CAB. XIV

1As nee yn Chiarn soilshaghey myghin er Jacob, as nee eh foast goaill Israel myr reih, as soiaghey ad ayns nyn jeer hene: as bee joarreeyn goit stiagh mâroo, as nee ad lhiantyn gys thie Yacob. 2As nee yn pobble ad y ghoaill, as ver ad lhieu ad gys nyn ynnyd hene, as nee thie Israel freayll ad ayns cheer y Chiarn, son fir-vooinjerey as sharvaantyn: as nee ad adsyn y ghoaill son cappee, dauesyn v’ad-hene roïe nyn gappee; as nee ad reill harrish nyn dranlaasee. 3As hig eh gy-kione, ayns y laa ver y Chiarn dhyt fea veih dty hrimshey, as veih dty aggle, as veih’n vondiaght ghewil, ayn v’ou êginit dy hirveish, 4Dy jean oo goaill seose yn raa floutagh shoh noi ree Vabylon, as gra, Kys ta’n tranlaasagh er scuirr! as ard-valley ny keeshyn airhey er n’gholl naardey! 5Ta’n Chiarn er vrishey lorg ny mee-chrauee, as lorg-reeoil ny fir-reill. 6Eshyn woaill yn pobble ayns e yymmoose lesh builley trome, eshyn ren ny ashoonyn y reill ayns farg, t’eh hene tranlaasit, as cha vel unnane dy lhiettal. 7Ta’n slane seihll ec fea, as ayns shee: t’ad brishey magh lesh arraneyn. 8Dy jarroo ta ny biljyn-juys boggyssagh harryd, as cedaryn Lebanon, gra, Er-dyn traa v’ou uss lhieggit, cha vel lhieggeyder fuygh erbee er jeet seose nyn ’oï. 9Ta niurin veih heese er ny ghoostey er dty hon, dy heet dty whail tra hig oo: te gleashagh seose ny merriu er dty hon, dy feer ooilley ard-gheiney yn theihll; te er hroggal seose veih nyn stuill-reeoil ooilley reeaghyn ny ashoonyn. 10As nee ad ooilley loayrt as gra rhyt, Vel uss er jeet dy ve moal myr ta shinyn? vel oo er jeet dy ve casley rooin hene? 11Ta dty voyrn lhieggit sheese gys yn oaie, as kiaull dty violyn: ta ny beishteigyn er nyn skeayley foyd, as ta ny dhianeyn dy dty choodaghey. 12Kys t’ou er duittym veih niau, O Lucifer, mac y vadran! kys t’ou uss giarit sheese gys y thalloo, uss ren craa ny ashoonyn! 13Son dy vel oo er ghra ayns dty chree, Hem seose er niau, trog-yms my stoyl-reeoil erskyn rollageyn Yee; soie-yms myrgeddin er cronk yn cho-chruinnaght, ayns lhiatteeyn y twoaie: 14Hem’s seose erskyn yrjid ny bodjallyn, beem’s corrym rish yn Er smoo syrjey. 15Foast bee oo er dty hilgey sheese gys niurin, gys lhiatteeyn yn oaie. 16Nee adsyn hee oo, jeeaghyn dy gyere ort, as goaill baght jeed, gra, Nee shoh yn dooinney hug er y thalloo craa, as hilg reeriaghtyn bun-ry-skyn; 17Ren y seihll myr faasagh, as hug ny ard-valjyn echey mow; nagh doshil pryssoon e chappeeyn? 18Ta ooilley reeaghyn ny ashoonyn, dy feer dagh fer jeu, ny lhie ayns gloyr, dy chooilley ghooinney ayns e lhiaght hene: 19Agh t’ou uss tilgit magh ass dty oaie, myr bangan loau, as myr coamrey ny merriu ta roight trooid lesh y chliwe, ta ceaut sheese fo claghyn yn ooig; myr corp marroo stampit fo-chosh. 20Cha bee uss oanluckit mâroosyn, er-yn-oyr dy vel oo er stroie dty heer, as er varroo dty phobble: cha bee sluight drogh-yantee dy bragh onnoroil. 21Kiare-jee dy stroie e chloan son mee-chraueeaght nyn shenn-ayryn, nagh n’irree ad dy ghoaill eiraght ’sy cheer, ny lhieeney eaghtyr y thallooin lesh ard-valjyn. 22Son irree-yms seose nyn ’oï, ta Chiarn ny flaunyssee dy ghra, as giare-ym jeh veih Babylon yn ennym, as y sluight, as y mac, as yn oe, ta’n Chiarn dy ghra. 23Nee’m eh y yannoo ny chaitnys da’n choayr-vooar, as loghanyn ushtey: as sceabym eh lesh y sceab lhome, ta Chiarn ny flaunyssee dy ghra.

24Ta Chiarn ny flaunyssee er vreearrey, gra, Shickyr myr ta mee er smooinaghtyn, shen myr hig eh gy-kione; as myr ta mee er chiarail, shen myr nee eh shassoo: 25Dy brish-ym yn Assyrian ayns my heer, as er my leityn stamp-ym eh fo-chosh: eisht nee yn whing echey brishey voue, as yn errey echey scarrey veih ny geayltyn oc. 26Shoh yn briwnys ta kiarit er y slane seihll; as shoh yn laue ta sheeynt magh er ooilley ny ashoonyn. 27Son ta Chiarn ny flaunyssee er chiarail eh, as quoi nee jannoo eh gyn bree? as ta’n laue echey sheeynt magh, as quoi oddys eh y lhiettal? 28Ayns y vleïn hooar Ahaz baase va’n errey shoh. 29Ny jean uss boggyssagh slane Palestina, er-yn-oyr dy vel yn lorg echeysyn brisht, ren dty woalley: son magh ass fraue yn ard-nieu hig magh cockatrice; as bee yn sluight echey ard-nieu aileagh skianagh. 30As bee beaghey ec mac shinney ny boghtyn, as nee’n ymmyrchagh lhie sheese ayns sauchys: agh neem’s stroie yn fraue ayd’s lesh y ghortey, as ver eshyn naardey dty luight. 31Gull, O yiat; yllee, O ard-valley: t’ou uss slane Palestina er dty skeayley: son hig jaagh veih’n twoaie, as cha n’uirree fer jeu nagh jig kionfenish, tra vees eh er ny eam. 32Cre’n ansoor ver fer eisht da chaghteryn ny ashoonyn? Eer dy vel y Chiarn er niartaghey Zion, as ver boghtyn e phobble nyn marrant ersyn.