CAB. II

1Abbyr-jee rish nyn mraaraghyn, Ammi, as rish nyn shayraghyn, Ru-hamah. 2Cur-jee oghsan da nyn moir, cur-jee oghsan jee: son cha nee my ven’s ee, chamoo mish yn dooinney ecksh: shen-y-fa lhig j’ee cur ersooyl e streebeeys ass y chilley eck, as e maarderys veih eddyr e keeaghyn. 3Er-aggle, dy der-ym ee gys nearey, cha rooisht as y laa ruggyr ee, as dy jean-ym ee myr faasagh, as myr thalloo reeastaneagh, as dy marr-ym ee lesh paays. 4As cha bee myghin aym er e cloan: son dy nee cloan dy vaarderys ad. 5Son ta’n moir oc er choyrt rish streebeeys: t’eeish ren ad y yientyn er n’yannoo dy naareydagh: son dooyrt ee, Hem marish my gheiney-sooree, ta coyrt dou m’arran, as m’ushtey, my ollan, as my lieen, my ooil, as feeyn.

6Shen-y-fa, cur-my-ner, atnee-ym seose dty raad lesh drineyn, as nee’m voalley, nagh vow ee magh e oayll. 7As hed ee geiyrt er e gimmanyn, agh cha berr ee orroo; nee ee shirrey nyn yeï, agh cha vow ee magh ad: eisht jir ee, Hem roym dy valley gys my chied heshey, son va mee ny s’maynrey mârishyn, na ta mee nish. 8Son cha dug ee geill, dy nee mish hug jee arroo, as feeyn, as ooil, as vishee mee yn argid as yn airh eck, ren ad y vaarail er Baal. 9Shen-y-fa bee’m noi eck, as goym ersooyl my arroo ’syn imbagh hene, as my feeyn ’syn imbagh echey, as goym ersooyl my ollan, as my lieen, v’er ny choyrt dy choodaghey e nearey. 10As nish brah-ym yn drogh-vea eck fenish e maarderee, as cha jean fer erbee ish y livrey ass my laue. 11Ver-ym jerrey myrgeddin er ooilley e reaïd, er ny laghyn feailley eck, e eaystyn-noa, as e dooneeyn, as er ooilley ny ard-feaillaghyn eck. 12As ver-ym naardey myrgeddin e biljyn-feeyney, as e biljyn-figgagh, my-nyn-gione t’ee er ghra, Ad shoh yn faill ta my gheiney-sooree er choyrt dou: as nee’m faasagh jeu, as bee ad son beaghey da maase y vagheragh. 13As nee’m kerraghey urree laghyn Vaalim, ayndoo losht ee incense daue, as ren ee soiaghey magh ee hene lesh e fainaghyn-cleayshey, as e jewellyn, as hie ee geiyrt er e gimmanyn, as yarrood ee mish, ta’n Chiarn dy ghra.

14Shen-y-fa, cur-my-ner, nee’m ee y chleayney, as ver-ym lhiam ee gys yn aasagh, as loayr-ym dy dooie r’ee. 15As veih shen ver-ym jee e garaghyn-feeyney, as glione Achor son dorrys dy hreishteil, as nee ee arrane y ghoaill ayns shen, myr ayns laghyn e aegid, as myr ayns y laa haink ee seose ass thalloo Egypt. 16As er y laa shen, ta’n Chiarn dy ghra, nee oo genmys mish Ishi, as cha nee ny sodjey Baali. 17Son goym ersooyl enmyn Vaalim ass e beeal, as cha bee imraa sodjey jeu lurg ny enmyn shen. 18As ’sy laa shen nee’m conaant ass nyn lieh rish maase y vagheragh, as rish eeanlee yn aer, as rish reddyn snauee y thallooin: as brish-ym yn bow, as y cliwe, as y caggey ass y cheer; agh ver-ym orroosyn dy lhie sheese dy sauchey. 19As nee’m oo y nastey rhym pene son dy bragh, dy jarroo nasht-ym oo rhym pene ayns cairys, as ayns briwnys, as ayns kenjallys-ghraihagh, as ayns myghinyn. 20Nasht-ym oo dy jarroo rhym pene, ayns ynrickys, as nee oo goaill-rish y Chiarn, 21As hig eh gy-kione ’sy laa shen, dy der-yms clashtyn, ta’n Chiarn dy ghra, ver-yms clashtyn da ny niaughyn, as ver adsyn clashtyn da’n thalloo. 22As ver y thalloo clashtyn da’n arroo, as da’n feeyn, as da’n ooil, as ver adsyn clashtyn da Jezreel. 23As cuirr-ym ee dou hene ’sy thalloo; as bee myghin aym urreeish, nagh row er chosney myghin: as jir-ym roosyn nagh vel my phobble, T’ou uss my phobble: as jir adsyn, T’ou uss my Yee.