CAB. V

1Eaisht-jee rish shoh, O haggyrtyn, as cur-jee tastey, shiuish hie Israel, as jean-jee clashtyn, O hie yn ree; son ta briwnys ny chour eu, er-yn-oyr dy vel shiu er ve ny ribbey er Mizpah, as myr lieen skeaylt er Tabor. 2Ta ny mee-viallee shleeuit er cragh, ga dy vel mish er chur oghsan daue ooilley. 3Shione dou Ephraim, as cha vel Israel keillit voym: son nish, O Ephraim, t’ou uss coyrt rish maarderys, as ta Israel neu-ghlen. 4Cha jean ad lhiasaghey nyn ymmyrkey-bea, dy hyndaa gys y Jee oc: son ta’n spyrryd dy vaarderys nyn mastey, as cha vel enney er ve oc er y Chiarn. 5As ta moyrn Israel gymmyrkey feanish gys e eddin: shen-y-fa nee Israel as Ephraim tuittym ayns nyn mee-chraueeaght: tuittee Judah myrgeddin mâroo. 6Hed ad lesh nyn shellooyn as nyn shioltaneyn dy hirrey yn Chiarn, agh cha vow ad clashtyn voish, t’eh er n’gholl foddey voue. 7T’ad er ghellal dy kialgeyragh noi yn Chiarn: son t’ad er gheddyn cloan yoarree: nish ver traa giare naardey chammah ad-hene as nyn gronney. 8Sheid-jee yn cornet ayns Gibeah, as y trumpet ayns Ramah: yllee-jee dy ard ec Beth-aven: dty yeï’s, O Venjamin. 9Bee Ephraim ny hraartys ’sy laa oghsanagh: mastey sheelogheyn Israel ta mee er hoilshaghey shen, hig son shickyrys gys kione. 10Va reejereeyn Yudah goll roosyn ta scughey yn chagliagh: shen-y-fa neem’s my yymmoose y gheayrtey magh orroo myr ushtey. 11Ta Ephraim broojit as brisht ayns briwnys: er-yn-oyr dy jimmee ad dy arryltagh lurg drogh choyrle. 12Beem’s er-y-fa shen myr lhemeen da Ephraim: as da thie Yudah myr loauid. 13Tra honnick Ephraim e hingys, as Judah e lhott, eisht hie Ephraim gys yn Assyrian, as hug eh fys gys ree Jareb: ny-yeih cha row eh son shiu y lheihys, ny nyn lhott y laanaghey. 14Son beem’s da Ephraim myr lion, as myr quallian y lion da thie Yudah: neem’s, dy jarroo neem’s raipey, as goll roym; goym lhiam ersooyl, as cha jean fer erbee eshyn y livrey.

15Hem roym, as chyndaa-ym gys my ynnyd hene, derrey nee ad goaill-rish nyn loghtyn, as shirrey my eddin: ayns nyn seaghyn nee ad dy leah shirrey hym.