CAB. VI

1Tar-jee, as lhig dooin chyndaa gys y Chiarn: son t’eh er raipey, as nee eh nyn lheihys; t’eh er woalley shin, as nee eh nyn slaanaghey. 2Lurg daa laa ver eh orrin dy aa-vioghey, ’sy trass nee eh shin y hroggal seose reesht veih ny merriu, as bee mayd bio kiongoyrt rish. 3Eisht bee tushtey ain, my hem mayd er nyn doshiaght ayns ainjys y Chiarn: ta’n goll-magh echey eunyssagh myr aalid y voghrey, as hig eh hooin myr y fliaghey; myr y fliaghey toshiaght as jerrey ny bleeaney er y thalloo.

4O Ephraim, cre nee’m er dty hon? O Yudah, cre nee’m er dty hon’s? son ta nyn mieys myr bodjal ’sy vadran, as myr y druight moghey te lheïe ersooyl. 5Shen-y-fa, ta mee er yiarey sheese ad liorish ny phadeyryn: ta mee er varroo ad liorish goan my veeal, dy vod ny briwnyssyn ayd’s ve myr yn soilshey ta brishey magh. 6Son yeearree mee myghin roish oural: as tushtey dy Yee, ny smoo na ourallyn-losht. 7Agh t’adsyn myr deiney t’er vrishey yn conaant: ayns shen t’ad er ghellal dy molteyragh rhym. 8Ta Gilead ny ard-valley ta gobbraghey mee-chraueeaght, as sollit lesh fuill. 9As myr ta sheshaghtyn dy roosteyryn lhie cooyl-chlea son dooinney, myr shen ta sheshaght ny saggyrtyn coyrt nyn goyrle dy cheilley, dy yannoo dunverys er y raad: son t’ad jannoo dy eajee. 10Ta mee er vakin red atchimagh ayns thie Israel: ta maarderys Ephraim ayn, ta Israel neu-ghlen. 11Myrgeddin, O Yudah, t’eh er phointeil fouyr er dty hon’s, tra ver-yms chyndaa gys cappeeys my phobble.