CAB. II

1Nee’m shassoo er my arrey, as soie-ym er y toor, as freill-ym arrey, dy yeeaghyn cre jir eh rhym, as cre’n ansoor ver-ym stiagh, tra hig plaiynt m’oï. 2As dreggyr y Chiarn, as dooyrt eh, Scrieu yn ashlish, as jean eh cronnal er buird screeuee, dy vod eshyn roie ta lhaih eh. 3Son ta’n ashlish foast son traa ry-heet, agh ec y jerrey nee eh loayrt, as cha nee ayns fardail: ga dy vel eh lhiggey shaghey, fark er, son hig eh son shickyrys, cha jean eh cumrail. 4Cur-my-ner, cha vel yn annym echeysyn ta mooaralagh, ynrick ayn: agh bee yn dooinney cairal sauchey liorish e chredjue.

5Dy jarroo myrgeddin son dy vel eh rouanagh ayns feeyn, t’eh ny ghooinney mooaralagh, chamoo t’eh freayll ec y thie, ta mooadaghey e vian myr yn oaie, as t’eh myr y baase, nagh vod ve jeant magh, agh ta cruinnaghey huggey dy chooilley ashoon, as carnaneaghey da hene dy chooilley phobble: 6Nagh jean ad shoh ooilley goaill seose coraa-dorraghey n’oï, as raa floutagh my-e-chione, as gra, Smerg dasyn ta bishaghey shen nagh vel lesh hene! caïd? as dasyn ta laadey eh-hene lesh y chray trome. 7Nagh jean adsyn girree seose doaltattym, nee oo y lhottey, as nagh doostee ad, nee oo y heaghney, as bee oo spooilley daue? 8Er-yn-oyr dy vel uss er roostey ymmodee ashoonyn, nee ooilley fooilliagh yn phobble uss y roostey: kyndagh rish fuill deiney, as son tranlaase y cheer, yn ard-valley, as adsyn ooilley ta cummal ayn.

9Smerg dasyn ta sondagh er cosney aggairagh son e hie! dy vod eh soiaghey e edd dy ard, dy vod eh ve livreït veih roshtyn yn olk. 10T’ou er ghoaill coyrle naareydagh noi dty hie hene, liorish giarey jeh ymmodee pobble, as t’ou er n’yannoo peccah noi dty annym. 11Son nee’n chlagh geamagh ass y voalley, as nee’n jeayst mastey’n fuygh freggyrt eh.

12Smerg dasyn ta troggal balley lesh fuill, as soiaghey seose ard-valley lesh mee-chairys! 13Cur-my-ner, nagh vel eh veih Chiarn ny flaunyssee, dy vel y sleih laboragh ayns yn eer aile, as dy vel y pobble deinagh son eer fardalys? 14Son bee yn thalloo er ny lhieeney lesh tushtey gloyr y Chiarn, myr ta ny ushtaghyn coodaghey diunid ny marrey.

15Smerg dasyn ta coyrt jough da e naboo! ta coyrt dty voteil huggey, as jannoo eh er-meshtey myrgeddin, dy yeeaghyn er nyn nearey! 16T’ou er dty lhieeney lesh nearey son gloyr: iu uss myrgeddin, as lhig da dty nearey ve rooisht: bee cappan laue yesh y Chiarn er ny hyndaa hood’s, as bee tilgey naareydagh er dty ghloyr. 17Son nee tranlaase Lebanon uss y choodaghey: as spooilley maase hug aggle ayndoo, kyndagh rish fuill deiney, as tranlaase y cheer, yn ard-valley, as ooilley ny ta cummal ayn.

18Cre’n foays t’ayns y jalloo grainnit, dy vel yn obbree er ghrainney eh; yn jalloo roit, as y fer-ynsee dy vreagyn, dy vel yn obbree treishteil ayns ny jallooyn balloo, obbyr e laueyn hene? 19Smerg dasyn, ta gra rish y fuygh, Dooisht oo; rish y chlagh yalloo, Trog ort, nee eh m’y ynsaghey! cur-my-ner t’eh coodit harrish lesh airh as argid, agh cha vel yn ennal edyr cheu-sthie jeh. 20Agh ta’n Chiarn ayns e hiamble casherick: lhig da ooilley yn seihll ve ny host kiongoyrt rish.