CAB. X

1Cha vod y leigh, nagh vel agh scaa jeh reddyn mie ry-heet, as cha nee cummey firrinagh ny reddyn hene, dy bragh lesh ny ourallyn shen ren ad chebbal kinjagh bleïn lurg bleïn, adsyn ta cheet huc y chasherickey. 2Son eisht veagh jerrey er chebbal ny ourallyn shen; er-y-fa nagh beagh ocsyn va cur ooashley, erreish daue ve un cheayrt er nyn ghlenney, loght peccah veg sodjey er nyn gooinsheanseyn. 3Agh ayns ny ourallyn shen ta cooinaghtyn jeant reesht jeh peccaghyn dy chooilley vleïn. 4Son cha vel eh possible dy jinnagh fuill terriu as goair goaill ersooyl peccaghyn. 5Shen-y-fa tra t’eh cheet gys y theihll, t’eh gra, Oural as chebbal cha bailt’s, agh corp t’ou er chummey er my hon: 6Ayns ourallyn-losht, as ourallyn son peccah cha vel uss er ghoaill taitnys: 7Eisht dooyrt mee, Cur-my-ner, ta mee cheet (ayns toshiaght y lioar te scruit jeem’s) dy yannoo dty aigney’s, O Yee. 8Roïe, tra dooyrt eh, Oural as chebbal, as chebballyn-losht as chebbal son peccah cha bailt’s, chamoo va taitnys ayd’s ayndoo, (ta chebbit liorish y leigh;) 9Eisht dooyrt eh, Cur-my-ner, ta mee cheet dy yannoo dty aigney, O Yee. T’eh coyrt ergooyl shen ny va hoshiaght, dy vod eh niartaghey shen ny va er-jerrey. 10Liorish yn aigney cheddin ta shin er nyn gasherickey, liorish yn oural jeh corp Yeesey Creest un cheayrt son ooilley. 11As ta dy chooilley haggyrt shassoo dagh laa shirveish, as chebbal dy mennick ny ourallyn cheddin, nagh vod dy bragh peccaghyn y ghoaill ersooyl: 12Agh ta’n dooinney shoh, erreish da ve er hebbal un oural son peccaghyn, son dy bragh er hoie sheese ec laue yesh Yee; 13Veih’n traa shoh magh farkiagh derrey vees e noidyn jeant stoyl e choshey. 14Son liorish un oural t’eh er heyrey adsyn son dy bragh ta er nyn gasherickey: 15Jeh shoh ta’n Spyrryd Noo myrgeddin feanish dooin: son lurg da roïe ve er ghra, 16Shoh yn conaant neem’s y yannoo roo lurg ny laghyn shen, ta’n Chiarn dy ghra, My leighyn ver-yms ayns ny creeaghyn oc, as ayns nyn aignaghyn neem’s ad y scrieu; 17As er ny peccaghyn as y vee-chairys oc cha gooin-ym ny smoo. 18Nish raad ta leih jeh ny reddyn shoh, cha vel oural erbee sodjey son peccah. 19Fakin er-y-fa shen, my chaarjyn, dy vel ain reamys dy gholl stiagh gys yn ynnyd smoo casherick liorish fuill Yeesey, 20Liorish raad noa as bio, t’eh er chasherickey er nyn son trooid y coodaghey, ta shen dy ghra, yn eill echey hene: 21As dy vel ain ard-saggyrt harrish lught-thie Yee; 22Lhig dooin tayrn er-gerrey lesh cree firrinagh, ayns slane shickyrys dy chredjue, liorish nyn greeaghyn v’er nyn ghlenney veih drogh chooinsheanse, as nyn girp er nyn niee lesh ushtey glen. 23Lhig dooin cummal shickyr goaill rish nyn gredjue fegooish scughey; (son t’eshyn firrinagh ta er ghialdyn:) 24As lhig dooin smooinaghtyn dy dowin ry-cheilley, dy ghreinnaghey gys graih, as gys obbraghyn mie: 25Cha nee treigeil yn chaglym cooidjagh ain hene, myr ta cliaghtey paart; agh coyrlaghey yn derrey yeh yn jeh elley: as wheesh shen smoo, myr ta shiu fakin yn laa tayrn er-gerrey. 26Son my nee mayd peccah jeh nyn yoïn, lurg dooin v’er gheddyn toiggal jeh’n irriney, cha vel nyn gour oural arragh son peccaghyn, 27Agh farkiaght agglagh son briwnys, as jymmoose aileagh, nee adsyn y stroie ta shassoo magh. 28Va eshyn ren beg y hoiaghey jeh leigh Voses, er ny choyrt dy baase dyn myghin, fo ghaa ny three dy eanishyn: 29Cre’n kerraghey foddey s’trimmey, ta shiuish smooinaghtyn, t’eshyn dy hoilchin, t’er stampey fo-chosh Mac Yee, as ta er choontey fuill yn chonaant liorish v’eh er ny chasherickey, ny red neu-chasherick, as er hassoo magh dy olkyssagh noi’n Spyrryd dy ghrayse? 30Son shione dooin eshyn ren gra, Dooys te bentyn dy ghoaill kerraghey, Mish nee cooilleeney, ta’n Chiarn gra. As reesht, Nee’n Chiarn briwnys e phobble. 31Te red agglagh dy huittym ayns laueyn y Jee bio. 32Agh cooinee-jee er ny laghyn t’er n’gholl shaghey, ayndoo tra haink shiu gys soilshey’n tushtal, chum shiu rish dy dunnal fo’n laad trome dy heaghyn. 33Ayns ayrn tra va shiu soit magh son shilley dy ghannidys daue, chammah liorish oltooanyn as seaghyn; as ayns ayrn tra va shiu nyn sheshee dauesyn hurr y dellal cheddin. 34Son va chymmey eu orrym’s ayns my gheulaghyn, as ghow shiu dy arryltagh rish spooilley nyn gooid, toiggal ayndiu hene dy vel nyn gour cooid share as s’beayn ayns niau. 35Ny lhig-jee veue, er-y-fa shen, yn dunnallys eu, nyn gour ta leagh mooar dy chooilleeney. 36Son te ymmyrchagh diu dy chummal rish dy surransagh; lurg diu v’er n’yannoo aigney Yee, dy vod shiu yn gialdyn y gheddyn. 37Foast son tammylt beg, eshyn ta ry-hoi heet nee eh cheet, as cha lhig eh shaghey. 38Son bee’n dooinney cairagh er ny hauail liorish credjue: agh my ver dooinney erbee cooyl gys y chredjue, cha gow m’annym veg y taitnys ayn. 39Agh cha vel shin jeh nyn lheid ta tayrn back gys y toyrt-mow oc hene; agh jeusyn ta credjal, gys saualtys anmey.