CAB. I

1Jee, ren ec ymmodee earishyn, as ayns caghlaaghyn dy aghtyn, loayrt ayns y traa t’er n’gholl shaghey rish ny ayraghyn liorish ny phadeyryn, 2T’eh ayns ny laghyn s’jerree shoh er loayrt rooin liorish e Vac, eh t’eh er phointeil ny eirey er dy chooilley nhee, liorish myrgeddin chroo eh ny seihllyn. 3Myr v’eh sollyssid e ghloyr, as eer co-chaslys e phersoon, as cummal seose dy chooilley nhee liorish goo e phooar, tra v’eh liorish hene er ghlenney ersooyl ny peccaghyn ainyn, hoie eh sheese er laue yesh yn ard-ooashley ayns yn yrjid: 4Jeant wheesh shen syrjey na ny ainleyn, myr t’eh liorish eiraght er gheddyn ennym s’ooasle na t’adsyn. 5Son rish quoi jeh ny ainleyn dooyrt eh ec traa erbee, Uss my Vac, jiu ta mee er dty gheddyn? As reesht, Bee’m dasyn son Ayr, as bee eshyn dooys son Mac? 6As reesht, tra t’eh coyrt lesh yn chied-er-ny-gheddyn Mac gys y theihll, t’eh gra, As lhig da ooilley ainleyn Yee ooashley ’choyrt da. 7As mychione ny ainleyn t’eh gra, T’eh jannoo e ainleyn spyrrydyn, as e hirveishee lossey dy aile. 8Agh mychione y Mac t’eh gra, Ta dty stoyl-reeoil, O Yee, son dy bragh as dy bragh; lorg-reill dy chairys lorg-reill yn reeriaght ayd’s. 9T’ou er choyrt graih da cairys, as feoh da mee-chairys; shen-y-fa ta Jee, dy jarroo yn Jee ayd’s, er dty ooilaghey lesh yn ooil dy ghennallys erskyn dty heshaghyn. 10As, T’ou uss, Hiarn, ’sy toshiaght er hoiaghey undin y thallooin; as ta ny niaughyn obbraghyn dty laueyn. 11Nee adsyn cherraghtyn, agh t’ou uss er-mayrn; as nee ad ooilley gaase shenn goll-rish garmad; 12As myr coamrey nee uss filley ad seose, as bee ad er nyn gaghlaa; agh uss yn fer cheddin, as cha jean dty vleeantyn failleil. 13Agh rish quoi jeh ny ainleyn dooyrt eh ec traa erbee, Soie er my laue yesh, derrey nee’m dty noidyn y yannoo stoyl dty choshey? 14Nagh nee spyrrydyn shirveishagh ad ooilley er nyn goyrt magh dy hirveish orroosyn vees eiraghyn dy haualtys?