CAB. XI

1Nish ta credjue slane bree ny reddyn ta shin treishteil dy gheddyn, shickyrys reddyn nagh vel [foast] ry-akin. 2Son liorish ren ny shenn-ayryn cosney goo mie. 3Trooid credjue ta shin toiggal dy row ny seihllyn er nyn groo liorish goo Yee, myr shen nagh row ny reddyn ta ry-akin jeant jeh stoo erbee dy row eisht ayn. 4Liorish credjue ren Abel chebbal gys Jee oural s’ooasle na Cain, liorish hooar eh feanish, dy row eh cairagh, Jee soiaghey jeh e ghiootyn: as liorish shoh ga dy vel eh marroo, t’eh foast loayrt. 5Liorish credjue va Enoch goit seose gys niau fegooish fakin baase; as cha row eh ry-gheddyn, er-yn-oyr dy row Jee er ghoaill eh: son roish da v’er ny ghoaill seose va’n feanish shoh echey, dy ren eh Jee y wooiys. 6Agh fegooish credjue te neu-phossible eshyn y wooiys: son eshyn ta cheet gys Jee, shegin da credjal dy vel Jee ayn, as dy vel eh cooilleeney adsyn ta dy imneagh shirrey huggey. 7Liorish credjue, Noah, myr va raaue er ny choyrt da liorish Jee mychione reddyn nagh row foast ry-akin, greinnit lesh aggle, ren eh arg y hroggal dy hauail e lught-thie: liorish shoh ren eh yn seihll y gheyrey, as haink eh dy ve eirey jeh’n chairys shen ta liorish credjue. 8Liorish credjue tra va Abraham er ny eam dy gholl magh gys ynnyd v’eh lurg shen dy gheddyn son eiraght, v’eh biallagh; as jimmee eh magh, gyn fys echey cre gys v’eh goll. 9Liorish credjue v’eh ny hroailtagh ayns cheer y ghialdynys, myr ayns cheer yoarree, cummal ayns cabbaneyn marish Isaac as Jacob, co-eiraghyn mârishyn ’sy ghialdynys cheddin. 10Son v’eh jerkal rish ard-valley er undinyn [shickyr], jeant as troggit liorish Jee. 11Trooid credjue hooar Sara ee-hene niart dy ghientyn, as ren ee lhiannoo y ymmyrkey lurg y traa cooie, er-yn-oyr dy row ee jeeaghyn ersyn dy ve firrinagh va er ghialdyn. 12Shen-y-fa hrog jeh un ayr, as eshyn chammah as marroo, whilleen as rollageyn yn aer ayns earroo, as myr y gheinnagh rish oirr ny marrey erskyn coontey. 13Hooar ad shoh ooilley baase ayns credjue, fegooish geddyn ny gialdynyn, agh cronnaghey ad foddey jeh, as treishteil dy shickyr ayndoo, as ghow ad rish dy nee joarreeyn as troailtee v’ad er y thalloo. 14Son t’adsyn ta gra lheid ny reddyn, soilshaghey dy plain dy vel ad jeeaghyn son cheer [elley.] 15As dy firrinagh dy beagh nyn aigney gys y cheer shen, voish haink ad, va caa oc dy hyndaa huggey reesht: 16Agh nish t’ad geearree cheer share, ta shen, cheer flaunyssagh: shen-y-fa cha vel Jee mooaraghey dy ve enmyssit yn Jee ocsyn: son t’eh er chiarail ard-valley er nyn son. 17Liorish credjue ren Abraham tra v’eh er ny phrowal, chebbal seose Isaac: as ren eshyn hooar ny gialdynyn e ynrycan er-ny-gheddyn mac y hebbal seose: 18My-e-chione ve er ny ghra, Ayns Isaac bee dty luight er ny enmys: 19Coontey dy row Jee abyl dy hroggal eh seose, eer veih ny merriu: voish shen myrgeddin hooar eh eh ayns caslys. 20Liorish credjue ren Isaac Jacob as Esau y vannaghey mychione reddyn va ry-heet. 21Liorish credjue ren Jacob tra v’eh er y lhiabbee-vaaish, daa vac Yoseph y vannaghey; as hug eh ooashley, croymmey er kione e lorg. 22Liorish credjue ren Joseph roish e vaase, loayrt mychione immeeaght cloan Israel; as hug eh sarey mychione e chraueyn. 23Liorish credjue va Moses tra ruggyr eh, keillit three meeghyn liorish e ayr as e voir, er-yn-oyr dy vaik ad dy row eh ny lhiannoo aalin; as cha row aggle orroo roish sarey’n ree. 24Liorish credjue tra va Moses er jeet gys eash, dob eh dy ve enmyssit mac inneen Pharaoh; 25Goaill myr reih dy hurranse seaghyn marish pobble Yee, na dy ghoaill soylley jeh eunys peccah son earish; 26Jeeaghyn er oltooan Chreest berchys smoo na tashtaghyn Egypt; son va sooill echey gys cooilleen yn leagh. 27Liorish credjue daag eh Egypt, gyn aggle er roish jymmoose y ree: son ren eh gymmyrkey eh dy dunnal, myr ’sy chilley echeysyn ta ass fakin. 28Liorish credjue dreill eh yn chaisht, as spreih yn uill, nagh jinnagh eshyn ren stroie yn chied-er-ny-ruggey lhie e laue orroo. 29Liorish credjue hie ad trooid y Faarkey Jiarg, myr er thalloo chirrym: y lheid cheddin tra ghow ny Egyptianee orroo dy yannoo, v’ad baiht. 30Liorish credjue huitt voallaghyn Yericho, lurg daue ve combaasit mygeayrt shiaght laa. 31Liorish credjue ve, nagh ren yn ven-oast Rahab cherraghtyn mâroosyn nagh ren credjal, tra hug ee oltagh-bea da ny brialtee ayns shee. 32As cre jir-ym ny sodjey? son yinnagh y traa failleil mee dy insh mychione Gideon, as Barak, as Samson, as Jephthae, mychione David myrgeddin as Samuel, as mychione ny phadeyryn: 33Ren trooid credjue yn varriaght y gheddyn harrish reeriaghtyn, dobbree ad cairys, hooar gialdynyn jeant mie daue, yeigh beïll lionyn, 34Ren niart yn aile y vooghey, scape ad foyr y chliwe, ayns annooinid v’ad er nyn niartaghey, daase ad dunnal ayns caggey, hug er sheshaghtyn-caggee ny joarreeyn dy roie er-chea. 35Hooar mraane nyn merriu troggit gys bioys reesht: as feallagh elley v’er nyn dorchaghey, gyn jannoo soiagh jeh livrey-ys; dy voddagh ad irree-seose-reesht share y chosney. 36As va feallagh elley er nyn browal lesh craid dewil, as scuitchal, dy jarroo myrgeddin lesh geulaghyn as pryssooney. 37V’ad er nyn glaghey, v’ad giarit veih-my-cheilley lesh saaueyn, v’ad miolit, v’ad er nyn goyrt dy baase lesh y chliwe: hie ad noon as noal ayns craitnyn keyrragh, as craitnyn goair, ayns êgin, ayns seaghyn, as torchaghyn: 38(Jeu shoh cha row yn seihll feeu) v’ad er-chea ayns faasaghyn, as ayns sleityn, as ayns ooigyn as guaggyn ny hooirey. 39As ga dy dooar ad shoh ooilley goo mie trooid credjue, ny-yeih cha daink ad gys cooilleen yn ghialdynys: 40Jee kiarail foayr syrjey er nyn son, nagh voghe adsyn fegooish shinyn yn slane bannaght dy haualtys.