CAB. XIV

1O Israel, chyndaa gys y Chiarn dty Yee; son t’ou er duittym liorish dty vee-chairys hene. 2Gow-jee mêriu goan [arryssagh] as chyndaa-jee gys y Chiarn: abbyr-jee rish, Gow ersooyl dy chooilley vee-chairys, as jean soiaghey graysoil j’in: myr shen chebbee mayd dhyt oural nyn meillyn. 3Cha jean Ashur sauail shin, cha jean mayd markiaght er cabbil, chamoo jir mayd arragh rish obbyr ny laueyn ain hene, Shiuish ny jeeghyn ain: son aynyd’s ta’n chloan gyn ayr geddyn myghin.

4Neem’s lhiasaghey nyn loghtyn, ver-ym graih daue dy arryltagh: son ta my chorree er ny hyndaa ersooyl voish. 5Bee’m myr y druight da Israel: nee eh gaase myr y lilee, as skeaylee eh magh e fraueyn myr Lebanon. 6Nee ny banglaneyn echey skeayley, as bee yn aalid echey myr y billey-olive, as soar millish jeh myr Lebanon. 7Nee adsyn ta cummal fo yn scadoo echey chyndaa reesht, hig ad er-ash myr yn arroo, as blaaghey myr y billey-feeyney: bee yn bree echey myr feeyn Lebanon. 8Nee Ephraim gra, Cre t’aym dy yannoo arragh rish jallooyn? cheayll mee eh, as ghow mee tastey jeh: ta mee myr billey-juys glass, voym’s ta dty vess ry-gheddyn. 9Quoi ta creeney, as nee eh toiggal ny reddyn shoh? toiggalagh, as yiow eh fys orroo? son ta raaidyn y Chiarn jeeragh, as nee’n vooinjer ynrick gimmeeaght ayndoo: agh nee ny mee-viallee cherraghtyn lioroo.