CAB. X

1Ta Israel ny villey-feeyney gyn-ymmyd, t’eh gymmyrkey mess da hene: rere earroo e vess, t’eh er vishaghey e altaryn; rere foays e halloo, t’ad er n’yannoo jallooyn stoamey. 2Ta’n cree oc er ny rheynn; nish bee ad er ny gheddyn foiljagh: brishee eh sheese ny altaryn oc: as spooilley eh ny jallooyn oc. 3Son nish jir adsyn, Cha vel ree ain, er-yn-oyr nagh ghow shin aggle roish y Chiarn; cre eisht t’ec ree dy yannoo rooin? 4T’ad er loayrt goan oaiagh ayns jannoo conaant: myr shen ta briwnys gaase seose, myr yn aghaue ayns imraghyn y vagheragh. 5Gowee cummaltee Samaria aggle, kyndagh rish jallooyn baagh Veth-aven: son nee yn pobble echey dobberan harrish, as ny saggyrtyn ghow boggey jeh’n ghloyr echey, son dy vel eh er n’immeeaght veih. 6Bee eh myrgeddin er ny chur lesh gys Assyria son toyrtys gys ree Jareb: gowee Ephraim nearey, as bee Israel sniemmit ayns ribbey e choyrle hene. 7Er son Samaria, ta’n ree ecksh giarit jeh myr kesh er yn ushtey. 8Myrgeddin bee ard-ynnydyn Aven, peccah Israel currit naardey: hig yn dress as yn onnane seose er nyn altaryn; as jir ad rish ny sleityn, Coodee-jee shin, as rish ny croink, Tuitt-jee orrin. 9O Israel, t’ou er chur-rish peccah veih laghyn Ghibeah: shen y raad hass ad: cha ren y caggey ayns Gibeah noi cloan ny drogh-yantee berraghtyn orroo. 10Te ayns my aigney dy smaghtaghey ad: as bee yn pobble er ny chruinnaghey nyn ’oï, tra nee’m ad y cherraghey son y daa vee-chairys oc. 11As ta Ephraim myr colbagh ta ynsit, as shynney lh’ee stampey magh yn arroo, agh hug mish yn whing er e mwannal aalin: ver-yms er Ephraim tayrn: nee Judah traaue, as nee Jacob brishey e cheabyn. 12Cuirr-jee diu hene ayns cairys, buinn-jee ayns myghin: brish-jee seose yn thalloo banejagh eu: son te traa dy hirrey yn Chiarn, derrey hig eh dy gheayrtey neose cairys orrin. 13Ta shiu er hraaue mee-chraueeaght, ta shiu er vuinn mee-chairys, ta shiu er n’ghoaill nyn soogh ayns y vess dy vreagyn; son dy dug oo dty varrant er dty raad hene, as er earroo dty gheiney niartal. 14Shen-y-fa nee tharmane caggee troggal mastey dty phobble, as bee ooilley dty chashtallyn er ny spooilley, myr ren Shalman spooilley Beth-arbel ayns laa yn chaggey: va’n moir bransit gys peeshyn er e cloan. 15Myr shen nee Beth-el riuish son mooadys nyn ghrogh-yannoo: ’sy vadran vees ree Israel dy bollagh giarit jeh.