CAB. VII

1Tra va mee kiarit dy laanaghey Israel, eisht haink peccah Ephraim er-ash, as olkys Samaria: son t’ad cur-rish foalsaght, as ta’n maarliagh brishey stiagh, as ta sheshaght ny roosteyryn spooilley mooie. 2As cha vel ad goaill gys nyn gree, dy vel mish cooinaghtyn er ooilley nyn olkys: nish ta nyn yannoo hene coyrt dy chion roo er dagh cheu, t’ad kiongoyrt rish my eddin. 3T’ad jannoo boggey da’n ree lesh nyn olkys, as da ny reejereeyn lesh nyn mreagyn. 4T’ad ooilley loshtagh er maarderys, myr aile ayns oghe yn uinneyder, ta cur traa da’n theayst dy hroggal, erreish da v’er heaystney, derrey vees eh slane soorit. 5Ayns laa yn ree ain, ta ny princeyn er n’yannoo ching jeh lesh nyn moteilyn feeyney, t’eh er heeyney magh e laue marish ny craidoilee. 6Son t’ad er jiow nyn gree myr oghe, choud as t’ad lhie farkiaght; ta’n fuinneyder oc cadley fud-ny-hoie, ’sy voghrey te brishey magh myr aile lossanagh. 7T’ad ooilley cheh myr yn oghe, as t’ad er stroie nyn mriwnyn; ta ooilley nyn reeaghyn er duittym, cha vel veg ny-vud oc ta geamagh orrym’s. 8Ta Ephraim er seiy eh-hene mastey ny ashoonee, ta Ephraim myr berreen nagh vel chyndaït. 9Ta joarreeyn er choyrt mow e niart, agh cha vel baght echey er shoh: dy feer, ta kuse dy renaigyn lheeah noon as noal er, ny-yeih cha vel eh goaill tastey jeu. 10As ta moyrn Israel gymmyrkey feanish gys e eddin, ny-yeih cha vel ad chyndaa gys y Chiarn nyn Yee, ny shirrey huggey son ooilley shoh.

11Ta Ephraim myrgeddin myr calmane ôney gyn cree; t’ad shirrey cooney veih Egypt, t’ad goll gys Assyria. 12Tra hed ad, skeayl-yms my lieen orroo, lhieg-ym ad myr eeanlee yn aer, smaght-ym ad myr ta’n slane sheshaght oc er chlashtyn. 13Smerg daue, son t’ad er-chea voym, toyrt-mow dy row orroo, son t’ad er my hreigeil: ga dy vel mee er chur feaysley daue, ny-yeih t’ad er loayrt breagyn m’oï. 14As cha vel ad er ghoaill padjer hym veih nyn gree, tra v’ad gaccan er nyn lhiabbaghyn: t’ad chaglym cooidjagh son arroo as feeyn, as girree-magh m’oï. 15Ga dy vel mee er smaghtaghey ad, ta mee er niartaghey ny roihaghyn oc, ny-yeih, t’ad smooinaghtyn er olk m’oï. 16T’ad chyndaa, agh cha nee gys yn er smoo syrjey: t’ad goll-rish bow molteyragh: nee ny princeyn oc tuittym liorish y chliwe, son roon nyn jengaghyn: shoh vees nyn oltooan ayns thalloo Egypt.