CAB. VIII

1CUR y trumpet gys dty veeal; hig eh myr urley noi thie yn Chiarn, er-yn-oyr dy vel ad er vrishey my chonaant, as er hoiaghey beg jeh my leigh. 2Nee Israel geam hym’s, My Yee, shione dooin oo. 3Ta Israel er hreigeil shen ta mie; nee yn noid eh y helg. 4T’ad er hoiaghey seose reeaghyn, agh cha nee liorym’s: t’ad er n’yannoo princeyn, agh noi my aigney’s: jeh nyn argid as nyn airh t’ad er n’yannoo jallooyn daue hene, dy choyrt ad-hene mow.

5Ta dty yalloo-baagh O Samaria; er n’yiooldey rhyt: ta my chorree er ny ghreesaghey nyn ’oï: caïd vees eh, nagh n’eiyr ad er aghtyn mie? 6Son veih Israel myrgeddin haink eh magh, yn obbree ren eh, shen-y-fa cha vel eh ny Yee: agh bee jalloo-baagh Samaria brisht ayns peeshyn. 7Son t’ad er chuirr y gheay, as nee ad buinn y gheay-chassee: cha vel bun echey: cha jean y jeeas gymmyrkey meinn, as ga dy jean eh, bee eh stroit ec joarreeyn. 8Ta Israel sluggit seose: nish bee ad mastey ny ashoonee myr saagh gyn-ymmyd. 9Son dy vel ad er n’gholl seose gys Assyria, assyl oaldey er hene: ta Ephraim er vailley caarjyn. 10Dy jarroo, ga dy vel ad er vailley mastey ny ashoonee, nish nee’m ad y haglym, as cha bee nyn drimshey agh giare fo errey ree ny reejereeyn. 11Er-yn-oyr dy vel Ephraim er n’yannoo ymmodee altaryn son peccah, bee ny altaryn son loght dasyn. 12Ta mee er scrieu dasyn nheeghyn mooarey my leigh, agh ren ad soiaghey jeu, myr jeh reddyn joarree. 13T’ad ouralley feill son ourallyn my hebballyn, as t’ad gee eh; agh cha vel y Chiarn jannoo soiaghey jeu: nish nee eh cooinaghtyn er nyn mee-chairys, as kerraghey nyn beccaghyn: nee ad chyndaa reesht gys Egypt. 14Son ta Israel er yarrood e er-croo, as troggal chiambleyn; as ta Judah er vishaghey ard-valjyn voallit: agh ver-yms aile er e ard-valjyn, as nee eh stroie nyn dhieyn reeoil.