CAB. IV

1Eaisht-jee rish goo yn Chiarn, shiuish chloan Israel: son ta cooish ec y Chiarn rish cummaltee ny cheerey, son nagh vel ynrickys, ny myghin, ny tushtey dy Yee ayns y cheer. 2Liorish loo oaiagh, as breagyn, as dunverys, as geid, as brishey-poosey, t’ad brishey magh, as ta dunverys er dunverys. 3Shen-y-fa nee’n cheer dobberan, as hed ooilley ny cummaltee t’ayn naardey, marish maase y vagher, as eeanlee yn aer, nee eer eeastyn ny marrey cherraghtyn. 4Ny-yeih, ny lhig da dooinney erbee caartrey, ny goltooan y jeh elley: son ta dty phobble’s myr adsyn ta streeu rish y taggyrt. 5Shen-y-fa nee oo tuittym ’sy laa, as nee’n phadeyr tuittym mayrt ’syn oie, as stroie-yms dty voir.

6Ta my phobble’s goll naardey son laccal tushtey: son dy vel uss er n’yiooldey rish tushtey, jioold-yms myrgeddin rhyt’s, nagh bee oo ny-sodjey son saggyrt dooys: fakin dy vel oo er yarrood leigh dty Yee’s, neem’s myrgeddin yn chloan ayd’s y yarrood. 7Myr smoo ghow ad bishaghey, wheesh shen smoo ren ad peccah m’oï: neem’s er-y-fa shen chyndaa nyn ghloyr gys nearey. 8T’ad beaghey er peccah my phobble, as t’ad soiaghey nyn greeaghyn er nyn ghrogh-yannoo. 9As bee ad co-laik pobble co-laik saggyrt; as nee’m ad y cherraghey son nyn raaidyn, as ad y chooilleeney son nyn ghrogh-yannoo. 10Son nee ad gee, as cha bee ad jeant magh: ver ad rish maarderys, agh cha jean ad bishaghey: son dy vel ad er scuirr dy choyrt tastey da’n Chiarn. 11Ta maarderys, as feeyn, as feeyn noa dy chleayney yn cree. 12Ta my phobble shirrey coyrle veih nyn yallooyn-fuygh, as ta nyn luirg jannoo faishnys daue: son ta’n spyrryd dy vaarderys er choyrt shaghrynys orroo, as t’ad er n’eiyrt er maarderys, treigeil nyn Yee. 13T’ad ouralley er mullagh ny sleityn, as lostey incense er ny croink fo biljyn-darragh, as poplar, as lhieuan, son dy vel y scadoo oc mie: shen-y-fa ver ny inneenyn eu rish maarderys, as ny mraane eu rish brishey-poosey. 14Nagh jean-ym kerraghey ’ghoaill er ny inneenyn eu, tra t’ad geiyrt er maarderys? ny er nyn mraane tra t’ad coyrt rish brishey-poosey? nagh vel ad hene ainjyssagh er streebeeyn, as ouralley marish oainjyryn? shen-y-fa nee yn pobble mee-cheeayllagh tuittym.

15Ga dy vel uss Israel er n’yannoo streebeeys, ny-yeih, ny lhig da Judah ve kyndagh, as ny tar-jee gys Gilgal, chamoo gow-jee seose gys Beth-aven, ny loo-jee, Ta’n Chiarn bio. 16Son ta Israel creoi-wannallagh, myr colbagh kione-lajeragh: nish nee yn Chiarn fassaghey ad myr eayin ayns aber aalin. 17Ta Ephraim er ny lhiantyn gys jallooyn: faag voïd eh. 18Ta’n jough oc er n’gholl eig: t’ad er n’eiyrt dy kinjagh er maarderys: ta ny fir-reill eck dy scammyltagh aggindagh er, T’ooilley. 19Ta’n gheay er chiangley seose ee ayns e skianyn, as bee nearey orroo jeh nyn ourallyn.