CAB. XII

1Shen-y-fa fakin dy vel shinyn myrgeddin combaasit mygeayrt lesh lheid yn earroo [ooasle] dy eanishyn, lhig dooin cur voïn dy chooilley hrimmid, as y peccah shen ta cha aarloo dy nyn lhiettal, as lhig dooin dy jeean roie yn race ta soit kiongoyrt rooin, 2Jeeaghyn gys Yeesey toshiaght as bun nyn gredjue; ren, son yn eunys va soit kiongoyrt rish, surranse y chrosh, soiaghey beg jeh’n nearey, as t’eh er hoie sheese er laue yesh stoyl-reeoil Yee. 3Son smooinee-jee ersyn ren gymmyrkey lheid ny oltooanyn veih peccee n’oï hene, er-aggle dy jean shiu lhaggaghey er y raad, as coayl nyn gree. 4Cha vel shiu er chummal rish gys deayrtey folley, gleck noi peccah. 5As ta shiu er yarrood yn raaue ta loayrt riu myr rish cloan, My vac, ny soie uss beg jeh smaght y Chiarn, chamoo lhig dty chree voïd tra t’eh coyrt seaghyn dty raad. 6Son ta’n Chiarn smaghtaghey eshyn shynney lesh, as kerraghey dy chooilley vac t’eh goaill-rish. 7My ta shiu gymmyrkey fo smaght dy meen, ta Jee dellal riu myr rish mec: son quoi’n mac shen nagh vel e ayr dy smaghtaghey? 8Agh my ta shiu fegooish smaght, jeh ta ooilley goaill ayrn, eisht ta shiu nyn gloan oainjyragh, as cha nee mec. 9Ny-sodjey, ta er ve ain ayraghyn dooghyssagh, dreill shin fo smaght, as hug shin arrym daue: nagh der mayd eisht foddey sleaie biallys da Ayr ny spyrrydyn, as ve bio? 10Son ren adsyn dy feer son earish ghiare shin y smaghtaghey, myr honnick ad eh ymmyrchagh; agh eshyn son foays dooin, dy voddagh shin ve goaill ayrn jeh’n chasherickys echey. 11Nish cha vel shin jeeaghyn er smaght erbee, choud as ta shin fo, dy ve gerjoilagh, agh piandagh: agh ec y jerrey te gymmyrkey yn mess sheeoil dy chairys, dauesyn ta er ve er nyn gerraghey liorish. 12Shen-y-fa trog-jee seose ny laueyn gyn bree, as ny glioonyn annoon. 13As jean-jee raaidyn rea son nyn gassyn, er-aggle dy bee yn baccagh chyndaït jeh’n raad, agh dy vod eh dy jarroo ve er ny niartaghey. 14Eiyr-jee da shee rish dy chooilley ghooinney, as da craueeaght, n’egooish cha vod dooinney erbee yn Chiarn y akin. 15Jeeaghyn dy imneagh, nagh duitt dooinney erbee giare jeh grayse Yee; er-aggle dy jean fraue erbee dy herriuid gaase seose, shiu y voirey, as ymmodee liorish shen er nyn byshooney: 16Er-aggle dy bee maarderagh erbee, ny persoon erbee mee-chrauee, myr Esau, ren son un lhongey dy vee e eiraght y chreck. 17Son ta fys eu kys ny lurg shen tra v’eh aggindagh dy gheddyn yn eiraght marish y bannaght, v’eh er ny yiooldey: son cha row saase son caghlaa-aigney ’sy chooish, ga dy ren eh aghin dy jeean lesh jeïr. 18Son cha vel shiuish er jeet gys y chronk oddagh ve er ny ventyn rish, as ren lossey lesh aile, ny gys dooid, as dorraghys, as dorrin, 19As feiyr y chayrn, as coraa ny goan, yn coraa cheddin ren adsyn cheayll eh geearree nagh beagh yn goo er ny loayrt roo er yn aght shen reesht: 20(Son cha row ad abyl dy ymmyrkey shen ny va er ny harey, As my harragh agh baagh er-gerrey da’n slieau, dy row eh dy ve er ny chlaghey, ny er ny roie trooid lesh shleiy. 21As cha atchimagh shen va’n shilley, dy dooyrt Moses, Ta mee dy mooar er-creau as agglit) 22Agh ta shiuish er jeet gys cronk Sion, as gys ard-valley yn Jee bio, yn Jerusalem flaunyssagh, as gys sheshaght erskyn earroo dy ainleyn. 23Gys y slane chaglym-cooidjagh as agglish ny chied nooghyn, ta recortyssit ayns niau, as gys Jee yn briw harrish ooilley, as gys spyrrydyn deiney mie ayns flaunys, 24As gys Yeesey ta eddyr Jee as dooinney fo’n chonaant noa, as gys yn uill v’er ny gheayrtey, ta loayrt reddyn share na fuill Abel. 25Jeeagh-jee nagh der shiu cooyl rishyn ta loayrt: son mannagh ren adsyn scapail hug cooyl rishyn ren loayrt er y thalloo, foddey smoo cha jig eh lhienyn, my hyndaa-ys mayd ersooyl voishyn ta loayrt veih niau: 26E choraa ren ec y traa shen yn thalloo y chraa: agh nish t’eh er ghialdyn, gra, Foast keayrt elley nee’m craa cha nee ynrycan y thalloo, agh niau myrgeddin. 27As ta’n raa shoh, Foast keayrt elley, cowraghey scughey ny reddyn shen ta er ny chraa, myr reddyn ta jeant [son earish], dy vod ny reddyn shen nagh vod v’er ny chraa tannaghtyn. 28Shen-y-fa fakin dy vel shinyn er gheddyn reeriaght nagh vod v’er ny scughey, lhig da grayse ve ain, liorish oddys mayd Jee y hirveish dy booisal, lesh arrym as aggle crauee. 29Son ta’n Jee ainyn myr aile ta coyrt mow.