie yn dooinney ta ny s’ynrick na eh-hene? 14As t’ou jannoo deiney myr eeastyn ny marrey; myr ny beishteigyn, nagh vel fo reill dooinney erbee. 15T’ad goaill seose ad ooilley lesh dooan: t’ad tayrtyn ad ayns nyn ribbey, as chaglym ad ayns nyn lieen; shen-y-fa t’ad boggyssagh as gennal. 16Shen-y-fa t’ad dy ouralley gys nyn lieen, as lostey incense gys nyn ribbey: son lioroo ta nyn gronney ayns soaillid, as nyn meaghey ayns sonnys. 17Jean ad er-y-fa shen folmaghey nyn lieen, as gyn lhaggaghey dy stroie ny ashoonyn?