CAB. VII

1Son y Melchisedec shoh ree Salem, saggyrt yn Jee smoo syrjey, hie quail Abraham myr v’eh er y raad veih stroie ny reeaghyn, as vannee eh: 2Da myrgeddin hug Abraham yn jaghee jeh ooilley ny v’echey: va hoshiaght ayns y ghlare ainyn ree yn chairys, as lurg shen myrgeddin, ree Salem, ta shen, ree yn chee; 3Gyn ayr, gyn moir, gyn kynney, nagh row echey edyr toshiaght laghyn, ny jerrey bea; agh jeant casley rish Mac Yee, t’eh tannaghtyn ny haggyrt kinjagh [son dy bragh.] 4Nish smooinee-jee cre cha ooasle va’n dooinney shoh, da hug yn shenn-ayr Abraham hene yn jaghee jeh’n spooilley. 5As dy firrinagh ta sarey ec mec Levi, t’ayns oik y taggyrtys, dy ghoaill jaghee jeh’n pobble cordail rish y leigh, ta shen, jeh nyn mraaraghyn, ga dy daink ad magh ass meeghyn Abraham: 6Agh eshyn nagh row yn kynney echey coontit vouesyn, ghow eh jaghee veih Abraham, as vannee eh eshyn da va ny gialdynyn jeant. 7As gyn dooyt, ta’n fer s’inshilley er ny vannaghey liorish y fer syrjey. 8As ayns shoh ta deiney giare-heihllagh goaill jagheenyn: agh ayns shen t’eshyn geddyn ad, da ta feanish er ny ymmyrkey dy vel eh bio. 9As myr oddym gra, ren Levi hene va goaill jagheenyn, jaghee y eeck ayns Abraham. 10Son v’eh foast ayns meeghyn e ayrey, tra hie Melchisedec ny whail. 11Dy beagh er-y-fa shen slane seyrsnys [veih peccah] fo saggyrtys kynney Levi, (son fo shen hooar y pobble y leigh) cre’n feme sodjey va son saggyrt elley dy irree lheid as va Melchisedec, as dyn eh ve enmyssit saggyrt lheid as va Aaron? 12Son myr va’n saggyrtys er ny chaghlaa, te ymmyrchagh caghlaa ve jeant ayns y leigh myrgeddin. 13Son t’eshyn my-e-chione ta ny reddyn shoh loayrit, bentyn rish sheeloghe elley, jeh cha ren dooinney erbee shirveish ec yn altar. 14Son te feer chronnal dy daink nyn Jiarn magh ass sheeloghe Yudah; jeh’n cheeloghe shen cha loayr Moses veg mychione y taggyrtys. 15As te foddey s’cronnal: dy vel saggyrt elley troggal agh lurg caslys Velchisedec, 16Ta er ny oardaghey, cha nee lurg leigh sarey foalley, agh lurg pooar bea gyn jerrey. 17Son t’eh gymmyrkey feanish, T’ou dty haggyrt son dy bragh myr va Melchisedec. 18Son ta’n sarey va roïe er ny choyrt dy lhiattee, son dy row eh dyn vree as neu-fondagh. 19Son cha ren y leigh nhee erbee slane ynrick, agh ve fosley raad gys treishteil share; liorish ta shin tayrn er-gerrey gys Jee. 20As ayns wheesh as nagh row eh er ny oardaghey ny haggyrt fegooish breearrey. 21(Son va ny saggyrtyn shen jeant fegooish breearrey: agh eh shoh lesh breearrey, liorishyn dooyrt rish, Ta’n Chiarn er vreearrey, as cha gow eh arrys, T’ou uss dty haggyrt son dy bragh myr va Melchisedec.) 22Wheesh shen smoo va Yeesey jeant ny raane jeh conaant share. 23As v’adsyn dy jarroo ymmodee saggyrtyn, er-yn-oyr nagh row ad dy hannaghtyn foddey kyndagh rish baase: 24Agh ta ec y dooinney shoh, er-yn-oyr dy vel eh tannaghtyn dy bragh, saggyrtys gyn caghlaa. 25Shen-y-fa t’eh pooaral myrgeddin dy hauail gys y chooid sodjey adsyn ta cheet gys Jee liorishyn, fakin dy vel eh dy bragh bio dy yannoo stiagh [rish Jee] er nyn son. 26Son va lheid yn ard-saggyrt shoh cooie er nyn son, ta casherick, gyn loght, glen, scarrit voish peccee, as jeant ny syrjey na ny niaughyn; 27Echey nagh vel feme gagh-laa, myr t’ec ny ard-saggyrtyn shen, dy hebbal oural, hoshiaght son e pheccaghyn hene, as eisht son peccaghyn y phobble: son shoh ren eh un cheayrt, tra heb eh seose eh-hene. 28Son ta’n leigh, jannoo ard-saggyrtyn jeh deiney giare-heihllagh; agh ta’n goo dy vreearrey va er-dyn leigh, jannoo yn Mac [ny ard-saggyrt] ta er ny chasherickey son dy bragh.