CAB. XIII

1Tra ren Ephraim loayrt dy arrymagh, hooar eh ooashley da hene ayns Israel; agh tra hug eh rish peccah liorish Baal, hie eh naardey. 2As nish t’ad jannoo peccah ny smoo as ny smoo, as t’ad er chummey daue hene jallooyn roit jeh nyn argid, as caslyssyn, reue yn cheeayll oc hene, ad ooilley obbyr ny fir-cheirdee. T’ad gra jeusyn, Lhig da ny deiney ta ouralley paagey ny jallooyn baagh. 3Shen-y-fa bee ad myr bodjal y vadran, as myr y druight moghey, ta lheïe ersooyl, myr y coau ta eebrit lesh y gheay-chassee jeh’n laare-vooie, as myr y jaagh ass y chymlee. 4Foast ta mish y Chiarn dty Yee veih thalloo Egypt, as cha bee enney ayd er Jee erbee agh orrym’s, agh cha vel saualtagh erbee agh mish.

5Ren mee oo y veaghey ’syn aasagh, ayns y thalloo fowanagh sponkit. 6Cordail rish nyn aber, myr shen v’ad jeant magh; v’ad er nyn lhieeney, as va’n cree oc er ny yrjaghey: shen-y-fa t’ad er my yarrood. 7Er-yn-oyr shoh, bee’m dauesyn myr lion; myr leopard rish y raad freill-ym arrey orroo. 8Ver-ym quaaltagh daue myr y vuc-awin ta er choayl e quallianyn, as raip-ym skairt y chree oc, as shen y raad myr lion nee’m stroie ad: nee yn veisht oaldey ad y raipey.

9O Israel, t’ou er choyrt oo hene naardey, agh aynym’s ta dty chemmyrk. 10Beem’s dty ree: cre vel fer erbee elley oddys sauail oo ayns ooilley dty ard-valjyn? as dty vriwnyn, my-nyn-gione dooyrt oo, Cur dou ree as princeyn? 11Hug mee dhyt ree ayns my chorree, as ghow mee eh ersooyl ayns my yymmoose. 12Ta mee-chairys Ephraim tashtit seose: ta e pheccah currit dy lhiattee. 13Hig ersyn pianyn ben ta er-troailt, t’eh mac mee-cheeayllagh, son cha lhisagh eh fuirriaght foddey ayns strepyn y chloan. 14Nee’m ad y eaysley veih pooar yn oaie: as cosnee-ym ad veih’n vaase: O vaase, cre vel dty ghah! O oaie, cre vel dty varriaght! bee chymmey foddey veih my hooillyn.

15Ga dy vel eh messoil mastey e vraaraghyn, hig geay-niar er, hig lomman lajer veih’n Chiarn seose ass yn aasagh, as chyrmee eh seose ny farraneyn-geill echey, as hed ny strooanyn ushtey echey naardey, nee eh spooilley ooilley tashtaghyn ny siyn aalin. 16Hig Samaria dy ve ny hraartys; son t’ee er n’irree-magh noi e Jee: tuittee ad liorish y chliwe: bee ny oikanyn oc bransit ayns peeshyn, as ny mraane torragh oc raipit seose.