CAB. IX

1NY gow boggey, O Israel, lesh reaïd, myr sleih elley: son t’ou er n’yannoo maarderys noi dty Yee, t’ou er ve sondagh er leagh er dy chooilley laare-vooie. 2Cha jean y laare ny yn press-feeyney ad y veaghey, as nee yn feeyn noa failleil aynjee. 3Cha jean ad cummal ayns thalloo yn Chiarn; agh nee Ephraim chyndaa reesht gys Egypt, as nee ad gee reddyn neu-ghlen ayns Assyria. 4Cha jean ad chebbal ourallyn-feeyney gys yn Chiarn, chamoo nee eh soiaghey jeu; bee ny ourallyn dauesyn myr arran ny dobbranee: bee ad ooilley neu-ghlen ta gee jeh: son cha jig arran nyn mioys ayns thie yn Chiarn. 5Cre nee shiu er yn ard-laa-feailley, as er laa-feailley casherick y Chiarn? 6Son cur-my-ner t’ad er n’immeeaght dy ve caillit ’sy traartys: nee Egypt ad y haglym, nee Memphis ad y oanluckey: ayns ynnydyn eunyssagh nyn argid nee undaagagh gaase: bee onnaneyn ayns ny cabbaneyn oc. 7Ta laghyn yn cherraghey er jeet, ta laghyn y chooilleeney er verraghtyn orroo, yiow Israel fys er: ta’n phadeyr ny ommydan, ta’n dooinney spyrrydoil ass e cheeayll, son mooadys dty vee-chraueeaght, as y jymmoose hrome. 8Va arreyder Ephraim marish my Yee: agh ta’n phadeyr ribbey shelgeyr ayns ooilley e raaidyn, as ayns myskid noi thie e Yee. 9T’ad er hayrn loght trome orroo hene, myr ayns laghyn Ghibeah: shen-y-fa nee eh cooinaghtyn er nyn mee-chairys, nee eh goaill cooilleeney son nyn beccaghyn. 10Hooar mee Israel myr messyn-feeyney ayns yn aasagh: va nyn ayraghyn dooys myr mess toshee yn villey-figgagh ’sy chied imbagh: agh hie ad gys Baal-peor, as ren ad scarrey ad-hene gys y red naareydagh shen; as haink ad dy ve eajee, myr ny reddyn deiyr ad orroo. 11Er son Ephraim, nee yn ghloyr oc getlagh ersooyl myr ushag; veih yn ymmyrkey as veih yn vreïn, as veih yn yiennaghtyn. 12Ga dy vel ad troggal nyn gloan, ny-yeih neem’s ad y roostey, nagh bee dooinney jeu faagit: dy jarroo smerg dauesyn myrgeddin, tra nee’m ad y hreigeil. 13Ta Ephraim myr honnick mee Tyrus, soit ayns ynnyd eunyssagh: agh ver Ephraim magh e chloan gys y dunver. 14Cur daue, O Hiarn; cre ver oo daue? cur daue breïn ghennish, as keeaghyn shiast. 15As ooilley nyn olkys ayns Gilgal: son shen y raad hug mee dwoaie daue: son olkys nyn ghrogh-yannoo eiyr-yms ad ass my hie, cha der-ym graih daue ny-sodjey: ta ooilley nyn reiltee mee-viallee. 16Ta Ephraim guint, ta’n fraue oc shirgit, cha jean ad gymmyrkey veg y vess: dy jarroo, ga dy n’ymmyrk ad, ny-yeih, stroie-yms eer mess ennoil nyn mreïn. 17Nee my Yee’s ad y yiooldey veih, er-yn-oyr nagh ren ad geaishtagh rish: as bee ad wagaantee mastey ny ashoonee.