CAB. I

1Ashlish Isaiah mac Amoz, honnick eh mychione Judah as Jerusalem, rish lhing Uzziah, Jotham, Ahaz, as Hezekiah, reeaghyn Yudah. 2Clasht-jee, O shiuish niaughyn, as eaisht, O halloo: son ta’n Chiarn er loayrt, Ta mee er voandyrys as er hroggal cloan, agh t’ad er n’irree-magh m’oï. 3Shione da’n dow yn er s’liesh eh, as yn assyl cratch e vainshtyr: agh cha nhione da Israel mish, cha vel my phobble smooinaghtyn orrym. 4Ah, ashoon peccoil, pobble laadit lesh olk, sluight dy ghrogh-yantee, cloan stroialtagh! t’ad er hreigeil y Chiarn, t’ad er vrasnaghey jymmoose fer-casherick Israel, t’ad er hyndaa cooyl rhym. 5Cre’n-fa veagh shiu ny-sodjey er nyn gerraghey? nee shiu girree-magh ny smoo as ny smoo. Ta’n kione ooilley ching, as yn cree ooilley faiynt. 6Veih boyn ny coshey eer gys y chione cha vel slaynt erbee ayn; agh lhottyn, as brooghyn, as chingyn yngyragh: cha vel ad er ve glennit ny soïlit, chamoo er ny veiyghey lesh shelliu. 7Ta’n cheer eu ny aasagh, ta ny ard-valjyn eu losht lesh aile: yn cheer eu ta joarreeyn dy chur mow roish nyn sooillyn, as te treigit, myr stroit liorish noidyn. 8As ta inneen Zion treigit myr bwane ayns garey-feeyney, as bwaag ayns garey-cucumber, as myr balley cruinnit stiagh lesh noidyn. 9Er-be dy daag Chiarn ny flaunyssee dooin sluight fardalagh, veagh shin er ve myr Sodom, as casley rish Gomorrah.

10Clasht-jee rish goo yn Chiarn, shiuish reiltee Sodom; eaisht-jee rish leigh yn Jee ain, shiuish phobble Ghomorrah: 11Gys cre’n ymmyd ta earroo nyn ourallyn dooys? ta’n Chiarn dy ghra: ta mee skee jeh chebballyn-losht reaghyn, as meeaylys maase beiyht, chamoo ta taitnys aym ayns fuill dew, ny eayin, ny goair fyrryn. 12Tra ta shiu cheet ayns my enish, quoi t’er hirrey shoh ec nyn laue, dy haaghey my chooyrtyn? 13Ny cur-jee lhieu arragh hym’s nyn jebballyn donney: ta’n oural-incense dwoaiagh dou; ny eaystyn-noa, as ny dooneeyn, as nyn veaillaghyn sumnit elley, cha voddym surranse daue; she mee-chraueeaght eh, eer yn chirveish smoo casherick. 14Ny eaystyn-noa eu, as ny feaillaghyn pointit eu, t’ad dwoaie my annym; t’ad trimshey dou, ta mee skee dy ymmyrkey ad. 15As tra ta shiu skeayley magh nyn laueyn, neem’s my hooillyn y hyndaa veue: dy jarroo tra ta shiu goaill ymmodee padjeryn, cha jean-ym clashtyn: ta nyn laueyn lane folley.

16Niee-jee, jean-jee glen; cur-jee ersooyl olk nyn yannoo veih my hooillyn; scuirr-jee veih’n drogh-yannoo; 17Ynsee-jee dy yannoo mie; shir-jee briwnys, cooin-jee lhieusyn ta tranlaasit; jean-jee briwnys son y chloan gyn ayr; Gow-jee seose cooish y ven-treoghe. 18Tar-jee nish, as lhig dooin pleadeil ry-cheilley, ta’n Chiarn dy ghra. Ga dy beagh nyn beccaghyn myr scarleod, bee ad gial myr sniaghtey; ga dy vel ad jiarg myr crimson, bee ad myr yn ollan vane. 19My vees shiu arrymagh as ammyssagh, nee shiu gee jeh foays ny cheerey: 20Agh my ta shiu gobbal as girree-magh, bee shiuish er nyn stroie lesh y chliwe: son ta beeal y Chiarn er loayrt eh.

21Kys ta’n ard-valley ynrick er jyndaa ny maarderagh! v’ee lane dy vriwnys; boallagh cairys cummal aynjee; agh nish dunveryn. 22Ta dty argid er ny hyndaa gys trustyr; ta’n feeyn ayd seiyt lesh ushtey: 23Ta dty phrinceyn mee-reiltagh, as sheshaghyn maarlee: ta dagh fer jeu sondagh er giootyn, as shêgin er leagh briwnys: cha vel ad briwnys son y chloan gyn ayr, chamoo ta cooish yn ven-treoghe cheet kiongoyrt roo. 24Shen-y-fa myr shoh ta’n Chiarn dy ghra, Chiarn ny flaunyssee, Jee niartal Israel, Ah, neem’s reaghey rish my noidyn, as goym cooilleeney orroosyn ta girree-magh m’oï.

25As chyndaa-ym my laue ort, as glen-ym ersooyl dy bollagh dty vergid, as goym ersooyl ooilley dty stainney: 26As soie-ym seose reesht dty vriwnyn myr ec y toshiaght, as dty ir-choyrlee myr ’sy chenn earish: lurg shen bee oo er dty enmys, Yn ard-valley dy chairys, Yn ard-valley ynrick. 27Bee Zion er ny livrey lesh briwnys, as hig e cloan chappee thie reesht lesh cairys.

28As bee toyrt-mow drogh-yantee as peccee lesh y cheilley, as bee adsyn ta treigeil y Chiarn er nyn stroie. 29Son gowee ad nearey jeh ny biljyn-darragh, t’ad er yeearree, as bee shiuish seaghnit son ny garaghyn ta shiu er reih. 30As bee shiuish myr yn billey-darragh, e ghuillag ta fioghey, as myr garey fegooish ushtey. 31As bee ny treanee myr barragh, as yn obbree myr drilleen, as nee ad ny-neesht lostey dy cheilley, as cha jean fer erbee ad y vooghey.