CAB. XIII

1Lhig da graih braaragh tannaghtyn. 2Ny jarrood-jee dy choyrt oltagh-bea da joarreeyn: son liorish ta paart er choyrt oltagh-bea da ainleyn gyn-yss daue hene. 3Cooinee-jee orroosyn t’ayns geulaghyn, myr ayns geulaghyn mâroo; as orroosyn t’ayns seaghyn, myr ta shin hene myrgeddin ’sy challin. 4Ta poosey onnoroil ayns ooilley, as y lhiabbee gyn-loght: agh maarderee as adsyn ta brishey-poosey nee Jee briwnys. 5Lhig da’n ymmyrkey-bea eu ve fegooish saynt; as bee-jee booiagh lesh lheid as t’eu: son t’eh er ghra, Cha vaag-ym, ny cha dreig-ym oo dy bragh. 6Shen-y-fa fod mayd dy creeoil gra, Ta’n Chiarn my er-coonee, as cha bee aggle orrym jeh ny oddys dooinney y yannoo rhym. 7Cooinee-jee orroosyn t’er n’ymmyrkey reill harrystiu, t’er loayrt riu goo Yee: geiyrt er y chredjue oc, smooinaghtyn er-jerrey nyn ymmyrkey-bea. 8Yeesey Creest yn er cheddin jea, as jiu, as son dy bragh. 9Ny bee-jee er nyn imman noon as noal lesh ymmodee ynsaghyn joarree: son te red mie dy bee’n cree er ny niartaghey lesh grayse, cha nee ayns y leigh mychione bee, nagh vel er ve vondeishagh dauesyn t’er chur tastey daue. 10Ta altar ain nagh vel cairys ocsyn dy ee jeh, ta shirveish yn cabbane-agglish. 11Son ta kirp ny beïyn shen, ta’n uill oc er ny choyrt lesh stiagh ’syn ynnyd casherick liorish yn ard-saggyrt son peccah, losht cheu-mooie jeh’n champ. 12Shen-y-fa ren Yeesey myrgeddin, dy voddagh eh yn pobble y chasherickey lesh e uill hene, surranse cheu-mooie jeh’n ghiat. 13Lhig dooin er-y-fa shen goll magh huggeysyn cheu-mooie jeh’n champ, gymmyrkey yn scammylt echey. 14Son ayns shoh cha vel ain ard-valley shickyr, agh ta shin jerkal rish shen ta ry-heet. 15Liorishyn er-y-fa shen lhig dooin dy kinjagh chebbal gys Jee oural dy voylley, ta shen, mess nyn meillyn, coyrt booise da e ennym. 16Agh dy yannoo mie, as dy rheynn [er ny boghtyn], ny jarrood-jee: son lesh lheid ny ourallyn ta Jee er ny yannoo booiagh. 17Cur-jee biallys dauesyn ta reill harrystiu, as bee-jee arrymagh daue: son t’ad er nyn arrey son ny anmeenyn eu, myr adsyn shegin coontey ’choyrt: dy vod ad shen y yannoo lesh boggey, as cha nee lesh trimshey: son ta shen neu-vondeishagh diu. 18Guee-jee er nyn son: son ta shin treishteil dy vel cooinsheanse vie ain, ayns dy chooilley nhee shirrey dy vaghey dy onneragh. 19Agh ta mee guee erriu ny s’jeean dy yannoo shoh, dy voddym shiu y akin ny sleaie. 20Nish dy jean Jee ny shee hug lesh reesht veih ny merriu nyn Jiarn Yeesey, ard-vochilley ny geyrragh, trooid fuill y chonaant dy bragh farraghtyn, 21Shiuish y niartaghey ayns dy chooilley obbyr vie dy yannoo e aigney, gobbraghey ayndiu shen ta booisal ayns e hilley, trooid Yeesey Creest; huggey dy row gloyr son dy bragh as dy bragh. Amen. 22As ta mee guee erriu, vraaraghyn, gow-jee rish y goo dy choyrle, son ta mee er scrieu hiu ayns focklyn giarey. 23Toig-jee dy vel nyn mraar Timothy ec reamys; mârishyn, my hig eh dy gerrit, hee-ym shiu. 24Bea as slaynt dauesyn ta reill harrishdiu, as da ooilley ny nooghyn. T’adsyn jeh Italy bannaghey diu. 25Grayse dy row mêriu ooilley. Amen.