CAB. IV

1Lhig dooin er-y-fa shen aggle y ghoaill, erreish da gialdyn ve faagit dooin dy gholl stiagh ’syn ea echey, dy darragh veg jiu giare jeh. 2Son dooinyn va’n sushtal er ny phreacheil chammah as dauesyn: agh cha row yn goo v’er ny phreacheil jeh vondeish erbee daue, tra nagh row credjue goll lesh ayndoosyn ren clashtyn eh. 3Agh ta shinyn t’er chredjal goll stiagh ayns fea, myr dooyrt eh, Myr loo mee ayns my chorree, nagh ragh ad stiagh ayns m’ea: ga dy row ny obbraghyn harrish er-dy hoshiaght y theihll. 4Son loayr eh ayns lheid y boayl mychione y chiaghtoo laa er yn aght shoh, As ghow Jee fea er y chiaghtoo laa veih ooilley e obbraghyn. 5Agh ayns shoh reesht, Nagh jed ad stiagh ayns m’ea. 6Fakin eisht dy nee shoh myr te dy nhegin da paart goll stiagh, as nagh ren adsyn daue va’n sushtal hoshiaght er ny phreacheil, goll stiagh ayn kyndagh rish mee-chredjue: 7Reesht, t’eh pointeil laa, gra ayns lioar Ghavid, Jiu, lurg choud shen dy earish; myr te er ny ghra, Jiu my nee shiu clashtyn e choraa, ny creoi-jee nyn greeaghyn. 8Son my veagh Joshua er chur fea daue, cha row eh ny lurg shen er loayrt mychione laa elley. 9Ta laa dy ea er-y-fa shen cour pobble Yee. 10Son eshyn t’er n’gholl stiagh ayns y fea echey, t’eh er scuirr myrgeddin veih e obbraghyn, myr ren Jee veih e obbraghyn hene. 11Lhig dooinyn er-y-fa shen streeu dy gholl stiagh ayns y fea shen er-aggle dy duitt dooinney erbee lurg y sampleyr cheddin dy vee-viallys. 12Son ta goo Yee bioal, as breeoil, as ny s’gyerey na cliwe erbee dy ghaa foyr, roie trooid gys eer rheynn veih-my-cheilley yn annym as y spyrryd, as ny juntyn as y smuir, as ronsaghey magh smooinaghtyn as kiarailyn y chree. 13Chamoo ta cretoor erbee keillit ayns e enish: agh ta dy chooilley nhee rooisht as foshlit gys ny sooillyn echeysyn, da ta shin dy choyrt coontey. 14Fakin dy vel ain eisht ard-saggyrt ooasle, t’er n’gholl stiagh ayns ny niaughyn, Yeesey Mac Yee, lhig dooin cummal shickyr nyn gredjue. 15Son cha vel ain ard-saggyrt nagh vel ennaghtyn chymmoil echey jeh nyn annooinidyn; agh v’eh er dy chooilley aght er ny phrowal lesh seaghyn myr ta shin hene, foast fegooish peccah. 16Lhig dooin er-y-fa shen cheet lesh dunnallys gys stoyl-reeoil e ghrayse; dy vod mayd myghin y chosney, as grayse y gheddyn dy chooney lhien ayns traa feme.