CAB. VI

1Shen-y-fa faagail ny chied vanglaneyn jeh ynsagh Chreest, lhig dooin goll er nyn doshiaght gys slane Creestiaght, cha nee soiaghey reesht yn undin dy arrys veih obbraghyn marroo, as jeh credjue gys Jee, 2Jeh’n ynsagh mychione bashtey, ny jeh goll fo laueyn, as jeh irree-seose-reesht ny merriu, as jeh briwnys dy bragh farraghtyn. 3As shoh nee mayd, lesh kied Yee. 4Son te erskyn-towse doillee dauesyn va un cheayrt er nyn soilshaghey, as t’er vlashtyn yn gioot flaunyssagh, as va goaill ayrn jeh’n Spyrryd Noo, 5As er vlashtyn goo mie Yee, as pooaraghyn y theihll ta ry-heet; 6My huittys ad ersooyl [veih’n chredjue,] dy chosney ad reesht gys arrys; fakin dy vel ad crossey daue hene Mac Yee ass-y-noa, as coyrt eh gys nearey foshlit. 7Son y thalloo ta soo yn fliaghey ta tuittym dy mennick er, as gymmyrkey lossyreeyn cooie er nyn son ocsyn ta dy obbraghey eh, te geddyn bannaght veih Jee: 8Agh ta shen ta gymmyrkey drineyn as dressyn, faagit mooie, as faggys da mollaght; ta’n jerrey echey dy ve losht. 9Agh chaarjyn, ta shin smooinaghtyn ny share jiuish, as reddyn ta bentyn gys saualtys, ga ta shin loayrt myr shoh. 10Son cha vel Jee neu-chairagh, dy jarrood eh ny obbraghyn as y laboraght euish dy ghraih, ta shiu er hoilshaghey er coontey’n ennym echey, ayns dy vel shiu er hirveish er ny nooghyn, as ta foast shirveish [orroo.] 11As ta shin geearree dy jean dagh unnane eu soilshaghey yn imnea cheddin, son y slane shickyrys dy hreishteil gys y jerrey: 12Nagh bee shiu lhag-chreeagh, agh eiyrtyssee orroosyn, ta trooid credjue as meenid er chosney ny gialdynyn. 13Son tra ren Jee gialdyn y yannoo da Abraham, er-yn-oyr nagh voddagh eh loo liorish fer syrjey, loo eh liorish hene, 14Gra, Dy firrinagh, lesh bannaght, nee’m uss y vannaghey, as lesh bishagh, nee’m uss y vishaghey. 15As myr shen lurg da v’er hurranse dy meen, hooar eh cooilleen yn ghialdyn. 16Son ta deiney dy jarroo loo liorishyn s’ooasle ta: as ta loo, dy niartaghey lesh yn irriney, coyrt dy chooilley streeu gys kione. 17Shen-y-fa myr va Jee booiagh er yn aght s’troshey dy hoilshaghey da eiraghyn y ghialdyn shickyrys gyn-caghlaa e aigney, ren eh shoh y niartaghey lesh loo: 18Liorish daa red gyn caghlaa, ayndoo ve neu-phossible da Jee dy volley, dy voddagh gerjagh niartal ’ve ainyn, ta er roie son kymmyrk dy ghoaill greme er y treishteil soit kiongoyrt rooin: 19Yn treishteil shen t’ain myr aker ny hanmey, shickyr as gyn scughey, as ta gentreil gys yn ayrn er cheu-sthie jeh’n ynnyd smoo casherick, 20Raad ta’n chaghter hie roïn er n’gholl stiagh er nyn son, dy jarroo Yeesey, jeant ny ard-saggyrt son dy bragh myr va Melchisedec.