CAB. III

1Shen-y-fa, vraaraghyn chrauee, paarteeassyn ’syn eam flaunyssagh, cur-jee tastey mie da Yeesey Creest, ostyl as ard-saggyrt nyn gredjue: 2Va firrinagh dasyn ren eh y phointeil, myr va Moses myrgeddin firrinagh ayns ooilley e hie. 3Son va’n dooinney shoh coontit feeu jeh gloyr syrjey na Moses, son wheesh as dy vel eshyn hrog y thie ny s’onnoroil na’n thie hene. 4Son ta dy chooilley hie troggit liorish dooinney ennagh; agh eshyn hrog dy chooilley nhee she Jee eh. 5As dy jarroo va Moses firrinagh ayns ooilley e hie myr sharvaant, son feanish gys ny reddyn va ny lurg shen dy ve focklit magh: 6Agh Creest myr Mac harrish e hie hene: yn thie echeysyn ta shin, my ta shin cummal shickyr y dunnallys as boggey nyn dreishteil gys y jerrey. 7Er-y-fa shen myr ta’n Spyrryd Noo dy ghra, Jiu my nee shiu clashtyn e choraa, 8Ny creoi-jee nyn greeaghyn, myr ayns y vrasnagh, ayns laa yn violagh ayns yn aasagh: 9Tra ren ny ayraghyn eu mish y vrasnaghey, phrow ad mee, as honnick ad m’obbraghyn da-eed bleïn. 10Shen-y-fa va mee corree rish y cheeloghe shoh, as dooyrt mee. T’ad dy kinjagh goll er-shaghryn ayns nyn gree; as cha vel enney er ve oc er my raaidyn. 11Myr shen loo mee ayns my chorree, Cha jed ad stiagh ayns my ea. 12Cur-jee twoaie, vraaraghyn, nagh bee ayns veg eu drogh chree dy vee-chredjue, ayns treigeil y Jee bio. 13Agh coyrlee-jee y cheilley gagh laa, choud as te enmyssit, Yn laa jiu: er-aggle dy bee veg eu er nyn greoghey liorish molteyrys peccah. 14Son ta cairys ain ayns Creest, my ta shin cummal undin nyn marrantys ersyn shickyr gys y jerrey; 15Myr te er ny ghra, Jiu my nee shiu clashtyn e choraa, ny creoi-jee nyn greeaghyn, myr ayns y vrasnagh. 16Son paart, erreish daue clashtyn, ren ad brasnaghey: ny-yeih cha nee ooilley haink ass Egypt marish Moses. 17Agh quoi liorish v’eh er ny vrasnaghey da-eed bleïn? nagh nee lioroosyn v’er n’yannoo peccah, ny callinyn oc huitt ’syn aasagh? 18As quoi da ren eh loo, nagh ragh ad stiagh ’syn ea echey, agh dauesyn nagh ren credjal? 19Myr shen hee mayd nagh voddagh ad goll stiagh kyndagh rish mee-chredjue.