CAB. XI

1Tra va Israel ny lhiannoo, eisht bynney lhiam eh, as deïe mee er my vac ass Egypt. 2Myr smoo deïe mee orroo, wheesh shen sodjey hie ad voym: ren ad ouralley gys Baalim, as lostey incense gys jallooyn grainnit. 3Dynsee mee Ephraim myrgeddin dy hooyl, goaill ad er y laue; agh cha row geill oc dy nee mish va dy reir eh. 4Hayrn mee ad lesh coyrdyn dooinney, lesh kianglaghyn dy ghraih, as va mee dauesyn myr adsyn ta goaill yn streean ass nyn meeal, as hug mee bee er nyn meealloo.

5Cha jean eh chyndaa gys cheer Egypt; agh bee yn Assyrian y ree echey, er-yn-oyr dy ren ad gobbal dy hyndaa. 6As nee yn cliwe tannaghtyn er e ard-valjyn, as ver eh mow e vanglaneyn, as stroie ad, kyndagh rish ny coyrleyn oc hene. 7As ta my phobble soit er skyrraghtyn voym; ga dy row eam oc gys yn er smoo syrjey, cha dug fer erbee ard-voylley da. 8Kys oddym scarrey rhyt, O Ephraim? kys oddym sauail oo, O Israel? kys nee’m oo myr Admah, as soiaghey jeed myr Zeboim? ta my chree er ny hyndaa cheu-sthie jee’m, ta my vyghinyn er ny ghreesaghey dy cheilley. 9Cha jean-ym cooilleeney eulys my yymmoose, cha jean-ym chyndaa dy stroie Ephraim, son ta mish Jee, as cha nee dooinney, yn er-casherick ayns y vean ayd, as cha jig-ym stiagh ayns yn ard-valley [myr noid]. 10Nee ad gimmeeaght lurg y Chiarn: troggee eh seose e choraa myr lion: tra ver eh magh e choraa, eisht bee’n chloan er-creau voish y neear. 11Nee ad clussaghey myr ushag veih Egypt, as myr calmane ass cheer Assyria: as soie-ym ad ayns nyn dhieyn hene, ta’n Chiarn dy ghra. 12Ta Ephraim dy my chruinnaghey mygeayrt lesh breagyn, as thie Israel lesh molteyrys: agh ta Judah foast reill marish Jee, as t’eh ynrick marish ny nooghyn.