CAB. IX

1Va eisht dy jarroo fo’n chied chonaant myrgeddin oardaghyn dy hirveish casherick, as cabbane-agglish seihltagh. 2Son va cabbane-agglish soit magh, ayns y chied ayrn jeh va’n cainleyr, as y boayrd, as yn arran casherick, ta shoh enmyssit yn ynnyd casherick. 3As cooyl y churtan ’syn nah ayrn, yn cabbane-agglish ta enmyssit yn ynnyd smoo casherick: 4Ayn va’n censer airhey, as arg y chonaant coodit er dy chooilley heu lesh airh, ayn va’n saagh airh, ayn va manna, as lorg Aaron ren blaaghey, as buird y chonaant; 5As er-y-skyn ny cherubim dy ghloyr scaaghey yn stoyl-myghin: mychione oc cha vod mayd nish coyrt slane coontey. 6Nish tra va ny reddyn shoh soit magh er yn aght shoh, hie ny saggyrtyn gagh laa stiagh ayns y chied ayrn jeh’n cabbane-agglish, cooilleeney shirveish Yee: 7Agh stiagh ayns yn nah ayrn hie yn ard-saggyrt ny-lomarcan keayrt ’sy vleïn, cha nee fegooish fuill, ren eh chebbal er e hon hene, as son shaghrynys y phobble. 8Yn Spyrryd Noo cowraghey liorish shoh, nagh row yn raad stiagh gys yn ynnyd smoo casherick foast jeant foshlit, choud as va’n chied chabbane-agglish foast ny hassoo: 9Va shoh cowrey son y traa shen, ayn v’er ny hebbal chammah giootyn as ourallyn, nagh voddagh eshyn ren y chirveish y heyrey, myr bentyn rish y chooinsheanse. 10Yn chirveish cheddin va shassoo ny-lomarcan ayns bee as jough, as ymmodee oonlaghyn as oardaghyn foalley, kianlt orroo derrey imbagh yn stayd noa. 11Agh ta Creest er jeet dy ve ny ard-saggyrt jeh reddyn mie ry-heet, liorish cabbane-agglish smoo as s’fondee, cha nee jeant lesh laueyn, ta shen dy ghra, cha nee jeh’n troggal shoh; 12Chamoo liorish fuill goair as lheiyee, agh liorish yn uill echey hene, hie eh stiagh un cheayrt son ooilley ayns yn ynnyd casherick, lurg da v’er chosney feaysley braa er nyn son. 13Son my ta fuill terriu as goair, as leoie colbagh spreiht er y vooinjer neu-ghlen, casherickey gys glenney yn eill; 14Cre-woad smoo nee fuill Chreest, ren eh-hene y oural gyn foill gys Jee trooid y Spyrryd dy bragh beayn, yn chooinsheanse euish y ghlenney veih obbraghyn marroo dy hirveish y Jee bio? 15As son yn oyr shoh she eshyn ta eddyr shin as Jee fo’n conaant noa, myr shen liorish fuilliaghtyn baase dy yannoo lhiassaghey son ny peccaghyn va fo’n chied chonaant, dy voddagh adsyn t’er nyn eam geddyn yn gialdynys jeh eiraght dy bragh farraghtyn. 16Son raad ta chymney, te ymmyrchagh neesht dy bee baase yn fer ren y chymney er ny yannoo mie: 17Son ta chymney goaill ynnyd lurg da sleih ve marroo; er aght elley cha vel eh jeh veg y vree choud as ta’n chymneyder bio. 18Er-yn-oyr cheddin neesht, cha row yn chied chonaant er ny chasherickey fegooish fuill: 19Son erreish da Moses v’er hoilshaghey magh dagh sarey da ooilley’n pobble cordail rish y leigh, ghow eh fuill lheiyee as goair, marish ushtey, as ollan gorrym-jiarg, as hyssop, as spreih eh chammah er y lioar as ooilley’n pobble, gra, 20Shoh fuill y chonaant ta Jee er harey diu. 21Eisht spreih eh myrgeddin lesh fuill chammah yn cabbane-agglish, as ooilley siyn y chirveish. 22As cordail rish y leigh ta dy chooilley red son y chooid smoo er ny ghlenney lesh fuill; as fegooish deayrtey folley cha vel veg y leih [son peccah.] 23Ve ymmyrchagh er-y-fa shen dy beagh ny sampleyryn dy reddyn ayns ny niaughyn er nyn ghlenney lhieu shoh; agh ny reddyn flaunyssagh hene lesh ourallyn share na ad shoh. 24Son cha vel Creest er n’gholl stiagh ayns ny ynnydyn casherick jeant lesh laueyn, ta co-chaslyssyn jeh’n ynnyd firrinagh; agh ayns niau hene, nish dy hassoo ayns fenish Yee er nyn son: 25Cha nee dy hebbal eh-hene dy mennick, myr ta’n ard-saggyrt goll stiagh ayns yn ynnyd casherick dy chooilley vleïn lesh fuill cretooryn elley: 26(Son eisht beign da v’er hurranse dy mennick er-dy hoshiaght y theihll) agh nish un cheayrt son ooilley ayns ny eashyn s’jerree, t’eh er hoilshaghey eh-hene dy chur ersooyl peccah liorish jannoo eh-hene ny oural. 27As ’naght myr te er ny phointeil da deiney dy gheddyn baase un cheayrt, agh lurg shoh yn vriwnys: 28Myr shen va Creest un cheayrt er ny hebbal dy ymmyrkey peccaghyn ymmodee; as dauesyn ta jeeaghyn er e hon, nee eh soilshaghey eh-hene yn nah cheayrt fegooish peccah gys saualtys.